អ្នកជីកចង្រិត ដែលទាហាន និងមេព្រៃបាញ់នៅខេត្តព្រះសីហនុ បានស្លាប់ នៅមន្ទីរពេទ្យកាល់ម៉ែត
ផ្សាយថ្ងៃទី១៧-១១-២០១១: ដកស្រង cen
ព្រះសីហនុ: បុរសជីកចង្រិត ដែលត្រូវទាហាន និងមេព្រៃបាញ់ នៅក្នុងដែនព្រៃហាមឃាត់ តំបន់ក្បាលឆាយ ខេត្តព្រះសីហនុ ឥឡូវនេះបានស្លាប់ នៅក្នុងមន្ទីរពេទ្យកាល់ម៉ែត នៅភ្នំពេញ កាលពីម៉ោង ៦ និង ២០ នាទី ព្រឹកថ្ងៃទី១៧ ខែវិច្ឆិកា ឆ្នាំ២០១១។ ក្រុមគ្រួសារកំពុងស្វះស្វែងរកជំនួយ ជាថវិកា ដើម្បីដឹកសាកសព យកទៅស្រុកកំណើត នៅឃុំត្រីទន្លេ ស្រុកទូកមាស ខេត្តកំពត ដើម្បីធ្វើបុណ្យតាមប្រពៃណី។
ជនរងគ្រោះ មានឈ្មោះ នួន បឿក អាយុ ២៩ឆ្នាំ មានប្រពន្ធ ឈ្មោះ សេង វណ្ណី និងមានកូនប្រុសម្នាក់។ បុរសនោះ មានស្រុកកំណើតស្រុកទូកមាស ខេត្តកំពត។
ជនរងគ្រោះបានចូលព្រៃជីកចង្រិតនៅក្នុងព្រៃហាមឃាត់តំបន់ក្បាលឆាយ ខេត្តព្រះសីហនុ កាលពីរសៀល ថ្ងៃទី១១ ខែវិច្ឆិកា ឆ្នាំ២០១១ ហើយត្រូវឆ្មាំកាពារព្រៃឈើ ជាទាហានម្នាក់ និងមេព្រៃម្នាក់ ជិះម៉ូតូដើរល្បាត ក៏ជួបប្រទះជនរងគ្រោះ កំពុងចំតិតគូថជីកចង្រិត នៅក្នុងព្រៃហាមឃាត់នោះ ពួកគេក៏ទាញយកកាំភ្លើងបាញ់ប្រហារ ត្រូវចំកំប៉េះគូបុរសរងគ្រោះ និងបៀមគ្រាប់ នៅក្នុងពោះ។ ក្រោយពីចូលពេទ្យនៅខេត្តព្រះសីហនុ ហើយមិនអាចសង្គ្រោះបាន ក្រុមគ្រួសារបានបញ្ជូនបុរសរងគ្រោះ ទៅព្យាបាលនៅមន្ទីពេទ្យកាល់ម៉ែត រាជធានីភ្នំពេញ៕
No comments:
Post a Comment