ក្រុមហ៊ុនវិនិយោករបស់កូរ៉េមានបំណងចង់វិនិយោគលើវិស័យធនធានរ៉ែ និងថាមពលនៅព្រះរាជាណាចក្រកម្ពុជា
ថ្ងៃទី២៦-០១-២០១២: ដកស្រង
bayontv.com
ភ្នំពេញ៖ នៅក្នុងជំនួបជាមួយសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណា
ចក្រកម្ពុជា នៅវិមានសន្តិភាពទីស្តីការនាយករដ្ឋមន្ត្រី កាលពីព្រឹកថ្ងៃទី២៦ ខែមករានេះ ឯកឧត្តម ជេយុន ហ៊្សិន (JAE YUN SHIN) ឯកអគ្គរដ្ឋទូត សំរាប់កិច្ចសហប្រតិបត្តិការលើវិស័យថាមពល រ៉ែ និងលោហធាតុ នៃសាធារណរដ្ឋកូរ៉េ បានគោរពជំរាបជូនសម្តេចតេជោនាយករដ្ឋមន្ត្រីថា ដំណើរទស្សនកិច្ចរបស់ឯកឧត្តមមកកាន់ព្រះរាជាណាចក្រកម្ពុជានាពេលនេះ ដើម្បីបញ្ជាក់អំពីបំណងរបស់កូរ៉េ ដែលចង់ចូលរួមក្នុងការអភិវឌ្ឍលើវិស័យធនធានរ៉ែ និងប្រេងកាតនៅកម្ពុជា។ឯកឧត្តមបានគោរពជំរាបជូនសម្តេចទៀតថា កូរ៉េបានសិក្សាអំពីធនធានរ៉ែ នៅក្នុងខេត្តព្រះវិហារ ខេត្តតាកែវ និងខេត្តកំពង់ស្ពឺ ហើយនៅពេលដែលធ្វើការសិក្សាចប់ ឯកឧត្តមសូមគោរពសុំការអនុញ្ញាតដ៏ខ្ពង់ខ្ពស់ពីសម្តេចតេជោនាយក រដ្ឋមន្ត្រី ដើម្បីគាំទ្រអោយក្រុមហ៊ុនកូរ៉េ និងបានធ្វើអាជីវកម្មនៅក្នុងតំបន់ខាងលើនេះ។ ជាងនេះដែរ ឯកឧត្តមក៏បានស្នើសុំសម្តេចអគ្គមហាសេនាបតីតេជោ មេត្តាគាំទ្រការសហការរបស់ក្រុមហ៊ុនកូរ៉េជាមួយដៃគូកម្ពុជា ដើម្បីធ្វើអោយការរុករកធ្វើអាជីវកម្មលើធនធានរ៉ែនៅក្នុងព្រះរាជា ណាចក្រកម្ពុជាទទួលបានជោគជ័យ។ នេះគឺជាការបញ្ជាក់ប្រាប់អ្នកយកព័ត៌មានពីសំណាក់ឯកឧត្តម អៀង សុល្លែត ជំនួយការផ្ទាល់សម្តេចតេជោនាយករដ្ឋមន្ត្រី បន្ទាប់ពីជំនួបត្រូវបានបញ្ចប់។មានប្រសាសន៍ឆ្លើយតប សម្តេចតេជោ ហ៊ុន សែន បានស្វាគមន៍ចំពោះបំណងដែលក្រុមហ៊ុនកូរ៉េចាប់ដៃគូជាមួយក្រុមហ៊ុន កម្ពុជា ក្នុងការរុករក និងធ្វើអាជីវកម្មធនធានរ៉េ នៅក្នុងព្រះរាជាណាចក្រកម្ពុជា។ ពាក់ព័ន្ធទៅនឹងវិស័យថាមពល សម្តេចតេជោនាយករដ្ឋមន្ត្រី បានជំរាបជូនអំពីកង្វះខាតរបស់កម្ពុជាលើប្រព័ន្ធ ចែកចាយថាមពល និងបានស្នើសុំអោយឯកឧត្តម ជេយុន ហ៊្សិន ពាំនាំនូវការផ្តាំផ្ញើពីសម្តេច ជូនចំពោះឯកឧត្តមប្រធានាធិបតី លីម្យុងបាក់ និងសូមអោយឯកឧត្តមប្រធានាធិបតី លីម្យុងបាក់ មេត្តាពិនិត្យផ្តល់កម្ចីដល់កម្ពុជា សំរាប់យកមកប្រើប្រាស់សាងសង់បណ្តាញចែកចាយអគ្គិសនី។ ពាក់ព័ន្ធទៅនឹងបញ្ហាប្រេងកាត សម្តេចតេជោបានណែនាំអោយឯកឧត្តម ជេយុន ហ៊្សិន បន្តសហការពិភាក្សាជាមួយអាជ្ញាធរប្រេងកាតកម្ពុជា៕
No comments:
Post a Comment