កម្ពុជានិងថៃសន្យាស្តារឡើងវិញនូវកិច្ចសហប្រតិបត្តិការលើវិស័យទេសចរណ៍
ថ្ងៃទី១០-០៨-២០១១
bayon tv
ភ្នំពេញ៖ ឯកអគ្គរាជទូតនៃប្រទេសថៃប្រចាំនៅក្នុងប្រទេសកម្ពុជា បានសន្យាខិតខំប្រឹងប្រែង ជម្រុញឱ្យប្រជាពលរដ្ឋថៃចូលមកកម្សាន្តក្នុងប្រទេសកម្ពុជា ឱ្យបានកាន់តែច្រើន ក្នុងកិច្ចខិតខំប្រឹងប្រែងមួយដើម្បីស្តារឡើងវិញនូវកិច្ចសហប្រតិបត្តិការ លើវិស័យទេសចរណ៍នៃ ប្រទេសជិតខាងទាំងពីរនេះ ។
លោក Sompong Sanguanbun ឯកអគ្គរាជទូតថៃប្រចាំនៅកម្ពុជា ត្រូវបានទីភ្នាក់ងារស៊ីនហួរបស់ប្រទេសចិន ដកស្រង់សម្តីក្នុងអំឡុងពេលនៃជំនួបរវាងរូបលោក និងឯកឧត្តមថោង ខុនរដ្ឋមន្ត្រីក្រសួងទេសចរណ៍កម្ពុជា កាលពីថ្ងៃទី០៩ខែសីហាថា ក្នុងនាមជាអ្នកការទូតថៃថ្មីប្រចាំនៅកម្ពុជា លោកនឹងខិតខំឱ្យអស់ពីលទ្ធភាពដើម្បីជម្រុញកិច្ចសហប្រតិបត្តិការលើគ្រប់វិស័យជាមួយកម្ពុជា រាប់ទាំងវិស័យទេសចរណ៍ផងដែរ។
ឯកឧត្តមថោង ខុនបានថ្លែងប្រាប់វិទ្យុនិងទូរទស្សន៍បាយ័នថា លោក Sompong Sanguanbun បានសន្យានឹងជម្រុញឱ្យមានលំហូរនូវភ្ញៀវទេសចរថៃចូលមកប្រទេស កម្ពុជាកាន់តែច្រើនថែមទៀត ដើម្បីបានបង្ហាញនូវក្តីសង្ឃឹមថា ទំនាក់ទំនងលើគ្រប់វិស័យរវាងប្រទេសកម្ពុជា និងប្រទេសថៃ នឹងមានភាពល្អប្រសើរឡើងវិញ ។
ឯកឧត្តម បានបញ្ជាក់ទៀតថា ចំនួនភ្ញៀវទេសចរណ៍ជនជាតិថៃ ដែលចូលមកកម្សាន្ត ក្នុងប្រទេសកម្ពុជា ក្នុងរយៈពេល៦ខែដំបូងនៃឆ្នាំ២០១១នេះ គឺមានចំនួន៤៨.១៣៦នាក់ គឺថយចុះចំនួន៣៦ភាគរយ បើប្រៀបធៀបទៅនឹងរយៈពេលដូចគ្នានៃឆ្នាំ២០១០កន្លងទៅ៕
No comments:
Post a Comment