ដឹកថ្មចេញពីភ្នំតាម៉ុកក្រឡាប់រថយន្តធ្លាក់ក្នុងស្រែ
ថ្ងៃទី២៥-០៨-២០១១
kohsantepheapdaily
ខេត្តកំពត ៖ រថយន្តកូរ៉េទម្ងន់២តោនកន្លះមួយគ្រឿងដឹកថ្មចេញពីភ្នំតាម៉ុកបានក្រឡាប់ចាក់ថ្មចោលអស់ទៅក្នុងស្រែ កាលពីវេលាម៉ោង១និង៣០នាទីរសៀល ថ្ងៃទី២៣ សីហា នៅកំណាត់ផ្លូវជាតិលេខ៣៣ត្រង់ចំណុចភូមិដំណាក់ក្រឡាញ់ ឃុំភ្នំប្រាសាទ ស្រុកកំពង់ត្រាច។
តាមព័ត៌មានពីមន្ត្រីប៉េអឹមស្រុកបាននិយាយថា គ្រោះថ្នាក់ចរាចរណ៍នេះបង្កឡើងដោយខ្លួនឯងហើយក៏គ្មានកម្មករណាម្នាក់គ្រោះថ្នាក់ដល់អាយុជីវិតដែរ។ ប៉ុន្តែអ្វីដែលមានការខាតបង់នោះគឺសន្ទូងរបស់ប្រជាពលរដ្ឋរងការខូចខាតដោយសារតែរថយន្តក្រឡាប់ចាត់ថ្មដែលពេញព្រៀបនោះលើសន្ទូង។ ប្រភពបន្តថា មូលហេតុនៃការក្រឡាប់រថយន្តមកពីរថយន្តដាច់រ៉ូទីល។ ក្រោយពេលកើតហេតុ អ្នកបើកបរបានរត់គេចខ្លួនបាត់។ ម្ចាស់រថយន្តឈ្មោះប៊ាវនៅស្រុកកំពុងត្រាចបាននិយាយបែបមិនទទួលខុសត្រូវលើការខូចខាតថា គ្មានអ្នកណាចង់ឱ្យជួបហេតុការណ៍ដ៏អាក្រក់នេះទេ ប៉ុន្តែវាជារឿងចៃដន្យ។ មន្ត្រីប៉េអឹមរូបនោះបញ្ជាក់ថា អ្នករកស៊ីនៅស្រុកកំពង់ត្រាចប្រើប្រាស់តែរថយន្តចាស់ៗ ហើយដឹកធ្ងន់ៗអាចជាហេតុបង្កឱ្យមានគ្រោះថ្នាក់ដល់អ្នកដទៃជាយថាហេតុ ពេលកំពុងធ្វើចរាចរណ៍នៅទីប្រជុំជន។
ចំណែកឯតំបន់ភ្នំតាម៉ុកឯណោះវិញស្ថិតនៅឃុំស្តេចគង់ខាងត្បូង ស្រុកបន្ទាយមាសអាជ្ញាធរស្រុកបានហាមឃាត់រួចហើយថា កុំឱ្យអ្នករកស៊ីដាក់បំផ្ទុះគ្រាប់យកថ្មធ្វើអាជីវកម្មទៀត ហើយបម្រាមទាំងនោះភ្នំខ្លះក៏ត្រូវបានស្ងប់ស្ងាត់ឯអ្នកស្រុកឈប់ធ្វើសកម្មភាពដោយសារតែក្រុមអាជ្ញាធរមូលដ្ឋានក៏ដូចជាប៉ូលិសស្រុកបានព្រមានលើការយកថ្មលក់។
តែបើគេក្រឡេកមើលទៅភ្នំតាម៉ុកវិញ ជាភ្នំជាប់ព្រំប្រទល់ស្រុកកំពង់ត្រាច និងស្រុកបន្ទាយមាសទំនងជាអាជ្ញាធរស្រុកបន្ទាយមាសមិនទាន់បានដឹងរឿងក្រុមឈ្មួញកំពុងតែបំផ្លាញភ្នំទេ រហូតមកដល់ពេលនេះក្រុមឈ្មួញនៅតែមានការដឹកជញ្ជូនថ្មេចញយ៉ាងអនាធិបតេយ្យ៕
No comments:
Post a Comment