ខេត្តកំពត ៖ មានឧប្បត្តិហេតុ២នៃគ្រោះថ្នាក់ចរាចរណ៍ ដែលបានកើត
ឡើងក្នុងពេលតែមួយដែលករណីទី១បានកើតឡើងវេលា ម៉ោង១និង៤៥នាទីរសៀល ថ្ងៃទី៣ មករា ដោយរថយន្តម៉ាក HINO ប្រភេទយីឌុបកង់១៦
មួយគ្រឿងក្បាលពណ៌ខៀវ ទ្រុងពណ៌ស បានបុកម៉ូតូ C100 កូរ៉េ យ៉ាងពេញ
ទំហឹងបណ្តាលឱ្យម៉ូតូជាប់នៅក្រោមរថយន្តអូស ចម្ងាយជាង១០ម៉ែត្រ ទើបកល់ជាប់ទៅមុខលែងរួចអ្នកបើកបររថយន្តរត់គេចខ្លួន បាត់។ រីឯម្ចាស់ម៉ូតូ C100 កូរ៉េ សំណាងល្អបានខ្ទាតចេញផុតពីមុខរថយន្តគ្រាន់តែរងរបួសដៃស្តាំ តិចតួចប៉ុណ្ណោះរួចទៅមន្ទីរពេទ្យរុំរបួស ហើយត្រឡប់មកកន្លែងកើតហេតុវិញ ដើម្បីចរចាជាមួយអ្នកតំណាងម្ចាស់រថយន្ត ។
មន្ត្រីប៉ូលិសចរាចរឱ្យដឹងថា តាមសម្តីជនរងគ្រោះជាម្ចាស់ម៉ូតូបានប្រាប់ថា គាត់ឈ្មោះសុខ ខុន ភេទប្រុស អាយុ៤៨ឆ្នាំ ជាកសិកររស់នៅភូមិមាត់ពាម ឃុំម៉ាក់ប្រាង្គ ស្រុកទឹកឈូ បានជិះម៉ូតូ C100 កូរ៉េ ពណ៌ក្រហម ក្នុងគោលដៅពីជើងទៅត្បូងលើកំណាត់ផ្លូវជាតិលេខ៣ ។ លុះដល់ចំណុចខាងជើងស្ពានព្រះពន្លាចម្ងាយ៣០ម៉ែត្រ គាត់បើកភ្លើងស៊ីញ៉ូ បត់ឆ្វេងបម្រុងចូលចាក់សាំងក៏ស្រាប់តែរថយន្តយីឌុបបើកមក ពីត្បូងបានបុកពេញទំហឹងបណ្តាលឱ្យគាត់ខ្ទាតចេញផុតកង់ រថយន្តមកកណ្តាលថ្នល់ រីឯម៉ូតូចូលក្រោមរថយន្តអូសជាង១០ម៉ែត្រ ទើបឈប់ ។
ក្រោយពីកើតហេតុខ្លួនបានជិះម៉ូតូមួយទៀត ទៅមន្ទីរពេទ្យខ្លួនឯង ដើម្បីរុំរបួស ។ ប្រភពបន្តថា ពេលរុំរបួសរួចម្ចាស់ម៉ូតូបានមកជួបជាមួយសមត្ថកិច្ចប៉ូលិស ចរាចរ និងតំណាងម្ចាស់រថយន្តក្រោយមកភាគីទាំងពីរបានចរចាគ្នាឱ្យភាគី ខាងរថយន្តជួយចេញប្រាក់២៥០ដុល្លារ សម្រាប់ព្យាបាល និងធ្វើម៉ូតូ ដើម្បីបញ្ចប់បញ្ហា ។
ករណីមួយទៀត បានកើតឡើងនៅវេលាម៉ោង១និង៤៥នាទី រសៀល ក្នុងថ្ងៃដដែលនៅខាងជើងកន្លែងកើតហេតុរថយន្តបន្តបុកម៉ូតូ ចម្ងាយ៣០ម៉ែត្រពីគ្នា ដោយមានម៉ូតូពីរគ្រឿងបើកស្របទិសគ្នាគឺម៉ូតូមុខម៉ាកគុប ៧០ ពណ៌ស្លែ ឌុបគ្នាពីរនាក់បើកបរដោយឈ្មោះពៅ រដ្ឋា ភេទប្រុស អាយុ២២ឆ្នាំ ជាកម្មករសត្តឃាតក្រុងកំពត ។ ម៉ូតូដែលបើកពីក្រោយម៉ាកសេ ១២៥ ពណ៌ខ្មៅ សេ៊រី២០១០ ជិះគ្នាបួននាក់ បើកបរដោយឈ្មោះម៉េង សំណាង ភេទប្រុស អាយុ២០ឆ្នាំ ជាកសិករ ស្រុកកំណើតនៅស្រុកទឹកឈូ ជូនប្អូន ជីដូនមួយទៅផ្ទះនៅខេត្តកែប ។ លុះមកដល់ចំណុចកើតហេតុ ដោយសារម៉ូតូម៉ាកគុប៧០ដែលបើកពីមុខមិនពាក់មួកសុវត្ថិភាព ចៃដន្យឃើញនៅពីមុខចម្ងាយប្រហែលជាង៣០ម៉ែត្រ មានម៉ូតូនិងរថយន្តដែលបុកគ្នានោះឈប់នៅខាងស្តាំដៃ ដោយមានទាំងប៉ូលិស កំពុងពិនិត្យហេតុការណ៍ផងអ្នកបើកម៉ូតូគុបនឹកស្មានថា ប៉ូលិសចាំចាប់អ្នកជិះម៉ូតូអត់ពាក់មួកសុវត្ថិភាពក៏ ស្លន់ស្លោបត់ម៉ូតូត្រឡប់ក្រោយទាំងប្រថុចញ៉ុញ ដើម្បីគេចពីប៉ូលិសក៏ពន្លះម៉ូតូដែលបើកមកពីក្រោយធុន C125 យ៉ាងពេញទំហឹងបណ្តាលឱ្យអ្នកជិះនៅលើម៉ូតូទាំងបួននាក់រង របួសធ្ងន់ម្នាក់ និងស្រាលបីនាក់ ចំណែកម៉ូតូដែលបង្កហេតុព្រមទាំងអ្នកជិះទាំងពីរពុំមានរបួស និងខូចខាតម៉ូតូទេ ។
អ្នករងរបួសស្រាលបីនាក់ខាងម៉ូតូសេ១២៥ ស៊េរីឆ្នាំ២០១០ ១-ឈ្មោះម៉េង សំណាង ភេទប្រុស អាយុ២០ឆ្នាំ អ្នកបើក ២-ឈ្មោះផេង ខឿន ភេទស្រី អាយុ១៨ឆ្នាំ របួសស្រាល មានទីលំនៅភូមិកែវក្រសាំង សង្កាត់កែបក្រុងកែប ខេត្តកែប ៣-ឈ្មោះស ភិន ភេទប្រុស អាយុ១២ឆ្នាំ ជាសិស្ស មានទីលំនៅភូមិដុះ ឃុំជុំគ្រៀល ស្រុកទឹកឈូ រងរបួសស្រាល និងកុមារាម្នាក់ឈ្មោះប៊ី អាយុ៥ឆ្នាំ រងរបួសធ្ងន់ ត្រូវក្បាលហូរឈាមតាមច្រមុះត្រូវបានបងប្អូនយកទៅសង្គ្រោះនៅ មន្ទីរពេទ្យកំពត ។
ក្នុងហេតុការណ៍គ្រោះថ្នាក់ទាំងពីរករណីនេះ ខូចម៉ូតូ C100 កូរ៉េទាំងស្រុងមួយគ្រឿង ប៉ុន្តែប្រភពពីអ្នករងគ្រោះបានឱ្យដឹងថា ពួកគាត់ទាំងសងខាងបានសម្រួលគ្នានៅមុខសមត្ថកិច្ចបញ្ចប់រឿង នេះអស់ហើយ ។ ចំណុចកើតហេតុទាំងពីរករណីគឺនៅលើកំណាត់ផ្លូវជាតិលេខ៣ កំពត់-ភ្នំពេញ ក្នុងភូមិព្រៃត្នោត ឃុំកំពង់ក្រែង ស្រុកទឹកឈូ ៕
No comments:
Post a Comment