ផ្សាយថ្ងៃទី២២-០៣-២០១២: ដកស្រង bayontv
ភ្នំពេញ៖ មន្រ្តីអាកាសចរណ៍ស៊ីវិលកម្ពុជាបានថ្លែងអោយដឹងថា កម្ពុជាកំពុងតែពិនិត្យមើលនូវខ្លឹមសារនៃកិច្ចព្រមព្រៀង ស្តីពីការបើកអោយមានការហោះហើរត្រង់ជាមួយសហរដ្ឋអាមេរិក ក្រោយពីចំនួនភ្ញៀវទេសចរអន្តរជាតិដែលមកពីសហរដ្ឋអាមេរិក មានការកើនឡើងរហូតឈានដល់លំដាប់លេខ៥ កាលពីឆ្នាំកន្លងទៅថ្មីៗនេះ។ លោកស្រី ទេព ស៊ុនធារី
ប្រធាននាយកដ្ឋានដឹកជញ្ជូនផ្លូវអាកាសនៃរដ្ឋលេខាធិការដ្ឋាន អាកាសចរណ៍ស៊ីវិលកម្ពុជាបានមានប្រសាសន៍ថា ដោយសារតែកម្ពុជាមានការអភិវឌ្ឍ និងមានសក្តានុពលល្អ ទើបប្រទេសជាច្រើនបានស្នើសុំធ្វើកិច្ចព្រមព្រៀងជាមួយកម្ពុជា ដើម្បីភ្ជាប់ទំនាក់ទំនងការហោះហើរ។លោក ហូរ វណ្ឌី សហប្រធានក្រុមការងារទេសចរណ៍ផ្នែកវិស័យឯកជន បានសម្តែងការអបអរសាទរ និងវាយតម្លៃខ្ពស់ចំពោះគម្រោងការភ្ជាប់អោយមានការហោះហើរត្រង់ រវាងកម្ពុជា និងសហរដ្ឋអាមេរិក។ លោក បានបញ្ជាក់ថា រហូតមកដល់បច្ចុប្បន្ន កម្ពុជាមិនទាន់បានភ្ជាប់ការហោះហើរត្រង់ជាមួយសហរដ្ឋអាមេរិកនៅ ឡើយទេ។លោក គង់ សុភារ័ក្សប្រធាននាយកដ្ឋានស្ថិតិ និងព័ត៌មាននៃក្រសួងទេសចរណ៍ កាលពីថ្ងៃទី២១ ខែមីនា បានបង្ហាញនូវជំនឿរបស់លោកថា ប្រសិនបើមានការហោះហើរត្រង់ជាមួយសហរដ្ឋអាមេរិក នោះកម្ពុជានឹងអាចទាក់ទាញភ្ញៀវទេសចរណ៍មកពីសហរដ្ឋអាមេរិកបានកាន់ តែច្រើនថែមទៀត។លោក គង់ សុភារ័ក្ស បានមាន
ប្រសាសន៍ថា ភ្ញៀវទេសចរណ៍មកពីសហរដ្ឋអាមេរិកមានការចំណាយខ្ពស់ក្នុងពេលដែលពួក គេស្នាក់នៅក្នុងប្រទេសកម្ពុជា គឺមានកម្រិតប្រហាក់ប្រហែលនឹងភ្ញៀវទេសចរណ៍មកពីទ្វីបអឺរ៉ុបដែរ។ លោក បានរំលឹកថា ក្នុងឆ្នាំ២០១១កន្លងទៅ កម្ពុជាទាក់ទាញភ្ញៀវទេសចរណ៍អន្តរជាតិបានចំនួន ២លាន ៨សែន ៨ម៉ឺននាក់ ដែលក្នុងចំណោមចំនួនភ្ញៀវទេសចរណ៍ទាំងនោះ ជាភ្ញៀវទេសចរណ៍មកពីសហរដ្ឋអាមេរិកជាប់លំដាប់ថ្នាក់ទី០៥ គឺបន្ទាប់ពីវៀតណាម កូរ៉េ ចិន និងជប៉ុន។ វិស័យទេសចរណ៍ គឺជាវិស័យមួយដ៏មានសក្តានុពលសម្រាប់ជួយទ្រទ្រង់វិស័យសេដ្ឋកិច្ច ជាតិកម្ពុជា ដោយកាលពីឆ្នាំ២០១០កន្លងទៅ វិស័យនេះនាំចំណូលជូនជាតិបានចំនួន ១.៧០០លានដុល្លាអាមេរិក ដោយបង្កើតការងារជូនប្រជាពលរដ្ឋបានប្រមាណ ជាង ៤០ម៉ឺននាក់ ។ ប្រទេសកម្ពុជាតែងតែប្រកាន់ខ្ជាប់នូវយុទ្ធសាស្រ្តបើកចំហជើងមេឃ ដើម្បីស្វាគមន៍ភ្ញៀវទេសចរណ៍អន្តរជាតិមកពីគ្រប់ទិសទី។លោកស្រី ទេព ស៊ុនធារី ប្រធាន
នាយកដ្ឋានដឹកជញ្ជូនផ្លូវអាកាសនៃរដ្ឋលេខាធិការដ្ឋាន អាកាសចរណ៍ស៊ីវិលកម្ពុជាបានថ្លែងអោយដឹងថា រហូតមកដល់បច្ចុប្បន្ននេះ ក្រុមហ៊ុនអាកាសចរណ៍ ដែលបើកប្រតិបត្តិការហោះហើរត្រង់មកកម្ពុជាមានចំនួន២៨ក្រុមហ៊ុន ដែលក្នុងនោះ មានការហោះហើរត្រង់រវាងកម្ពុជាជាមួយប្រទេសចំនួន ០៨ ដែលជាសមាជិកនៃសមាគមប្រជាជាតិអាស៊ីអាគ្នេយ៍ប្រទេសចិន ជប៉ុន និងប្រទេសមួយចំនួនទៀត៕
No comments:
Post a Comment