UNDP ៖ យុវជនប្រមាណ៣០ម៉ឺននាក់មិនមានជំនាញតម្រូវតាមទីផ្សារការងារ
ថ្ងៃទី១២-០៨-២០១១
postkhmer
កម្មករជនជាតិចិនធ្វើការនៅការដ្ឋានសង់ស្ពានជ្រោយចង្វារទីពីរ។
កម្លាំងពលកម្មជំនាញរបស់ប្រជាពលរដ្ឋខ្មែរនៅខ្វះខាតច្រើន។ ជីវ័នភ្នំពេញៈ លោកស្រី Sophie Baranes នាយករងប្រចាំប្រទេសនៃកម្មវិធីអភិវឌ្ឍន៍អង្គការសហប្រជាជាតិ (UNDP) ប្រចាំនៅកម្ពុជា បានឲ្យដឹងកាលពីម្សិលមិញថា យុវជនកម្ពុជាប្រមាណជា
៣០ម៉ឺននាក់ កំពុងបោះជំហានចូលមកក្នុងទីផ្សារពលកម្មក្នុងស្រុកជារៀងរាល់ ឆ្នាំ ប៉ុន្តែអ្នកទាំងនោះភាគច្រើនមិនមានជំនាញដែលនិយោជកមកពីវិស័យឯក ជនត្រូវការឡើយ។
លោកស្រីបានបន្តថា ការលើកកម្ពស់ធនធានមនុស្សនៅកម្ពុជា ទាមទារនូវកិច្ចខិតខំប្រឹងប្រែងជារួមពីភាគីពាក់ព័ន្ធដូចជា រដ្ឋាភិបាល វិស័យឯកជន និងគ្រឹះស្ថានអប់រំនានា៖ «ដើម្បីសម្រេចបានជោគជ័យនូវការលើកកម្ពស់ធនធានមនុស្ស ចាំបាច់ត្រូវមានកម្មវិធីបណ្តុះបណ្តាលប្រកបដោយនិរន្តរភាព ឬការធ្វើកំណែទម្រង់ការអប់រំកម្រិតឧត្តមសិក្សា»។
កាលពីម្សិលមិញ UNDP សហការជាមួយរដ្ឋាភិបាល បានចេញរបាយការណ៍មួយ មានចំណងជើងថា «ទំនាក់ទំនងរវាងធនធានមនុស្សទៅនឹងកំណើនសេដ្ឋកិច្ចនៅកម្ពុជានា ពេលអនាគត» ក្នុងគោលបំណងបង្ហាញទិសដៅអនុវត្ត ដើម្បីកសាងធនធានមនុស្ស ដែលមានគុណភាពខ្ពស់ សម្រាប់ធ្វើឲ្យមានកំណើនសេដ្ឋកិច្ច។
របាយការណ៍នោះបានលើកឡើងថា៖ «បច្ចុប្បន្នតម្រូវការទីផ្សារ និងជំនាញដែលអាចរកបានមានគម្លាតខុសគ្នាយ៉ាងខ្លាំង ហើយគ្រឹះស្ថានអប់រំ និងកម្មវិធីសិក្សា ដែលមានស្រាប់ មិនបានឆ្លើយតបទៅនឹងតម្រូវការទីផ្សារ និងតម្រូវការរបស់វិស័យឯកជនឡើយ»។
លោក ហាវ រតនៈ អគ្គលេខាធិការរងនៃឧត្តមក្រុមប្រឹក្សាសេដ្ឋកិច្ចជាតិ(SNEC)បានឲ្យដឹងថា រដ្ឋាភិបាលបានផ្តល់អាទិភាពលើការអភិវឌ្ឍធនធានមនុស្ស។ លោកបញ្ជាក់ថា គោលបំណងកម្ពុជាក្នុងការអភិវឌ្ឍឧស្សាហកម្មនេះទាមទារការ អភិវឌ្ឍធនធានមនុស្សពេលដំណាលគ្នា។
ទោះបីមានការងារជាច្រើន ដែលត្រូវធ្វើបន្តទៀតក្តី ប៉ុន្តែលោក ហាវ រតនៈ បញ្ជាក់អំពីការងារ ដែលសម្រេចបានដោយរដ្ឋាភិបាលក្នុងការលើកកម្ពស់ស្ថានភាពនេះដែរ។
លោកថ្លែងថា ថវិកាអប់រំបានកើនលើស កាលពី១០ឆ្នាំមុន (ឆ្នាំ២០០០ ដល់ ឆ្នាំ២០១០) ៨ដង ហើយថា វិធានការមួយចំនួនត្រូវបានយកមកអនុវត្ត បន្ទាប់ពីមានវិបត្តិសេដ្ឋកិច្ចពិភពលោក ដើម្បីលើកកម្ពស់ការងារ។ លោកបានឲ្យដឹងថា មកដល់ពេលបច្ចុប្បន្ន កម្មវិធីទាំងនេះ បានជួយឲ្យកម្មករចំនួន៤ម៉ឺននាក់ ដែលត្រូវគេព្យួរការងារ ស្វែងរកការងារបានធ្វើវិញ។
លោកបន្តថា៖ «ការពិតនេះជាប្រការចាំបាច់សម្រាប់រដ្ឋាភិបាល ដើម្បីជួយអភិវឌ្ឍធនធានមនុស្ស តែវាត្រូវការកិច្ចសហប្រតិបត្តិការយ៉ាងទូលំទូលាយពីភាគីពាក់ ព័ន្ធ និងដៃគូអភិវឌ្ឍន៍ទាំងអស់។
របាយការណ៍បានដាក់ចេញអនុសាសន៍រយៈពេលវែងនិងខ្លីមួយចំនួនដូចជា ការបញ្ឈប់ការបោះបង់ការសិក្សារបស់កុមារ សំដៅលើកកម្ពស់ការបណ្តុះបណ្តាលជំនាញវិជ្ជាជីវៈនិងកែទម្រង់ការអប់រំឧត្តមសិក្សា៕
No comments:
Post a Comment