ផ្សាយថ្ងៃទី២៧-០៣-២០១២: ដកស្រងkohsantepheapdaily
ខេត្តព្រះសីហនុ ៖ ក្រុមហ៊ុនដឹកជញ្ជូនទាំងអស់ត្រូវតែប្រកាន់គោលការណ៍ទាំង ៤ចំណុច ជាចំបងរួមមាន កង់,ចង្កូត,ហ្វ្រាំង, និងភ្លើងចង្កៀង ដើម្បីរួមគ្នាកាត់បន្ថយអត្រានៃការស្លាប់ដោយគ្រោះថ្នាក់ ចរាចរណ៍ ។ នេះជាប្រសាសន៍របស់លោកនាយឧត្តមសេនីយ៍ នេត សាវឿន អគ្គស្នងការនគរបាលជាតិ ថ្លែងក្នុងកិច្ចប្រជុំស្តីពីសុវត្ថិភាពដឹកជញ្ជូនទំនិញ នៅសណ្ឋាគារហ្គោលដិនស៊ី ខេត្តព្រះសីហនុ នាព្រឹកថ្ងៃទី២៦ មីនា ។លោកនាយឧត្តមសេនីយ៍ នេត សាវឿន
បានថ្លែងថា គោលបំណងនៃកិច្ចប្រជុំនាថ្ងៃនេះ គឺផ្តោតទៅលើ៣ចំណុចសំខាន់ៗរួមមាន ទី១- ដើម្បីលើកកម្ពស់ កិត្តិយស កិត្យានុភាពរបស់កម្ពុជានូវសុវត្ថិភាពចរាចរណ៍ សណ្តាប់ធ្នាប់ ទី២- កាត់បន្ថយគ្រោះថ្នាក់ចរាចរណ៍ដែលបច្ចុប្បន្នជាទុក្ខកង្វល់ របស់រាជរដ្ឋាភិបាល និងទី៣- ចូលរួមកាត់បន្ថយភាពក្រីក្រនៅកម្ពុជា ។ លោកនាយឧត្តមសេនីយ៍បន្តថា ក្រោយពីកិច្ចប្រជុំនេះ មន្ត្រីនគរបាលទាំងអស់ត្រូវតែកាត់បន្ថយការត្រួតពិនិត្យ នៅតាមផ្លូវ ហើយបែរមកអនុវត្តនៅទីកន្លែងចាប់ផ្តើមវិញ ដូចជានៅកំពង់ផែអន្តរជាតិ ឬនៅតាមចំណតរថយន្តធំៗប្រចាំខេត្តនីមួយៗ ព្រោះជាទីចាប់ផ្តើមគោលដៅរួមក្នុងការដឹកជញ្ជូនទាំង មនុស្សទាំងទំនិញ ។ លោកនាយឧត្តមសេនីយ៍ ក៏ធ្វើការជំទាស់យ៉ាងដាច់ខាតទៅនឹងការស្នើសុំបន្ធូរ បន្ថយទៅលើរថយន្តណាដែលមានសំបកកង់មិនសូវល្អផងដែរ ។លោក តូច ចាន់កុសល រដ្ឋលេខាធិការ
ក្រសួងសាធារណការនិងដឹកជញ្ជូន មានប្រ សាសន៍ថា នាពេលបច្ចុប្បន្ននេះ មូលហេតុដែលនាំ ឱ្យមានគ្រោះថ្នាក់ចរាចរណ៍ គឺមកពីកត្តា ជាច្រើន ដូចជា កត្តាយានយន្ត កត្តាស្រវឹង និងកត្តាមនុស្ស ។ល។ ហេតុការណ៍នេះ លោកស្នើសុំឱ្យក្រុមហ៊ុនទាំងអស់មេត្តាត្រួតពិនិត្យ ឡើងវិញនូវយានយន្តរបស់ខ្លួន ជាពិសេសត្រួតពិនិត្យទៅលើអ្នកបើកបររថយន្តនីមួយៗ មុននឹងអនុញ្ញាត ឬទទួលឱ្យធ្វើការបើកបរ ។បទបញ្ជារបស់លោកនាយឧត្តមសេនីយ៍ នេត សាវឿនដែលតម្រូវឱ្យក្រុមអ្នកត្រួតពិនិត្យយានយន្ត ត្រូវតែដកចេញពីតាមកំណាត់ផ្លូវនានា មកកាន់គោលដៅជាទីចាប់ផ្តើមពិតជាល្អប្រសើរពេកណាស់ ព្រោះថារាល់បញ្ហាយានយន្តដែលត្រួតពិនិត្យឃើញថា មិនមានសុវត្ថិភាពគឺពុំអនុញ្ញាតឱ្យធ្វើចរាចរណ៍តែម្តង ។ ហេតុនេះប្រសិទ្ធភាពពីកត្តាយានយន្តនឹងកាត់បន្ថយមួយ កម្រិតធំ និងមានប្រសិទ្ធភាពច្រើនជាងការដាក់កុងត្រូលតាមដងផ្លូវ ត្រួតពិនិត្យយានយន្ត ដែលគ្រាន់តែត្រួតពិនិត្យលុយប៉ុណ្ណោះ ឯគុណភាពនៃការគ្រប់គ្រងយានយន្ត ដើម្បីបញ្ចៀសគ្រោះថ្នាក់គឺគ្មានសុវត្ថិភាព ៕
No comments:
Post a Comment