កម្ពុជានៅតែប្រឈមនឹងកង្វះហិរញ្ញប្បទានសម្រាប់វិស័យផលិត និងកសិកម្ម
ផ្សាយថ្ងៃទី០៨-១១-២០១១: ដកស្រង postkhmer
ភ្នំពេញៈ ទោះបីអង្គការពាណិជ្ជកម្មពិភពលោក(WTO) បានស្ងើចសរសើរដល់ការរីកចម្រើននៃសេដ្ឋកិច្ចកម្ពុជា ចាប់តាំងពីប្រទេសនេះបានចូលរួមជាមួយ WTO តាំងពីឆ្នាំ២០០៤ មកក៏ដោយ ប៉ុន្តែកង្វះហិរញ្ញវត្ថុសម្រាប់វិស័យពាណិជ្ជកម្ម ដែលកំពុងតែរីកចម្រើនរបស់កម្ពុជា បានធ្វើឲ្យមានការលើកឡើងអំពីបញ្ហានេះ រវាងមន្ត្រីរដ្ឋាភិបាល និង WTO ក្នុងកិច្ចពិភាក្សាមួយស្តីពីការពិនិត្យវាយតម្លៃរបស់ WTO មកលើគោលនយោបាយពាណិជ្ជកម្មលើកដំបូងរបស់កម្ពុជា។
លោក ចម ប្រសិទ្ធ រដ្ឋមន្ត្រីក្រសួងពាណិជ្ជកម្មបានឲ្យដឹងក្នុងអំឡុងបទបង្ហាញស្តី ពីការពិនិត្យវាយតម្លៃគោលនយោបាយពាណិជ្ជកម្មរបស់កម្ពុជា ចេញផ្សាយកាលពីពេលថ្មីៗនេះថា កម្ពុជាខ្វះសមត្ថភាពក្នុងការស្វែងរកហិរញ្ញវត្ថុសម្រាប់រោងចក្រ ផលិត និងការនាំចេញផលិតផលកសិកម្ម ដែលវិស័យទាំងពីរនេះអាចជួយលើកកម្ពស់ឧស្សាហកម្មកម្ពុជាដល់ កម្រិតផលិតកម្មខ្ពស់។
លោកថ្លែងថា៖ «យើងនៅមានកង្វះលំហូរសាច់ប្រាក់ពីធនាគារពាណិជ្ជ និងពីគ្រឹះស្ថានហិរញ្ញវត្ថុផ្សេងៗទៀត។ យើងមានការធានាជាច្រើនសម្រាប់ធ្វើពាណិជ្ជកម្ម ប៉ុន្តែមិនមានប្រាក់គ្រប់គ្រាន់សម្រាប់អនុវត្តសកម្មភាពទាំងនោះ»។
លោក ចម ប្រសិទ្ធ បានឲ្យដឹងទៀតថា ឈ្មួញទិញលក់ អង្ករ ពោត និងដំឡូងមី ខ្វះទុនក្នុងការកែច្នៃផលិតផលបន្ថែមតម្លៃ ដែលនៅបរទេសបានធ្វើសម្រេចលើការងារនេះរួចទៅហើយ។
លោកបន្តថា ការនាំចេញអង្ករ២លានតោន ត្រូវការដើមទុនប្រហែល១ពាន់លានដុល្លារសម្រាប់ទិញស្រូវ កែច្នៃ និងនាំចេញ។ ធនធានពីធនាគារក្នុងស្រុក នៅមានការខ្វះខាត ពោលគឺមានចំនួនប្រហែល ៣០០លានដុល្លារប៉ុណ្ណោះ។
កាលពីខែមុន លោករដ្ឋមន្ត្រីក្រសួងពាណិជ្ជកម្មអះអាងថា កម្ពុជាបាននាំចេញស្រូវជាង២លានតោននៅឆ្នាំនេះ។
អ្នកជំនាញខាងស្រូវអង្ករ បានឲ្យដឹងថា ទិន្នផលស្រូវបានកើនឡើងជាង៤ភាគរយ បើធៀបនឹងឆ្នាំមុន។
លោក វ៉ាន់ ស៊ូអៀង ប្រធានសមាគមរោងចក្រកាត់ដេរនៅកម្ពុជា បានឲ្យដឹងថា កង្វះហិរញ្ញវត្ថុបានរាំងស្ទះដល់វិស័យកាត់ដេរនៅកម្ពុជាផងដែរ។ កម្លៃនាំចេញប្រចាំឆ្នាំក្នុងឧស្សាហកម្មនេះ មានចំនួនប្រហែល ៣ពាន់លានដុល្លារ ជិតស្មើនឹងកម្ចីរបស់ធនាគារពាណិជ្ជ នៅកម្ពុជា។ ការណ៍នេះ បានធ្វើឲ្យខ្វះការធានារ៉ាប់រង និងការផ្តល់ហិរញ្ញប្បទានលើការធ្វើពាណិជ្ជកម្មក្នុងស្រុក។
នៅពេលមានកង្វះហិរញ្ញវត្ថុក្នុងស្រុក ធនាគារពិភពលោក និងធនាគារនាំចេញ-នាំចូលអាមេរិក មិនបានផ្តល់ជំនួយដល់ឧស្សាហកម្មនេះឡើយ ទោះបីមានការខិតខំបញ្ចុះបញ្ចូលយ៉ាងណាក្តី។
លោក វ៉ាន់ ស៊ូអៀង បានឲ្យដឹងថា៖ «អ្វីដែលពួកគេចាំបាច់ត្រូវធ្វើ គឺពិនិត្យមើលតម្លៃរបស់អ្នកទិញ ដូចជា Gap, Levis ហើយបញ្ចុះតម្លៃឲ្យពួកយើង។ ចំពោះការងារងាយស្រួលដូច្នេះ ពួកគេនៅតែមានបញ្ហា។ ខ្ញុំមិនដឹងថាជាបញ្ហាអ្វីឡើយ»។
របាយការណ៍របស់ WTO ស្តីពីគោលនយោបាយពាណិជ្ជកម្មរបស់កម្ពុជា ចេញផ្សាយកាលពីសប្តាហ៍មុន បង្ហាញថា កង្វះហិរញ្ញវត្ថុពីបរទេស អាចមានទំនាក់ទំនងទៅនឹងកំណើនពលកម្ម ជម្លោះដីធ្លី និងកង្វះបទប្បញ្ញត្តិ។
កាលពីដើមខែសីហា ធនាគារពិភពលោក បានបញ្ឈប់ការផ្តល់ជំនួយជាថ្មីដល់កម្ពុជាព្រោះតែជម្លោះដីធ្លីនៅបឹងកក់។
លោក វ៉ាន់ ស៊ូអៀង បានប្រាប់ភ្នំពេញ ប៉ុស្តិ៍ កាលពីម្សិលមិញថា ម្ចាស់រោងចក្រកាត់ដេរ ទទួលបានការគាំទ្រ ជាច្រើនពីក្រុមហ៊ុនមេនៅហុងកុង តៃវ៉ាន់។ លោកបន្ថែមថា ក្រុមហ៊ុនតូចៗក្នុងស្រុក ដែលគ្មានទំនាក់ទំនងជាមួយបរទេស ប្រឈមនឹងកង្វះការធានារ៉ាប់រង និងហិរញ្ញប្បទានសម្រាប់ធ្វើពាណិជ្ជកម្ម៕
No comments:
Post a Comment