កំពត ៖ ស្ត្រីម្នាក់ខណៈកំពុងជិះកង់ដឹកកូនស្រីមកពីស៊ីការគេក្នុងភូមិ ក៏ត្រូវម៉ូតូអ្នកស្រវឹងបើកទៅបុកមួយទំហឹងបណ្ដាលឲ្យរងរបួសធ្ងន់ ឯកូនស្រីជិះពីក្រោយរងរបួសស្រាល ហើយករណីនេះក្រោយពីកើតហេតុភាគីបង្កក៏បានជួយដឹកស្ត្រីរងគ្រោះ ទៅកាន់មនី្ទរពេទ្យដើម្បីសង្គ្រោះជីវិតផងដែរ។ គ្រោះថ្នាក់ខាងលើបានកើតឡើងនៅត្រង់ចំណុចភូមិកោះចំការ ឃុំបឹងសាលាខាងត្បូង ស្រុក
កំពង់ត្រាច ខេត្តកំពត កាលពីយប់ ថ្ងៃទី០៥ខែមិនា ឆ្នាំ២០១២វេលាម៉ោង១៩និង១៥នាទី។
សាក្សីនៅកន្លែងកើតហេតុបាននិយាយថា មុនពេលជួបគ្រោះដ៏អាក្រក់គេឃើញស្ត្រីរងគ្រោះជិះកង់ដឹកក្មេងស្រី ម្នាក់នៅពីក្រោយចេញមកពីចូលរួមពិធីមង្គលកាគេក្នុងទិសដៅពីត្បូង ទៅជើង ស្រាប់តែមកដល់ចំណុចកើតហេតុគេឃើញម៉ូតូ១គ្រឿងបើកបោះពួយយ៉ាងលឿន ថែមទាំងរេពេញផ្លូវមកពីជើងក្នុងទិសដៅផ្ទុយគ្នាឮហើយក៏ជ្រុលចង្កូត ទៅបុកអ្នកជិះកង់មួយទំហឹងបណ្តាលឲ្យស្ត្រីជាម្ចាស់កង់ រួមទាំងក្មេងស្រីជិះពីក្រោយខ្ទាតបោកទៅនឹងចិញ្ចើមផ្លូវរបួសបែក មុខបែកមាត់សន្លប់ឈឹងតែម្តង។ ដោយឡែកម្ចាស់ម៉ូតូបង្កក្រោយពីប៉ះទង្គិចគ្រាន់តែរបួសស្រាល ហើយបានជួយហៅសាច់ញ្ញាតិលើកស្ត្រីរងគ្រោះដឹកតាមម៉ូតូយកមកកាន់ មន្ទីរពេទ្យដើម្បីសង្គ្រោះអាយុជីវិតផងដែរ។
បើតាមប្រភពពីសមត្ថកិច្ចមូលដ្ឋានបានប្រាប់ឲ្យដឹងថាស្ត្រីរងគ្រោះ មានឈ្មោះមូល សុភ័ត្រភេទស្រីអាយុ៣៣ឆ្នាំបានជិះកង់មកពីស៊ីការគេនៅខាងត្បូង កន្លែងកើតហេតុដោយមានកូនស្រីអាយុ៨ឆ្នាំរួមដំណើរពីក្រោយផងស្រាប់តែ មកដល់ចំណុចកើតហេតុក៏ត្រូវម៉ូតូម៉ាកស្មាស់ពណ៌ខៀវសេរីឆ្នាំ២០០៧ពាក់ ស្លាកលេខកំពត១B-១៣២៧បើកបរដោយបុរសស្រវឹងម្នាក់ដែលគេស្គាល់ឈ្មោះ យិនកូយភេទប្រុសអាយុ២៤ឆ្នាំបោះពួយមកពីទិសដៅបញ្ច្រាសរួចព្រលះមួយ ទំហឹងបណ្តាលឲ្យរងរបួសធ្ងន់តែម្តង។ប៉ូលិសបានឲ្យដឹងទៀតថា ស្ត្រីរងគ្រោះនិងអ្នកបង្កមានផ្ទះសំបែងក្បែរគ្នា សិ្ថតក្នុងភូមិ ឃុំកើតហេតុខាងលើ។ បច្ចុប្បន្នស្ត្រីរងគ្រោះត្រូវបានគ្រូពេទ្យកំពុងយកចិត្តទុកដាក់ជួយ សង្ត្រោះបន្ទាន់ហើយ។ ដោយឡែកមធ្យោបាយទាំងពីរគ្រឿងមិនត្រូវបាននាំមកកាន់អធិការដ្ឋាន ស្រុកដើម្បីធ្វើការដោះស្រាយទៅតាមផ្លូវច្បាប់ទេដោយសារភាគីបង្កនិង ភាគីជនរងគ្រោះសុំសម្រួលដោះស្រាយបញ្ចប់បញ្ហា៕
No comments:
Post a Comment