រន្ទះបាញ់មនុស្ស៤នាក់សន្លប់ពេលភ្លៀងរលឹម
ផ្សាយថ្ងៃទី០៧-១១-២០១១: ដកស្រង kohsantepheapdaily
ខេត្តកំពត ៖ ក្រោយពី មានភ្លៀងធ្លាក់មួយមេយ៉ាងធំរួចមក មានមនុស្ស៤នាក់ ខណៈកំពុងអង្គុយជជែកគ្នាលេងនៅក្នុងតូបលក់នំមួយ ត្រូវរន្ទះបាញ់រហូតសន្លប់នៅនឹងកន្លែង។ ហេតុការណ៍នេះបានកើតឡើងនៅវេលាម៉ោង៣និង១៥នាទីរសៀលថ្ងៃទី៦ វិច្ឆិកា នៅត្រង់ចំណុចតូបលក់នំក្នុងផ្សារអូរដងសន្ទូច ស្ថិតក្នុងភូមិត្រពាំងស្តៅ ឃុំត្រពាំងភ្លាំង ស្រុកឈូក ។
យោងតាមប្រភពព័ត៌មានពីសមត្ថកិច្ចកងរាជអាវុធហត្ថខេត្ត ដែលប្រចាំការនៅទីនោះបានឱ្យដឹងថា ក្រោយពីភ្លៀងធ្លាក់មួយមេយ៉ាងធំហើយមានរលឹមតិចៗមិនទាន់ដាច់គ្រាប់នោះ គេឃើញមនុស្ស៤នាក់ចាស់ក្មេង ប្រុស២នាក់ ស្រី២នាក់ កំពុងអង្គុយហូបនំនៅក្នុងតូបលក់មួយ ក៏ស្រាប់តែឮស្នូររន្ទះលាន់កក្រើកដី និងមានផ្សែងហ៊ុយទ្រលោមផង ហើយមនុស្សទាំង៤នាក់នៅក្នុងតូបសន្លប់រណូករណែល។ គ្រាន់តែឃើញហេតុការណ៍នេះភ្លាម ក្រុមគ្រួសារជនរងគ្រោះក៏បានទៅហៅអាចារ្យ និងនិមន្តព្រះសង្ឃមក ដើម្បីរៀបចំពិធីបុណ្យ ស្រាប់តែជនរងគ្រោះម្នាក់ដឹងខ្លួនវិញ រីឯ៣នាក់ទៀតនៅសន្លប់ដដែល ទើបក្រុមគ្រួសារនាំទៅសង្គ្រោះនៅពេទ្យឯកជនក្បែរនោះទាំង៤នាក់។
អ្នករងគ្រោះទាំង៤នាក់មាន ១-ឈ្មោះឃាង សារុន អាយុ៤១ឆ្នាំ ជាកសិករ ត្រូវជាប្តី និងឪពុក ២-ឈ្មោះម៉ូក មុំ អាយុ៣៦ឆ្នាំ ជាប្រពន្ធ និង៣-ឈ្មោះឃាង សាមឌី ភេទប្រុស អាយុ១១ឆ្នាំ ជាកូន និង៤-ឈ្មោះជិន ស្រីលក្ខណា ភេទស្រី អាយុ១៩ឆ្នាំ ជាម្ចាស់តូប អ្នកលក់នំ អ្នកទាំង៤នាក់រស់នៅភូមិ-ឃុំកើតហេតុខាងលើ ៕
No comments:
Post a Comment