យ៉ាងហោចមានកិច្ចប្រជុំថ្នាក់ដឹកនាំ និងមន្ត្រីជំនាញចំនួនប្រមាណជាង៣០០លើក នឹងពិភាក្សាបញ្ហាអាស៊ាន នៅខណៈកម្ពុជាធ្វើជាប្រធានអាស៊ានឆ្នាំ២០១២នេះ
ផ្សាយថ្ងៃទី០៩-០៤-២០១២: ដកស្រង.bayontv.com.kh
ភ្នំពេញ៖ កាលពីព្រឹកថ្ងៃទី០៩ ខែមេសា ឆ្នាំ ២០១២នេះ ក្រសួងវប្បធម៌ និងវិចិត្រសិល្បៈ បានប្រារព្ធពិធីផ្សព្វផ្សាយអំពីលទ្ធផល កិច្ចប្រជុំឧត្តមមន្ត្រីវប្បធម៌អាស៊ានលើកទី១០ ទី១១ និងសេចក្តីសម្រេចចិត្តនៃកិច្ចប្រជុំថ្នាក់រដ្ឋមន្ត្រី វប្បធម៌ ទទួលបន្ទុកការស្ថាបនាសហគមន៌សង្គម វប្បធម៌អាស៊ានលើកទី៧ ។
ឯកឧត្តម សំរាំង កំសាន្ត រដ្ឋលេខាធិការក្រសួងវប្បធម៌ និងវិចិត្រសិល្បៈ មានប្រសាសន៍ថា សហគមន៍អាស៊ាន មានសសរស្តម្ភ៣ រួមមាន សហគមន៍សន្តិសុខ នយោបាយអាស៊ាន សហគមន៍សេដ្ឋកិច្ចអាស៊ាន និងសហគមន៍សង្គមវប្បធម៌អាស៊ាន។ សម្រាប់សហគមន៍សង្គម វប្បធម៌អាស៊ាន ហៅកាត់ថា ASCC បានបង្កើតផែនការលំអិតឆ្នាំ២០១០ ២០១៥ ដែលមានគោលដៅយុទ្ធសាស្ត្រ ការលើកស្ទួយការយល់ដឹងស្តីពីវប្បធម៌ប្រវត្តិសាស្ត្រ សាសនា អារ្យធម៌ក្នុងចំណោមសមាជិកអាស៊ាន និង លើកស្ទួយការអភិរក្ស និងការថែរក្សាការពារបេតិភណ្ឌវប្បធម៌អាស៊ាន ដើម្បីធានានិរន្តរភាពនៃសហគមន៍ និងធ្វើឲ្យប្រសើរឡើងនូវការយល់ដឹងគ្នាទៅវិញទៅមករវាងប្រជាជន និងប្រជាជននៃបណ្តារដ្ឋអាស៊ានស្តីពីប្រវត្តិសាស្ត្រនៃតំបន់ វប្បធម៌ប្រហាក់ប្រហែលគ្នា និងវប្បធម៌ខុសគ្នាជាដើម។ឯកឧត្តម បន្តថា មានការងារជាច្រើនដែលថ្នាក់ដឹកនាំ និងមន្ត្រីជំនាញអាស៊ាន នឹងមកជួបប្រជុំជាមួយគ្នា យ៉ាងតិចចំនួន៣០០ដង នៅខណដែលកម្ពុជាធ្វើជាប្រធានអាស៊ាន ហើយតាមផែនការ នៅថ្ងៃទី ១៨ ដល់ថ្ងៃទី២០ ខែវិច្ចិកាឆ្នាំ២០១២ កំពូលមេដឹកនាំបណ្តាប្រទេស ជាសមាជិក នឹងមកចូលរួមកិច្ចប្រជុំកំពូលអាស៊ានលើកទី២១ម្តងទៀត ហើយសហគមន៍សង្គមវប្បធម៌អាស៊ាន ដែលក្រសួងវប្បធម៌ និងវិចិត្រសិល្បៈ នឹងរៀបចំមហោស្រពសិល្បៈវប្បធម៌អាស៊ានថ្នាក់តំបន់ ហើយក្រុមសិល្បៈបណ្តា ប្រទេសទាំង១០ នឹងមកសំដែងរួមគ្នា នៅរាជធានីភ្នំពេញ ហើយក៏គ្រោងនឹងបន្តសំដែងនៅខេត្តសៀបរាមផងដែរ ដើម្បីផ្សព្វផ្សាយខ្លឹមសារ ចំណេះដឹង និងបង្កើតសហគមន៍សង្គមវប្បធម៌អាស៊ានឲ្យបានជោគជ័យនៅក្នុងខណៈ កម្ពុជាធ្វើជាម្ចាស់ផ្ទះ៕
No comments:
Post a Comment