ប្រជាពលរដ្ឋក្នុងខេត្តកំពតឆ្នាំនេះប្រមូលផលដំណាំឪឡឹកបានច្រើនតែតម្លៃហាងឆេងមិនសូវខ្ពស់
ផ្សាយថ្ងៃទី០៤-០៤-២០១២: ដកស្រង kpt-news.com
កំពត ៖ ដំណាំប្រភេទឪឡឹកបច្ចុប្បន្នត្រូវបានប្រជាពលរដ្ឋក្នុងខេត្តកំពត បាននិងកំពុងនាំគ្នាបង្កើនការដាំដុះយ៉ាងផុលផុស ថី្វត្បិតវាជាដំណាំមួយដែលពិបាកថែទាំក៏ដោយចុះ។ចំពោះភាពខិតខំ ដោយអំណត់ទម្រាំទទួលផលនេះដែរ គេបានសង្កេតឃើញថាក្នុង
ឆ្នាំនេះ ប្រជាពលរដ្ឋដែលបាននិយមប្រកបការងារដាំឪឡឹកបាននិងកំពុងសប្បាយ រីករាយពីការប្រមូលភោគផលឪឡឹក ព្រោះឆ្នាំនេះពួកគាត់ទទួលអំណោយផលល្អពីធម្មជាតិទើបប្រមូលផល ឪឡឹកបានច្រើនគួរឲ្យកត់សម្គាល់បែបនេះ។ ជាមួយនឹងភាពសប្បាយរីករាយនឹងការប្រមូលផលឪឡឹកនេះ អ្នកមីងជាម្ចាស់ចំការដែលមានទីតាំងនៅក្នុងភូមិសាស្ត្រស្រុក អង្គរជ័យ ខេត្តកំពត បាននិយាយប្រាប់អ្នកយកព័ត៌មានថា ការដាំឪឡឹកពិតជាមានការពិបាកថែទាំយ៉ាងពិតប្រាកដ ព្រោះដំវាជាដំណាំមួយប្រភេទត្រូវការថែទាំដ៏ហ្មត់ចត់ ដូចជាការប្រើជីនិងតម្រូវការទឹកជាចាំបាច់សំរាប់ធ្វើឲ្យដំណាំនេះ វាលូតលាស់បានល្អ។កសិកររូបនោះបានប្រាប់ដោយអួតអាងថាគាត់ ប្រកបការងារដាំឪឡឹកនេះយូរណាស់មកហើយតែគាត់មិនដែលខូចខាតម្តងណាឡើយ ព្រោះគាត់បានសិក្សានិងស្វែងយល់ច្បាស់ពីការថែទាំនិងប្រើប្រាស់ជី ទៅតាមកំរិត គួបផ្សំនឹងការផ្តល់ទឹកស្រោចស្រពតាមក្បួនខ្នាតផងដែរ។ប៉ុន្តែដំណាំ ប្រភេទឪឡឹកនេះបើអ្នកដាំមិនដឹងពីចំណុចសំខាន់ៗរបស់វានោះទេវា អាចបណ្តាលឲ្យយើងខូចខាតផលប្រយោជន៍យ៉ាងច្រើន ដូចជាការខាតពេលវេលានិងខាតថវិកាក្នុងការទិញពូជឬទិញជី និងការចំណាយផ្សេងៗទៅលើការភ្ជួររាស់ ដាស់ដីជាដើម ដោយសារការដាំកន្លងមកមានអ្នកខ្លះធ្វើមួយឆ្នាំខុស ជួនកាលអាចត្រូវឆ្នាំក្រោយវិញក៏មានដែរ។ដូច្នេះដើម្បីចង់ឲ្យផល ឪឡឹកមានភោគផលល្អ គឺត្រូវការចាំបាច់នូវការថែរក្សាយ៉ាងដិតដល់ ជាពិសេសការផ្តល់ទឹកនិងប្រើប្រាស់ជីឲ្យមានកំណត់ទើបការប្រមូលផល អាចទទួលបានគួរជាទីគាប់ចិត្ត។ម្ចាស់ចំការឪឡឹកបានឲ្យដឹងទៀតថាផល ឪឡឹកក្នុងឆ្នាំនេះពិតជាមានកំណើនជាងបណ្តាឆ្នាំមុនៗតែការលក់ដូរ មានតម្លៃសមល្មមអាចទិញឬជាវបានតាមសេចក្តីត្រូវការ ថែមទាំងមានរសជាតិផ្អែមឆ្ងាញ់គួរឲ្យជាប់ចិត្តតែម្តង។ ទោះបីបែបណាក្នុងឆ្នាំ២០១២នេះការដាំឪឡឹកពិតជាបានធ្វើឲ្យកសិករ ភាគច្រើនរស់នៅក្នុងភូមិសាស្ត្រខេត្តកំពតកាន់តែមានជីវភាពធូរធា មួយកំរិតផងដែរ ដរាបណាដំណាំឪឡឹកនេះនៅតែផ្តល់ទិន្នផលខ្ពស់ដល់កសិករបែបនេះ៕
No comments:
Post a Comment