ការនាំចេញសរុបរបស់កម្ពុជាកើន៤០%
ផ្សាយថ្ងៃទី២៥-១១-២០១១: ដកស្រង postkhmer
ភ្នំពេញៈ ការនាំចេញសរុបរបស់កម្ពុជា កើនជាង៤០ភាគរយ គិតត្រឹមខែតុលាឆ្នាំ
នេះ។ ការកើនឡើងនេះ បានមកពីកំណើនដ៏ខ្លាំងក្លាក្នុងការនាំចេញផលិតផលកសិកម្ម ដែលបានកើនឡើងជាងទ្វេដង។
ការនាំចេញសរុបបានកើនឡើងដល់៤,០៥ពាន់លានដុល្លារនៅចន្លោះខែ មករា និងតុលា បើធៀបនឹងរយៈពេលដូចគ្នា កាលពីឆ្នាំមុន ដែលមានត្រឹមតែ ២,៨២២ពាន់លានដុល្លារប៉ុណ្ណោះ។ នេះបើតាមទិន្នន័យទទួលបានពីក្រសួងពាណិជ្ជកម្ម។
ទិន្នន័យ បានបង្ហាញថា ការនាំចេញផលិតផលកសិកម្ម បានកើនឡើងដល់ ៣៣០លានដុល្លារ។ តួលេខនេះបានកើនឡើងជាង១០០ភាគរយ បើធៀបនឹងរយៈពេល ១០ខែដំបូង ឆ្នាំ២០១០។
ការនាំចេញសម្លៀកបំពាក់ ក្នុងរយៈពេលនេះ មានតម្លៃ ៣,៤៧ពាន់លានដុល្លារ គឺកើនឡើងប្រហែល៣៤ភាគរយ។
ទិន្នន័យក្រសួងពាណិជ្ជកម្ម បានឲ្យដឹងថា ការអនុគ្រោះពាណិជ្ជកម្មដែលក្នុងនោះរាប់បញ្ចូលទាំងការលើកលែងពន្ធ ផងដែរនោះ បានធ្វើឲ្យការនាំចេញសម្លៀកបំពាក់ទៅកាន់សហភាពអឺរ៉ុបបានកើនឡើង ៦០ភាគរយ។
ទិន្នន័យបានបង្ហាញថា ការនាំចេញសម្លៀកបំពាក់ទៅអាមេរិក កើនឡើងប្រហែល ១០ភាគរយ ពោលគឺកើនឡើងរហូតដល់ ១,៧ពាន់លានដុល្លារ នៅចុងខែតុលាឆ្នាំនេះ។
លោក ឱក ប៊ុង រដ្ឋលេខាធិការក្រសួងពាណិជ្ជកម្ម បានឲ្យដឹងកាលពីម្សិលមិញថា កំណើននេះ បានមកពីការអនុគ្រោះពាណិជ្ជកម្មនៅអឺរ៉ុប ស្របនឹងការទទួលបានទីផ្សារថ្មីនៅចិន និងជប៉ុនផងដែរ ដែលធ្វើឲ្យកំណើននាំចេញរបស់កម្ពុជា កើនឡើងក្នុងរយៈពេល១០ខែដំបូងនេះ។
លោកអះអាងថា ការនាំចេញផលិតផលកសិកម្មកាលពីពេលថ្មីៗនេះ បង្ហាញពីកំណើនឆ្ពោះទៅរកគោលដៅនាំចេញអង្កររបស់រដ្ឋាភិបាល ដែលមានចំនួន ១លានតោន នៅឆ្នាំ២០១៥។
លោកបន្តថា៖ «យើងមានឱកាសច្រើន ពោលគឺមិនមែនតែការនាំចេញសម្លៀកបំពាក់ និងវាយនភណ្ឌទៅអឺរ៉ុបប៉ុណ្ណោះទេ តែយើងថែមទាំងអាចនាំចេញផលិតផលកសិកម្ម ទៅកាន់ប្រទេសទាំងនោះបានផងដែរ ដោយសារយើងទទួលបានការលើកលែងពន្ធពីពួកគេ»។
លោកបន្ថែមថា៖ «បើយើងចាប់ផ្តើមនាំចេញអង្ករកាន់តែច្រើនឡើងៗ ខ្ញុំជឿជាក់ថា យើងនឹងអាចឈានដល់គោលដៅនាំចេញអង្កររបស់រដ្ឋាភិបាល»។
លោកថ្លែងថា ទុនសម្រាប់ផលិតផលកសិកម្ម នៅតែមានបញ្ហា ហើយនឹងតម្រូវឲ្យមានការចូលរួមពីក្រុមហ៊ុនវិនិយោគទាំងក្នុង ស្រុក ទាំងក្រៅស្រុក ជាពិសេសក្នុងផលិតកម្មអង្ករ។
លោក ងួន ម៉េងតិច អគ្គនាយកសភាពាណិជ្ជកម្មកម្ពុជា បានឲ្យដឹង កាលពីម្សិលមិញថា ការនាំចេញពីកម្ពុជា កំពុងផ្លាស់ប្តូរពីការនាំចេញវត្ថុធាតុដើម ទៅជាការនាំចេញទំនិញកែច្នៃវិញ។ លោកបន្តថា៖ «ជាធម្មតាយើងនាំចេញកៅស៊ូធម្មជាតិ ប៉ុន្តែឥឡូវ យើងអាចនាំចេញអង្ករ ដំឡូងមី និងទំនិញផ្សេងៗទៀត»។ លោកបន្ថែមថា សមត្ថភាពកែច្នៃរបស់កម្ពុជាចាំបាច់ត្រូវមានការពង្រឹងបន្ថែម។
លោកងួន ម៉េងតិច បានមានប្រសាសន៍ទៀតថា ការគាំទ្រពីរដ្ឋាភិបាលក្នុងការកាត់បន្ថយឯកសារការងារ និងថ្លៃសេវាមិនចាំបាច់បានធ្វើឲ្យបរិយាកាសវិនិយោគនៅប្រទេសកម្ពុជា កាន់តែទាក់ទាញ៕
No comments:
Post a Comment