ភ្នំពេញៈ កម្ពុជានឹងធ្វើជាម្ចាស់ផ្ទះក្នុងកិច្ចប្រជុំរដ្ឋមន្ត្រីការពារជាតិអាស៊ានលើកទី៦ និងកិច្ចប្រជុំនានា ទាក់ទិននឹងវិស័យការពារជាតិ ក្នុងឆ្នាំ២០១២ ដោយមានរដ្ឋមន្ត្រីការពារជាតិអាស៊ានទាំង១០ប្រទេស និងរដ្ឋមន្ត្រីការពារជាតិពីបណ្តាប្រទេសមហាអំណាចចំនួន៨ ទៀតចូលរួម។
លោក ណឹម សុវត្ថិ អគ្គនាយក អគ្គនាយកដ្ឋាន នយោបាយ និងកិច្ចការបរទេស
នៃក្រសួងការពារជាតិ ថ្លែងក្នុងសនិ្នសីទកាសែតពីថ្ងៃទី២ ខែធ្នូថា ក្រៅពីប្រទេសអាស៊ានទាំង១០ក្នុងតំបន់ មហាអំណាចលើពិភពលោកទាំង៨ទៀត ក៏នឹងចូលរួមកិច្ចប្រជុំការពារជាតិអាស៊ានផងដែរ រួមទាំងអាមេរិក រុស្ស៊ី នូវែលសេឡង់ និងចិន
ផង។
លោកបន្តថា៖ «យើងនឹងពិនិត្យលើបញ្ហាមួយចំនួន មានបញ្ហាសន្តិសុខ និងបញ្ហា
មួយចំនួនដែលកើតឡើងក្នុងអាស៊ាន»។
បើតាមសន្និសីទនេះ មានកិច្ចប្រជុំចំនួន១៤ ក្នុងគម្រោងនៃកិច្ចប្រជុំ ការពារជាតិអាស៊ាន នេះ ដែលចាប់ផ្តើមពីខែកុម្ភៈ ២០១២ តទៅ នឹងមានកិច្ចប្រជុំស្ទើររាល់ខែ ដែលមាន២-៣កិច្ចប្រជុំក្នុងមួយខែ។ ចំពោះកិច្ចប្រជុំធំបំផុតនឹងធ្វើនៅខែឧសភា ឆ្នាំ២០១២ ដែលដឹកនាំដោយលោកឧបនាយករដ្ឋមន្ត្រី ទៀ បាញ់ រដ្ឋមន្ត្រីក្រសួងការពារជាតិ។
ប្រធានបទសម្រាប់កិច្ចប្រជុំការពារជាតិអាស៊ានឆ្នាំ ២០១២នេះ គឺ «ការលើកកម្ពស់ ការឯកភាព សម្រាប់សហគមន៍អាស៊ានមួយដែលមានសុខដុមរមណីយកម្ម និងសន្តិសុខ»។
លោក ណឹម សុវត្ថិ ថ្លែងថា ៖ «កិច្ចសហប្រតិបត្តិការនេះ ដើម្បីដោះស្រាយសំខាន់ ទៅលើមុខសញ្ញានៃបញ្ហាថ្មីៗ គឺបញ្ហាសន្តិសុខសមុទ្រ កិច្ចសហប្រតិបត្តិការរក្សាសន្តិភាព បញ្ហាសុខាភិបាលនិងយោធា ការសង្គ្រោះគ្រោះមហន្តរាយ និងការប្រឆាំងភេរវកម្ម»។ លោកថា ការរៀបចំប្រជុំនេះ ជាមោទនភាពរបស់កម្ពុជាក្នុងការធានារក្សានូវសន្តិសុខជូនថ្នាក់ដឹកនាំប្រទេសនានា៕
No comments:
Post a Comment