កម្ពុជានិងអាមេរិកបង្កើនទំនាក់ទំនងទ្វេភាគីខាងវិស័យយោធា
ផ្សាយថ្ងៃទី៣១-០៨-២០១១
ដកស្រង
kohsantepheapdaily
ខេត្តព្រះសីហនុ ៖ តាមរយៈដំណើរទស្សនកិច្ចរបស់លោកឧត្តមសេនីយ៍ត្រី Richard Simcock នាយកទទួលបន្ទុកតំបន់អាស៊ីខាងត្បូង និងអាស៊ីអាគ្នេយ៍ក្នុងការិយាល័យរដ្ឋមន្ត្រីក្រសួងការពារជាតិ សហរដ្ឋអាមេរិក នៅប្រទេសកម្ពុជារយៈពេល៣ថ្ងៃ ចាប់ពីថ្ងៃទី២៩ ដល់៣១ សីហា ឆ្នាំ២០១១ បានបង្ហាញឱ្យឃើញទំនាក់ទំនងកាន់តែរឹងមាំនិងល្អប្រសើរខាងវិស័យយោធារវាងប្រទេសទាំងពីរកម្ពុជា-អាមេរិក។
ក្នុងដំណើរទស្សនកិច្ចនេះលោក Richard Simcock បានជួបជាមួយមន្ត្រីក្រសួងការពារជាតិកម្ពុជា និងតំណាងស្ថានទូតអាមេរិកប្រចាំកម្ពុជា ដើម្បីពិភាក្សាអំពីទំនាក់ទំនងយោធាទ្វេភាគីរវាងសហរដ្ឋអាមេរិក និងកម្ពុជា សំខាន់ការពង្រឹងទំនាក់ទំនងលើវិស័យយោធាឱ្យកាន់តែមានភាពរីកចម្រើនឡើង។ ការពិភាក្សានោះ
ផ្តោតការយកចិត្តទុកដាក់លើឱកាសនៃកិច្ចសហប្រតិបត្តិការនាពេលអនាគតក្នុងផ្នែកថែរក្សាសន្តិភាព សន្តិសុខដែនសមុទ្រ ជំនួយមនុស្សធម៌ កំណែទំរង់ក្នុងវិស័យការពារប្រទេស និងការប្រឆាំងភេរវកម្ម។
លោកឧត្តមសេនីយ៍ត្រី Simcock បានថ្លែងថា កិច្ចការបន្តរបស់ក្រសួងការពារប្រទេសអាមេរិកក្នុងការធ្វើការងារជាមួយកងយោធពលខេមរភូមិន្ទ គឺដើម្បីអភិវឌ្ឍកងទ័ពមួយប្រកបដោយវិជ្ជាជីវៈ និងរួមចំណែកដល់ស្ថិរភាព សន្តិភាពអន្តរជាតិ និងតំបន់។ ក្រសួងការពារប្រទេសសហរដ្ឋអាមេរិកសង្ឃឹមថា នឹងជួយកសាងសមត្ថភាពជំនាញរបស់កងយោធពលខេមរភូមិន្ទដោយទន្ទឹមគ្នានោះ លើកទឹកចិត្តឱ្យកងយោធពលខេមរភូមិន្ទបន្តដើរលើគន្លងផ្លូវនៃតម្លាភាព ការគោរពសិទ្ធិមនុស្ស និងអភិបាលកិច្ចល្អប្រសើរឡើង។
ក្នុងដំណើរទស្សនកិច្ចនេះផងដែរ លោកឧត្តមសេនីយ៍ត្រី Simcock កាលពីរសៀលថ្ងៃទី២៩ សីហា បានអញ្ជើញចូលរួមក្នុងពិធីសម្ពោធមណ្ឌលសុខភាពអូរឧកញ៉ាហេងស្ថិតនៅភូមិបត់គគីរ ឃុំអូរឧកញ៉ាហេង ស្រុកព្រៃនប់ ខេត្តព្រះសីហនុ ដែលបានជួសជុលរួចរាល់ជាស្ថាពរដោយកងទ័ពជើងទឹកសហរដ្ឋអាមេរិក។ ជាមួយនោះលោកបានចូលរួមក្នុងសិក្ខាសាលារបស់ក្រសួងការពារជាតិនៅក្រុងព្រះសីហនុ ដើម្បីពិភាក្សាការរៀបចំយុទ្ធសាស្ត្រសន្តិសុខដែនសមុទ្រកម្ពុជា។
ក្នុងដំណើរទស្សនកិច្ចចុងក្រោយលោក Simcock បានអញ្ជើញទៅពិនិត្យមើលទីតាំងនានាដែលបានទទួលកិច្ចសហប្រតិបត្តិការក្នុងវិស័យការពារជាតិរវាងសហរដ្ឋអាមេរិក និងកម្ពុជាក្នុងនោះរួមមានមជ្ឈមណ្ឌលហ្វឹកហ្វឺនការថែរក្សាសន្តិភាព មជ្ឈមណ្ឌលប្រតិបត្តិការសន្តិសុខដែនសមុទ្រកម្ពុជា និងកងកម្លាំងពិសេសជាតិប្រឆាំងភេរវកម្មជាដើម៕
No comments:
Post a Comment