កម្ពុជាគ្រោងបញ្ចេញអង្ករ២០០០តោន ដើម្បីទប់ស្កាត់តម្លៃ
ផ្សាយថ្ងៃទី១៨-១០-២០១១: ដកស្រង postkhmer
ភ្នំពេញៈ សម្ព័ន្ធសមាគមរោងម៉ាស៊ីនស្រូវកម្ពុជា មានផែនការបញ្ចេញអង្ករលក់ឲ្យបានជាង២ពាន់តោននៅក្នុងរយៈពេល ប៉ុន្មានសប្តាហ៍នេះ ខណៈអង្ករ ៤០០តោនត្រូវបានបញ្ចេញលក់រួចទៅហើយ ដើម្បីទប់ស្កាត់ការកើនឡើងតម្លៃអង្ករ។
ផែនការនេះ ធ្វើឡើងបន្ទាប់ពីរដ្ឋាភិបាល បានបញ្ជាឲ្យភាគីពាក់ព័ន្ធក្នុងឧស្សាហកម្មផលិតអង្ករកម្ពុជា បញ្ចេញអង្ករមកក្នុងទីផ្សារ ដើម្បីទប់ស្កាត់តម្លៃអង្ករ ដែលកំពុងតែឡើងថ្លៃ ខណៈទឹកជំនន់កំពុងបំផ្លិចបំផ្លាញដំណាំស្រូវរាប់ម៉ឺនហិកតា។
លោក ភូ ពុយ ប្រធានសម្ព័ន្ធសមាគមរោងម៉ាស៊ីនកិនស្រូវកម្ពុជា បានថ្លែងក្នុងសន្និសីទកាសែតមួយ កាលពីល្ងាចថ្ងៃអាទិត្យថា អង្ករដែលសម្ព័ន្ធត្រៀមបញ្ចេញលក់នៅរយៈពេលនេះនឹងមានបរិមាណជាង ២ ពាន់តោន ហើយដំណើរការនេះនឹងប្រព្រឹត្តទៅរហូតដល់តម្លៃអង្ករនៅលើទីផ្សារ មានលំនឹងឡើងវិញ។ លោកបញ្ជាក់ថា៖ «យើងបានចែកចាយតាមស្តង់លក់ចំនួន៦កន្លែងនៅរាជធានីភ្នំពេញ ជាមួយតម្លៃក្រោមទីផ្សារបន្តិចបន្តួច ហើយការលក់នេះគឺយើងធ្វើឡើងដើម្បីកុំឲ្យអង្ករឡើងថ្លៃបន្តទៀត»។
លោកបានបន្តទៀតថា អង្ករដែលត្រូវបានដាក់លក់នៅស្តង់ទាំង៦នេះ មានជាច្រើនប្រភេទ ដែលក្នុងនោះ ប្រភេទអង្ករនាងមិញ១០០គីឡូក្រាមថ្លៃ ២៣៣ ០០០រៀល អង្ករនាងខុន១០០គីឡូក្រាម ថ្លៃ ២៤៦ ០០០រៀល អង្ករផ្កាខ្ញី ថ្លៃ ២៧០ ០០០ រៀល និង អង្ករផ្កាម្លិះស្រូវថ្មី បាក់៥ភាគរយ ១០០គីឡូក្រាម ថ្លៃ១០០ដុល្លារ។
លោកថ្លែងថាប្រជាពលរដ្ឋមិនត្រូវមានការព្រួយនឹងការកង្វះអង្ករឡើយ ព្រោះសព្វថ្ងៃនេះ ស្រូវស្រាលកំពុងប្រមូលផល ហើយស្រូវវស្សាបាននិងកំពុងចាប់ផ្តើមប្រមូលផលនៅមួយខែខាងមុខ។
ប្រធានសម្ព័ន្ធសមាគមរូបនេះបានអះអាងដែរថា បើទោះបីជាប្រទេសកម្ពុជាទទួលរងនូវគ្រោះទឹកជំនន់ដ៏ធ្ងន់ធ្ងរ ក្តី ក៏ឧស្សាហកម្មនាំចេញអង្កររបស់កម្ពុជានៅតែមានកំណើន។
លោក ភូ ពុយ លើកឡើងថា៖ «អង្ករឡើងថ្លៃនេះបណ្តាលមកពីបងប្អូនមួយចំនួនសម្រុកទិញអង្ករទុកដោយភ័យខ្លាចខ្វះអង្ករ ពេលដែលពួកគាត់ឃើញមានគ្រោះទឹកជំនន់»។
លោក សុន គន្ធរ ប្រធានអគ្គនាយកធនាគារអភិវឌ្ឍន៍ជនបទថ្លែងថា លោកនាយករដ្ឋមន្ត្រី ហ៊ុន សែន បានបញ្ជាឲ្យធនាគារអភិវឌ្ឍន៍ជនបទសហការជាមួយសម្ព័ន្ធសមាគមរោង ម៉ាស៊ីនកិនស្រូវកម្ពុជា បញ្ចេញអង្ករលក់ជាបន្ទាន់សម្រាប់ទប់ស្កាត់ការឡើងថ្លៃអង្ករដោយ សារតែគ្រោះមហន្តរាយទឹកជំនន់។
លោកបានបញ្ជាក់ថា៖ «យុទ្ធនាការនេះដែរ ខ្ញុំសង្កេតឃើញថា បងប្អូនប្រជាពលរដ្ឋយ៉ាងច្រើនបានមកសម្រុកទិញអង្ករ ដូចជានៅសាខាស្ទឹងមានជ័យ។ បើតម្រូវការចាំបាច់យើងនឹងនៅតែបន្តនាំអង្ករមកទៀត»។
លោកបានបន្តថា អង្ករឡើងថ្លៃបណ្តាលមកពីភាពភ័យខ្លាចខ្វះអង្ករនៅពេលដែលមានគ្រោះទឹកជំនន់ គោលនយោបាយដំឡើងថ្លៃស្រូវអង្កររបស់ប្រទេសជិតខាង និងវិច្ឆេទកម្មសេដ្ឋកិច្ច។
លោក សុន គន្ធរ លើកឡើងថា ការបញ្ចេញអង្ករលក់នេះនឹងមិនធ្វើឲ្យប៉ះពាល់ដល់ប្រជាពលរដ្ឋ ក្នុងស្រុក ដែលប្រកបអាជីវកម្មលក់អង្ករឡើយ ព្រោះតម្លៃនេះមានកម្រិតថ្លៃទាបជាងទីផ្សារតែបន្តិចបន្តួច ប៉ុណ្ណោះ។
យោងតាមសេចក្តីរាយការណ៍របស់ភ្នំពេញប៉ុស្តិ៍កាលពីសប្តាហ៍មុន មានម្ចាស់រោងម៉ាស៊ីនកិនស្រូវមួយចំនួនបានអះអាងថា ស្រូវសម្រាប់កែច្នៃជាអង្ករជិតអស់ពីស្តុកហើយ ខណៈឈ្មួញលក់អង្ករបានអះអាងថា ពួកគេពិបាករកទិញអង្ករសម្រាប់ផ្គត់ផ្គង់៕
No comments:
Post a Comment