ក្រុមហ៊ុនកំពតខេស៊ីមេនធានាជួសជុលផ្លូវបន្ទាប់ពីអ្នកភូមិបានបិទ ព្រោះដឹកជញ្ជូនខូចផ្លូវ
ផ្សាយថ្ងៃទី១៩-០៩-២០១១: ដកស្រង kohsantepheapdaily
ខេត្តកំពត ៖ ក្រុមអ្នកភូមិច្រកឃ្លៃ ឃុំទូកមាសខាងលិច ស្រុកបន្ទាយមាស កាលពីថ្ងៃសៅរ៍ ទី១៧ កញ្ញា បាននាំគ្នាដាក់បារ៉ាស់នៅផ្លូវក្រាលក្រួសក្រហមមួយកន្លែងដែលឆ្ពោះទៅកាន់រោងចក្រផលិតស៊ីម៉ង់ត៍ភ្នំទុងទូកមាស ដោយសារតែក្រុមហ៊ុនកំពតខេស៊ីមេន មិនគោរពតាមការសំណូមពររបស់ពលរដ្ឋ ដែលបានទទូចសុំឱ្យក្រុមហ៊ុនជួសជុលផ្លូវនោះឡើងវិញ ព្រោះកន្លងមក មានការខូចខាតដោយមានក្រុមហ៊ុនដឹកជញ្ជូនចំនួន៤ បានធ្វើចរាចរលើផ្លូវនេះ ជាប្រចាំ។
ស្ត្រីម្នាក់នៅភូមិច្រកឃ្លៃបាននិយាយថា កន្លងមកមានរថយន្តដឹកជញ្ជូនស៊ីម៉ង់ត៍ ដឹកដី ឥដ្ឋ និងសម្ភារផ្សេងៗទៀតធ្វើដំណើរលាន់កក្រើកដីដូចគេហែរកឋិនធ្វើឱ្យខាតផ្លូវស្ទើរតែទាំងស្រុង ម្យ៉ាងទៀតធុញថប់នឹងដីហុយផង ដូច្នេះពលរដ្ឋនៅភូមិច្រកឃ្លៃមានការពិបាកចេញចូល ក៏នាំគ្នាមកបិទផ្លូវដើម្បីឱ្យក្រុមហ៊ុនចរចាជាមួយនឹងអ្នកភូមិ។
លោកជ័យ ពុធ មេភូមិច្រកឃ្លៃបានថ្លែងប្រាប់អ្នកយកព័ត៌មានកាលពីថ្ងៃអាទិត្យថា នេះជាជម្រើសចុងក្រោយ ដែលប្រជាពលរដ្ឋភូមិច្រកឃ្លៃនាំគ្នាយកបារ៉ាស់បិទផ្លូវមិនឱ្យរថយន្ត៤ក្រុមហ៊ុន បើកឆ្លងកាត់ ព្រោះរថយន្តដឹកជញ្ជូនទាំង៤ក្រុមហ៊ុនបានធ្វើឱ្យខូចផ្លូវខ្លាំងពេក។
លោកមេភូមិនិយាយថា ការបិទផ្លូវរបស់អ្នកស្រុកនេះគឺមានរយៈពេលខ្លីទេ ព្រោះខាងក្រុមហ៊ុនកំពតខេស៊ីមេន បានចេញមុខមកនិយាយជាមួយអាជ្ញាធរមូលដ្ឋាន ដោយអះអាងថានឹងឈូសឆាយផ្លូវឱ្យបានស្អាតងាយស្រួលធ្វើដំណើរឡើងវិញ ៕
No comments:
Post a Comment