ផ្សាយថ្ងៃទី២៧-០៣-២០១២: ដកស្រង kohsantepheapdaily
ខេត្តកំពត ៖ ជនសង្ស័យ២នាក់ ត្រូវនគរបាលស្រុកបន្ទាយមាសចាប់ខ្លួន កាលពីរសៀលថ្ងៃទី២២ មីនា កន្លងទៅ បន្ទាប់ពីមានការស៊ើបអង្កេតថា ជនសង្ស័យទាំង២នាក់នោះមានការពាក់ព័ន្ធលួចក្របីនៅក្នុងក្រោល មួយស្ថិតនៅក្នុងភូមិត្នោត ឃុំត្នោតចុងស្រង់ ស្រុកបន្ទាយមាស កាលពីវេលាម៉ោង១១ និង៣០នាទីយប់ថ្ងៃទី១៨ មីនា ។តាមមន្ត្រីនគរបាលព្រហ្មទណ្ឌស្រុក ដែលបានធ្វើកំណត់ហេតុលើជនសង្ស័យទាំង២នាក់ បានប្រាប់កោះសន្តិភាពថា ជនដែលត្រូវចាប់ខ្លួនទាំង២នាក់នេះម្នាក់ឈ្មោះ
សំ ទូច ភេទប្រុស អាយុ៤៣ ឆ្នាំ រស់នៅភូមិគោកច្រេស ឃុំសំរោង ស្រុកសំរោង ខេត្តឧត្តរមានជ័យ បច្ចុប្បន្នជាអ្នករកស៊ីជួញគោ-ក្របី ពីខេត្តឧត្តរមានជ័យមកស្តុកក្នុងក្រោលរបស់ឈ្មោះសេង ទ្រី ដែលមានទីកន្លែងនៅឃុំត្នោតចុងស្រង់ ជាប់ព្រំដែនប្រទេសវៀតណាម ។ ឯជនម្នាក់ទៀតឈ្មោះឌី ប្រុស អាយុ៤៨ឆ្នាំ នៅភូមិក្រាំងដូង ឃុំសំរោង ក្រោមស្រុកបន្ទាយមាស ។ មន្ត្រីនគរបាលបានបន្តថា
បុរសឈ្មោះឌី ប្រុស ជាអ្នកយាមក្រោលក្របី ធ្វើឱ្យបាត់អស់ចំនួន៦ក្បាល ក្រោយពេលបាត់ម្ចាស់ក្របីបានទារសំណងឱ្យម្ចាស់ក្រោលសងតម្លៃជាង ២០លានរៀល ។ ក្រោយមកសមត្ថកិច្ចបានស៊ើបអង្កេត និងតាមដានរកឃើញថា ជនសង្ស័យទាំង២នាក់នេះ បានទូរស័ព្ទទាក់ទងគ្នាជាប់នៅស្រុកគិរីវង់ ខេត្តតាកែវ ។មន្ត្រីនគរបាលបានអះអាងថា ម្ចាស់ក្របី និងអ្នកយាមក្របីពិតជាផ្សំ
គំនិតគ្នាលួចក្របី៦ក្បាលនោះមែន ដើម្បីឱ្យឈ្មោះសេង ទ្រី ជាម្ចាស់ក្រោលចេញលុយសងទៅម្ចាស់ក្របីឈ្នោះសំ ទូច ។ នគរបាលបញ្ជាក់ថា ឈ្មោះឌី ប្រុស និងឈ្មោះសំ ទូច និយាយខុសគ្នាទាំងស្រុងពីពេលវេលាបាត់ក្របី ។ ទោះជាបែបណា ជនសង្ស័យទាំង២នាក់នេះ មិនបានសារភាពថា ខ្លួនលួចក្របីទាំង៦ក្បាលនេះទេ ហើយត្រូវនគរបាលកសាងសំណុំរឿងបញ្ជូនខ្លួនពួកគេទៅស្នងការដ្ឋាន ខេត្ត ។ លោកហុង សុគុនវឌ្ឍនា ចៅក្រមស៊ើបអង្កេតសាលាដំបូងខេត្តកំពតសម្រេចឃុំខ្លួនជនសង្ស័យ ទាំង២នាក់នៅពន្ធនាគារខេត្តរង់ចាំការស៊ើបអង្កេតបន្ត ៕
No comments:
Post a Comment