ប្រជាពលរដ្ឋរងគ្រោះដោយសារខ្យល់ព្យុះនៅខេត្តកែបទទួលបានអំណោយពីក្រុមការងារចុះជួយខេត្តកែប
ថ្ងៃទី០៥-០៨-២០១១
bayon.com
កែប៖ កាលពីថ្ងៃទី០៣ខែសីហានេះ ឯកឧត្តមកែន សត្ថាអភិបាលរងខេត្តកែប តំណាងអោយឯកឧត្តម ចម ប្រសិទ្ធ ប្រធានក្រុមការងារចុះជួយខេត្តកែប បានចុះសួរសុខទុក្ខនិងនាំយកអំណោយផ្ដល់ជូនប្រជាជន រងគ្រោះដោយខ្យល់ព្យុះនៅឃុំអង្កោ ស្រុកដំណាក់ចង្អើខេត្តកែប។
ឯកឧត្តមកែន សត្ថាបានបញ្ជាក់ថា ប៉ុន្មានថ្ងៃនេះ ក្នុងព្រះរាជាណាចក្រកម្ពុជា បានទទួលរងនូវឥទ្ធិពលខ្យល់ព្យុះឈ្មោះ ណុកថិន (Nock Ten) បានធ្វើអោយមានភ្លៀងធ្លាក់និងខ្យល់ស្ទើរគ្រប់ខេត្ត ជាពិសេសបានធ្វើអោយខេត្តកែបទទួលរងការខូចខាតផ្ទះសំបែងរបស់ប្រជាពលរដ្ឋចំនួន២៧ខ្នង។
ក្នុងនាមប្រជាពលរដ្ឋរងគ្រោះ ឯកឧត្តម កែន សត្ថា បានថ្លែងអំណរគុណដល់ឯកឧត្តម ចម ប្រសិទ្ធ និងលោកជំទាវ ព្រមទាំងក្រុមការងារចុះជួយឃុំអង្កោលដែលជានិច្ចកាលបានចុះជួយជាប្រចាំដល់បងប្អូនប្រជាពលរដ្ឋជួបការខ្វះខាតក្នុងជីវភាពក៏ដូចជាបងប្អូនជួបគ្រោះធម្មជាតិ នានាក្នុងមូលដ្ឋាននេះ ជាក់ស្ដែងដូចពេលនេះ ។
ក្នុងឱកាសនោះ ក្រុមការងារបាននាំយកថវិកា របស់ឯកឧត្តមចម ប្រសិទ្ធ និងលោកជំទាវ ចែកជូនដល់គ្រួសារ ផ្ទះរលំទាំងស្រុង ០២ខ្នងក្នុង១ខ្នងចំនួន៤០ម៉ឺនរៀល សាលាសហគមន៍គ្រឹះស្ទីន៤០ម៉ឺនរៀល សាលាសហគមន៍អាយឡូ ២០ម៉ឺនរៀល ផ្ទះខូចកំរិតមធ្យម៦គ្រួសារ ក្នុង១គ្រួសារ៣០ម៉ឺនរៀល ផ្ទះខូចកំរិតស្រាលចំនួន១៧គ្រួសារក្នុង១គ្រួសារ២០ម៉ឺនរៀល និងឧបត្ថម្ភប្រជាពលរដ្ឋអ្នករងរបួសដោយសារខ្យល់ព្យុះកំពុងសម្រាកព្យាបាលនៅមន្ទីរពេទ្យ២០ម៉ឺនរៀលផងដែរ៕
No comments:
Post a Comment