មានអ្នកអើតឡឺមក្បែរគយព្រែកចាកមួយចំនួនឃាត់ម៉ូតូយកលុយ មន្ត្រីគយថា ដេញចោលអស់ហើយ
ផ្សាយថ្ងៃទី១៩-០៩-២០១១: ដកស្រង kohsantepheapdaily
ខេត្តកំពត ៖ មន្ត្រីគយច្រកទ្វារអន្តរជាតិព្រែកចាកកំពុងរងការចោទប្រកាន់ថា មានមនុស្ស៣នាក់ នៅស្និទ្ធនឹងមន្ត្រីគយបានដើរប្រមូលលុយពីក្រុមម៉ូតូដឹកផ្លែឈើ និងម៉ូតូដឹកទំនិញផ្សេងៗទៀត ដែលឆ្លងដែនទៅប្រទេសវៀតណាម។
បើយោងតាមសម្តីអ្នករត់ម៉ូតូដឹកផ្លែឈើនិយាយថា មានមនុស្សចំនួន៣នាក់ដែលក្រុមម៉ូតូដឹកទំនិញឆ្លងដែន ធ្លាប់មានការប្រកែកគ្នាជាញឹកញាប់ ដោយសារតែអ្នកទាំងនោះស្លៀកពាក់ស៊ីវិល ហើយមានកាន់វិទ្យុទាក់ទងម្នាក់មួយគ្រឿងដើរប្រមូលលុយពីម៉ូតូរបស់ពួកគាត់ដោយមួយគ្រឿងត្រូវបង់លុយ៥ពាន់រៀល ហើយបើមិនបានតាមការកំណត់ទេ គឺមានបញ្ហាអាចនាំម៉ូតូចូលទៅទុកនៅកន្លែងគយ។ បន្ទាប់ពីយកលុយពីក្រុមម៉ូតូដឹកផ្លែឈើហើយ អ្នកទាំងនោះចល័តតាមរបៀង រកមើលអ្នកដឹកឈើគ្រញូងទៀតផង។
អ្នកដឹកទំនិញតាមម៉ូតូមកពីប្រទេសវៀតណាម ឆ្លងកាត់ច្រកទ្វារអន្តរជាតិព្រែកចាកម្នាក់ ឈ្មោះដេញ ញាញ់ ភេទប្រុស អាយុ៣២ឆ្នាំ និយាយថា ម៉ូតូដឹកអីវ៉ាន់របស់គាត់មានចំនួន២គ្រឿង ត្រូវបានគេស្ទាក់ឱ្យចូលទៅបង់លុយ ពីមុនត្រឹមតែ២ម៉ឺនរៀលទេ ហើយឥឡូវនេះ គយឡើងដល់៨ម៉ឺនរៀលឯណោះ។
ទាក់ទិននឹងការចោទប្រកាន់ថា មានមនុស្សរបស់គយដើរប្រមូលលុយគ្រប់ទីកន្លែងនេះ លោកទន់ ចាន់ធី ប្រធានគយច្រកទ្វារអន្តរជាតិព្រែកចាក បានមានប្រសាសន៍ថា លោកទទួលស្គាល់ថា ពិតជាមានករណីនេះមែន ហើយខាងគយក៏បានដកចេញអស់ហើយដែរ ៕
No comments:
Post a Comment