ប្រជាពលរដ្ឋស្រុកបន្ទាយមាស២០៨៤គ្រួសារបន្ថែម បានទទួលអំណោយពីកាកបាទក្រហមកម្ពុជា
ផ្សាយថ្ងៃទី១៩-១០-២០១១: ដកស្រង bayontv
កំពត៖ កាលពីថ្ងៃទី១៨ ខែតុលា ឯកឧត្តម មាន ចាន់យ៉ាដា នាយកនាយកដ្ឋានធនធានមនុស្សកាកបាទក្រហមកម្ពុជា និងឯកឧត្តមពិត ចំណាន សមាជិកគណៈកម្មាធិការកណ្តាលកាកបាទក្រហមកម្ពុជា បាននាំអំណោយកាកបាទក្រហមកម្ពុជា ទៅចែកជូនប្រជាពលរដ្ឋកំពុងជួបការគ្រោះទឹកជំនន់ទឹក នៅស្រុកបន្ទាយមាស ខេត្តកំពត។
អំណោយនេះបានរៀបចំចែកនៅទីទួលសាលាបឋមសិក្សាបន្ទាយមាសខាងលិច មានប្រជាពលចំនួន៧២៥គ្រួសារមកពី ឃុំបន្ទាយមាសខាងលិចដែលក្នុងមួយគ្រួសារទទួលបានអង្កររាជរដ្ឋាភិបាលកម្ពុជា ២៥គីឡូក្រាម និងអំណោយកាកបាទក្រហមកម្ពុជា មាន ត្រីខ មុង ភួយ ក្រមា សារ៉ុង។
លោក អ៊ឹង ម៉េងហួរ អភិបាលរងខេត្តកំពតបានឲ្យដឹងថា ខេត្តកំពត មានស្រុកចំនួន២
មានស្រុកបន្ទាយមាស និងស្រុកកំពង់ត្រាច បានទទួលរងការគ្រោះទឹកជំនន់ហូរចេញពីព្រែកវិញតេ ប្រទេសវៀតណាមដែលបណ្តាលឲ្យខូចផ្លូវលំ៩ខ្សែ សាលារៀន១៣ខ្នង ផ្ទះប្រជាពលរដ្ឋ១៥៨៣ខ្នង ផ្ទៃដីរងការប៉ះពាល់៧៧០៩ហិកតា និងដីស្រែ២៨៦ហិកតាបានខូចខាតទាំងស្រុង ព្រមទាំងមានប្រជាពលរដ្ឋរងគ្រោះចំនួន៥២២០នាក់។គិតមកដល់ថ្ងៃនេះ មានគ្រួសារជន្លៀសមករកទីទួលសុវត្ថិភាព មានចំនួន៧៦៧គ្រួសារ ។ដោយឡែកស្រុកបន្ទាយមាសមានប្រជាពលរដ្ឋចំនួន៣៤៧២
គ្រួសារ បានទទួលការរងគ្រោះដោយទឹកជំនន់ ។
ឯកឧត្តម ពិត ចំណាន បានសំដែងការព្រួយបារម្ភយ៉ាងខ្លាំងចំពោះសុខទុក្ខប្រជាពលរដ្ឋដែលកំពុងជួបគ្រោះទឹកជំនន់នាពេលនេះ។ឯកឧត្តម បន្តថា ទុក្ខលំបាកដែល
បងប្អូនជួបលំបាកនាពេលនេះ គឺជាទុក្ខលំបាករបស់រាជរដ្ឋាភិបាលកម្ពុជា ពិសេសសម្តេចតេជោ ហ៊ុន សែន និងក៏ជាទុក្ខលំបាករបស់លោកជំទាវកិត្តិព្រឹទ្ធបណ្ឌិត ប្រធានកាកបាទក្រហមកម្ពុជា។នៅថ្ងៃដដែលនេះដែរ កាកបាទក្រហមកម្ពុជា បាននាំអំណោយទៅចែកជូនគ្រួសារពលរដ្ឋរងគ្រោះ នៅវត្តបន្ទាយមាស ចំនួន៣០០គ្រួសារ និងឃុំស្តេចគង់ខាងជើងចំនួន១០៦១គ្រួសារ។
គួរបញ្ជាក់ថា ក្នុងសម្មភាពមនុស្សធម៌ជួយដល់ប្រជាពលរដ្ឋរងគ្រោះដោយទឹកជំនន់នៅខេត្តកំពត កាកបាទក្រហមកម្ពុជា ដែលមានលោកជំទាវកិត្តិព្រឹទ្ធបណ្ឌិតប៊ុន រ៉ានីហ៊ុន សែន ជាប្រធាននិងនាមរាជរដ្ឋាភិបាលកម្ពុជា បានត្រៀមអំណោយ មានអង្ករ ១១៧តោន ត្រីខ ៤៦៩កេស សារ៉ុង ក្រមា មុង ភួយ ចំណាយអស់ថវិកាសរុប ប្រមាណជាង១៤ម៉ឺន១៥២៩ដុល្លាអាមេរិក ដើម្បីចែកគ្រួសាររងគ្រោះចំនួន ៤៦៩១គ្រួសារនៅទូទាំងខេត្តកំពត៕
No comments:
Post a Comment