ថ្ងៃទី១៨-០១-២០១២: ដកស្រង www.bayontv.com.kh
ភ្នំពេញ៖ មន្រ្តីនៃប្រទេសឥណ្ឌូ នេស៊ី បានបង្ហាញអំពីគម្រោងការរបស់ឥណ្ឌូនេស៊ីជាលើកដំបូង ក្នុងការបញ្ជូនអ្នកសង្កេតការណ៍យោធាមកកាន់ប្រទេសកម្ពុជា និងប្រទេសថៃ នៅពេលឆាប់ៗខាងមុខនេះ ដែលគម្រោងការនេះ ត្រូវមន្រ្តីកម្ពុជាចាត់ទុកថា ជាសញ្ញាថ្មីមួយ នៃការជឿនលឿនក្នុងការអនុវត្តន៍នូវសាលដីការបស់តុលាការយុត្តិធម៌ អន្តរជាតិទីក្រុងឡាអេ កាលពីឆ្នាំមុន។
បើយោងតាមកាសែតហ្សាការតាប៉ុស្តិ៍របស់ប្រទេសឥណ្ឌូនេស៊ី នៅថ្ងៃទី ១៧ខែមករានេះបានឲ្យដឹងថា ឥណ្ឌូនេស៊ីនឹងបញ្ជូនអ្នកសង្កេតការណ៍យោធារបស់ខ្លួនដើម្បីសម្រប សម្រួលបញ្ហា ជម្លោះព្រំដែនរវាងប្រទេសថៃ និងប្រទេសកម្ពុជា តាមការដែលប្រទេសជិតខាងទាំងពីរនេះ បាន ឯកភាពគ្នាស្នើសុំឲ្យខ្លួនជួយនោះ។
រដ្ឋមន្រ្តីការពារជាតិឥណ្ឌូនេស៊ី ឯកឧត្តម Purnomo Yusgiatoro បានមានប្រសាសន៍កាល ពីថ្ងៃច័ន្ទទី១៦ ខែមករាថា រដ្ឋមន្រ្តីការបរទេសឥណ្ឌូនេស៊ី បានប្រាប់ឯកឧត្តមអំពី គម្រោងការនេះ។
ឯកឧត្តម Purnomo Yusgiatoro ថ្លែងប្រាប់សន្និសីទកាសែតមួយថា យើងបានរៀបចំខ្លះៗ ហើយតាំងពីឆ្នាំមុន ហើយយើងនឹងបញ្ជូនអ្នកសង្កេតការណ៍ទាំងនោះក្នុងពេលឆាប់ខាងមុខនេះ។
ឯកឧត្តម Purnomo Yusgiatoro មានប្រសាសន៍ថា កាលពីឆ្នាំមុនកម្ពុជាបានព្រមព្រៀង ឲ្យឥណ្ឌូនេស៊ីជាប់ទាក់ទងក្នុងការជួយសម្របសម្រួលបញ្ហាជម្លោះ នោះ ក៏ប៉ុន្តែថា ថៃមិនបានឆ្លើយតបដោយសារមានការផ្លាស់ប្តូរក្នុងរដ្ឋាភិបាល ហើយឯកឧត្តមបន្តថា ឥឡូវនេះប្រទេសទាំងពីរបានព្រមព្រៀងគ្នា ហើយអ្វីដែលយើងត្រូវការ គឺរៀបចំធនធានមនុស្សរបស់យើង។
បើ យោងតាមលោកឧត្តមសេនីយ Agus Suhartono មេបញ្ជាការកងទ័ពឥណ្ឌូនេស៊ី គឺឥណ្ឌូនេស៊ីនឹងបញ្ជូនបុគ្គលិកយោធាមកនៅថ្ងៃទី ០២ ខែឧសភាយ៉ាងយូរបំផុត ។
លោកឧត្តមសេនីយ Agus Suhartono មានប្រសាសន៌ថា ក្រុមអ្នកសង្កេតការណ៌កំពុង ទទួលការបណ្តុះបណ្តាលនៅឯមជ្ឈមណ្ឌលសន្តិសុខ និង សន្តិភាព ។
ចំណែកលោក Michael Tene អ្នកនាំពាក្យក្រសួងការបរទេសឥណ្ឌូនេស៊ី បានបញ្ជាក់អំពី គម្រោងការនោះ ដោយលោកមានប្រសាសន៍ថា ប្រទេសឥណ្ឌូនេស៊ីនឹងជួយប្រទេសថៃ និង ប្រទេសកម្ពុជាបង្កើតនូវសន្តិភាពនៅតាមព្រំដែនរបស់ពួកគេ។
ឯកឧត្តមឧត្តមសេនីយឯក ឈុំ សុជាតិ អ្នកនាំពាក្យក្រសួងការពារជាតិកម្ពុជា បានមាន ប្រសាសន៌ប្រាប់ទូរទស្សន៌បាយ័នព័ត៌មាននៅថ្ងៃទី១៧ខែមករាម្សិលមិញនេះថា កម្ពុជាសូមស្វាគមន៌ចំពោះការសម្រេច ណាមួយរបស់ឥណ្ឌូនេស៊ីក្នុងការបញ្ជូនអ្នកសង្កេតការណ៌មកកាន់តំបន់ ជម្លោះឲ្យបានឆាប់រហ័ស ។
ជាមួយគ្នានេះ ឯកឧត្តម ឈុំ សុជាតិ ក៏បានចាត់ទុកថា នេះជាសញ្ញាថ្មីមួយនៃការ ជឿនលឿន ក្នុងការអនុវត្តន៌នូវសាលដីការបសតុលាការយុត្តិធម៌អន្តរជាតិទីក្រុងឡាអេ ក្រោយកិច្ចប្រជុំគណៈកម្មាធិការព្រំដែនទូទៅកម្ពុជា-ថៃ ហៅកាត់ថា GBC ។
សូមបញ្ជាក់ថា កាលពីថ្ងៃពុធទី ២១ ខែធ្នូ ឆ្នាំ ២០១១ ឯកឧត្តមឧបនាយករដ្ឋមន្រ្តី ទៀ បាញ់ រដ្ឋមន្រ្តីការពារជាតិ និង ឯកឧត្តម យុទ្ធសក្ដិ សាស៊ីប្រាផា រដ្ឋមន្រ្តីការពារជាតិថៃ បានជួបប្រជុំគ្នានៅក្នុងកិច្ចប្រជុំលើកទី ៨ នៃគណៈកម្មាធិការព្រំដែនទូទៅកម្ពុជា-ថៃ ហៅកាត់ថា GBC ដែលបានប្រារព្ធធ្វើនៅក្នុង រាជធានីភ្នំពេញនៃប្រទេសកម្ពុជាដែលក្នុងកិច្ចប្រជុំនោះ ភាគីទាំងពីរបានឯកភាពគ្នាលើបញ្ហាជាច្រើនចំណុច ពិសេសគឺបានសន្យាអនុវត្តឲ្យបានពេញលេញ និង ជាបន្ទាន់តាមសាលដីការបស់តុលាការយុត្តិធម៌អន្តរជាតិ ។
បន្ទាប់ពីសំណើរបស់កម្ពុជាតុលាការយុត្តិធម៌អន្តរជាតិ កាលពីថ្ងៃទី១៨ ខែកក្កដា ឆ្នាំ២០១១ បានសម្រេចជាច្រើនចំណុច ក្នុងនោះរួមមានទាំងការបង្គាប់ឲ្យកម្ពុជា និង ថៃ ធ្វើការដក ជាបន្ទាន់នូវបុគ្គលិក យោធាដែលមានវត្តមាននៅក្នុងតំបន់គ្មានយោធាជាបណ្តោះអាសន្នទប់ស្កាត់ មិនឲ្យមានវត្តមានយោធាក្នុងតំបន់នោះ និង មិនឲ្យមានសកម្មភាពប្រដាប់អាវុធណាមួយតម្រង់ទៅ កាន់តំបន់នោះឡើយ។
លើសពីនេះទៅទៀត តុលាការយុត្តិធម៌អន្តរជាតិក៏បានសម្រេចឲ្យភាគីទាំងពីរត្រូវបន្តសហ ប្រតិបត្តិការ ដែលពួកគេបានព្រមព្រៀងនៅក្នុងក្របខ័ណ្ឌអាស៊ានដែលឥណ្ឌូនេស៊ីត្រូវវេនធ្វើជា ប្រធានអាស៊ាន នៅក្នុងឆ្នាំ ២០១១នោះ និង ជាពិសេសអនុញ្ញាតឲ្យអ្នកសង្កេតការណ៌ដែលត្រូវបានតែងតាំងដោយអង្គការនេះ ឲ្យចូលទៅកាន់តំបន់គ្មានយោធាជាបណ្តោះអាសន្ន៕
No comments:
Post a Comment