ឥទ្ធិពលខ្យល់ព្យុះបោកបក់បំផ្លាញលំនៅដ្ឋានប្រជាពលរដ្ឋអស់ប្រមាណជាង១៤០ខ្នង ក្នុងភូមិសាស្ត្រស្រុកដងទង់
ផ្សាយថ្ងៃទី០៤-០៤-២០១២: ដកស្រង kqube.
កំពត ៖ លំនៅដ្ឋានប្រជាពលរដ្ឋប្រមាណជាង១៤០ខ្នងសិ្ថតក្នុងឃុំល្អាងនៃ ស្រុកដងទង់ ខេត្តកំពត ត្រូវបានខ្យល់ព្យុះបោកបក់បំផ្លាញក្នុងមួយប៉ប្រិចភ្នែក ខណៈពេលមានភ្លៀងធ្លាក់មួយមេធំកាលពីរសៀលថ្ងៃទី០៣ខែមេសា ឆ្នាំ២០១២វេលាម៉ោង១៥និង០៥នាទី។ទន្ទឹមនឹងខ្យល់ព្យុះកំណាចនេះក៏ មានរន្ទះបាញ់បណ្ដាលឲ្យមនុស្សចំនួន៥នាក់រងរបួសថែមទាំងងាប់គោ៤ ក្បាលនិងជ្រូកមួយក្បាលផងដែរ។ តាមរបាយការណ៍ដែលទទួលបានពីលោក មួង ឈុត អភិបាលស្រុកដងទង់បានឲ្យដឹងថានៅពេលមានភ្លៀងធ្លាក់មួយមេយ៉ាងធំ លាយឡំជាមួយខ្យល់និងរន្ទះបាញ់ដ៏កក្រើករយៈពេលពេញមួយម៉ោងគឺចាប់ពី ម៉ោង១៥រហូតដល់ម៉ោង១៦ថ្ងៃទី០៣ខែមេសា ឆ្នាំ២០១២នោះផ្ទះប្រជាពលរដ្ឋប្រមាណជាង១៤០ខ្នងត្រូវខ្យល់គួចបោកបក់ បណ្ដាលឲ្យបាក់ខូចខាត ហើយក្នុងនោះមានចំនួន៣០ខ្នងត្រូវខូចខ្ទេចខ្ទីទាំងស្រុងក្រៅពីនោះ រងការខូចខាតជាមធ្យមប៉ុណ្ណោះ។លោកបានបញ្ជាក់ផងដែរថា ចំពោះតួលេខជាក់លាក់ដែលត្រូវស្រង់ចូលក្នុងបញ្ជីបានរាប់គិតតែ ចំនួន១២៣ផ្ទះប៉ុណ្ណោះដោយសារមានលំនៅដ្ឋានខ្លះគ្រាន់តែរងផលប៉ះពាល់ តិចតួចពុំមានគួរឲ្យកត់សម្គាល់នោះឡើយជាមួយនេះស្របពេលកំពុងភ្លៀង ធ្លាក់យ៉ាងខ្លាំងនោះក៏មានរន្ទះបាញ់ក្ដុងក្ដាំងដែលបានសម្លាប់សត្វ គោចំនួន៤ក្បាល និងសត្វជ្រូកមួយក្បាលផងដែរ។លោកអភិបាលស្រុកបានឲ្យដឹងទៀតថា ភូមិសាស្ត្រដែលរងនូវសម្ពាធខ្យល់ព្យុះមានចំនួន៤ភូមិក្នុងឃុំល្អាង រួមមាន ភូមិល្អាង ភូមិបើន ភូមិត្រពាំងសេះ និងភូមិអម្ពិល ហើយបន្ទាប់ពីកើតមានគ្រោះមហន្តរាយពីធម្មជាតិនេះ ខាងអាជ្ញាធរបាននិងកំពុងចុះស្រង់តួលេខជាក់លាក់ដើម្បីរិះរក វិធានការជួយសង្គ្រោះជាបន្ទាន់ផងដែរ។សូមបញ្ជាក់ថាកាលពីថ្ងៃទី៣ខែមេសាឆ្នាំ២០១២ម្សិលមិញខាងក្រសួង ធនធានទឹកនិងឧតុនិយមបានប្រកាសផ្សព្វផ្សាយជាសាធារណៈស្តីអំពី ខ្យល់ព្យុះដែលបោកបក់មកពីសមុទ្រចិនភាគខាងត្បូងឈ្មោះព្យុះប៉ាកហា ត្រង់ខ្សែវណ្ឌទី០៩ចុច៧នៃរយៈទទឹងខាងជើងនិងខ្សែស្របទី១១ចុច២នៃរយៈ បណ្តោយខាងកើតដោយមានកំលាំងជាវិជ្ជមាន៦៥គីឡូម៉ែត្រក្នុង១ម៉ោងហើយបាន និងកំពុងធ្វើដំណើរឆ្ពោះទៅទិសពាយ័ព្យ។ទនឹ្ទមនឹងគ្រោះមហន្ត
រាយពី ធម្មជាតិដ៏ធ្ងន់ធ្ងរខាងក្រសួងធនធានទឹកនិងឧតុនិយមបានប្រកាសផងដែរ ដល់ប្រជាពលរដ្ឋកម្ពុជាទូទៅគួរតែបង្កើនការប្រុងប្រយ័ត្នមិនត្រូវ ធ្វើនេសាទឬការធ្វើដំណើរតាមជើងទឹកព្រោះខ្យល់ព្យុះនេះនឹងមាន ឥទិ្ធពលវាយលុកក្នុងប្រទេសកម្ពុជាប្រមាណ១៣ខេត្ត ដោយចាប់ពីថ្ងៃទី០១រហូតដល់ថ្ងៃទី០៣ខែមេសា ឆ្នាំ២០១២៕
No comments:
Post a Comment