កំពត ៖ ហេតុការណ៍គួរឲ្យញាក់សាច់មួយបានកើតឡើងរវាងម៉ូតូបុកជាមួយរថយន្តកូរ៉េដឹកដីមួយគ្រឿងបណ្ដាលឲ្យក្មេង
ស្ទាវជិះម៉ូតូ៣នាក់រងរបួសយ៉ាងដំណំ ហើយក្នុងចំណោមនោះមាន២នាក់មានសង្ឃឹមរស់តិចណាស់។
គ្រោះថ្នាក់ចរាចរខាងលើបានកើតឡើង នៅវេលាម៉ោង ៨ព្រឹក ថ្ងៃទី ២៤ ខែ វិច្ឆិកា
ឆ្នាំ ២០១១ ត្រង់ចំណុចវិទ្យាល័យព្រះបិតាជាតិ ស្ថិតក្នុងភូមិ អូរច្រនឿង ឃុំ កំពង់
ត្រាចខាងលិច ស្រុក កំពង់ត្រាច ខេត្ត កំពត។
សាក្សីបញ្ជាក់ថានៅមុនពេលកើតហេតុ គេឃើញក្មេងស្ទាវ ៣នាក់ជិះម៉ូតូមួយគ្រឿង
បោះពួយពីកើតទៅលិច ក្នុងល្បឿនយ៉ាងលឿនគួរឲ្យខ្លាច។ លុះមកដល់ចំណុច
កើតហេតុ អ្នកបញ្ជាចង្កូតម៉ូតូបានបន្ថែមល្បឿនដើម្បីជែងរថយន្តមួយគ្រឿងដែលបើកស្របទិសគ្នា។ តែខណៈពេលនោះមានរថយន្តកូរ៉េមួយគ្រឿងទៀតដឹកដីចំណុះ ១តោនកន្លះ ធ្វើដំណើរបញ្ច្រាសទិសគ្នាមកដល់ល្មម ទើបព្រលះគ្នាប្រាវតែម្ដង បណ្ដាលឲ្យម៉ូតូកៀរជាប់ក្រោមរថយន្ត ចំណែកមនុស្សដែលជិះម៉ូតូទាំង៣នាក់នោះ ហោះប៉ើងដូចស្លឹកឈើ រួចធ្លាក់ទៅលើដីសន្លប់ឈឹងទាំងអស់គ្នា។ រីឯអ្នកបើកបររថយន្តបង្កក្រោយពេលឃើញហេតុការណ៍មិនស្រួល ក៏បានគេចខ្លួនបាត់ឈឹងដោយសន្សល់ទុករថយន្តនៅកន្លែងកើតហេតុ ។
លោក សំរិទ្ធិ សុគន្ធ អធិការរងផ្នែកចរាចរស្រុកកំពង់ត្រាច បានប្រាប់ឲ្យដឹងថា ជនរងគ្រោះក្នុងករណីនេះសុទ្ធតែជាក្មេងស្ទាវ ទី១. ឈ្មោះ អេប វណ្ណៈ ភេទប្រុស អាយុ ១៩ឆ្នាំ ជាអ្នកបើកម៉ូតូរបួសធ្ងន់ជាងគេ ទី.២ ឈ្មោះ ចាប ថន ភេទប្រុសអាយុ ១៩ឆ្នាំ របួសស្រាល ទី៣. ឈ្មោះ ម៉ឹង ធាំ ភេទប្រុស អាយុ ១៩ឆ្នាំ របួសធ្ងន់។ អ្នកទាំងបីមានទីលំនៅ ភូមិ បាយទា ឃុំ ស្វាយទងខាងជើង ស្រុក កំពង់ត្រាច ខេត្ត កំពត។ ម៉ូតូរបស់ជនរងគ្រោះម៉ាក វ៉េវ ពណ៌ខ្មៅ ពាក់ស្លាកលេខ 1D-6712។ ចំណែករថយន្តបង្ក ម៉ាក កូរ៉េ ពណ៌ខៀវ ចំណុះ១តោនកន្លះ ពាក់ស្លាកលេខកំពត 2A-1395។ ក្រោយពេលកើតហេតុ មធ្យោបាយទាំងពីរគ្រឿងត្រូវប៉ូលិសអូសយកទៅរក្សាទុកនៅអធិការដ្ឋានស្រុកដើម្បីដោះស្រាយ។ ដោយឡែកជនរងគ្រោះទាំង៣នាក់ត្រូវបានក្រុមគ្រួសារដឹកបន្តទៅសង្គ្រោះនៅមន្ទីរពេទ្យប្រទេសវៀតណាម៕
</
No comments:
Post a Comment