ក្រសួងទេសចរណ៍បើកសិក្ខាសាលាស្ដីពីភោជនីយដ្ឋានស្អាតអាហារដ្ឋានស្អាតនិងសេវាល្អ
ផ្សាយថ្ងៃទី០៣-១១-២០១១: ដកស្រង bayontv
ភ្នំពេញ៖ ឯកឧត្តម ថោង ខុន រដ្ឋមន្ត្រីក្រសួងទេសចរណ៍បានអញ្ជើញជាអធិបតីក្នុងពិធីបើកសិក្ខាសាលា ស្ដីពីភោជនីយដ្ឋានស្អាតអាហារដ្ឋានស្អាត និងសេវាល្អ នៅព្រឹកថ្ងៃទី០៣ ខែវិច្ឆិកា នៅសណ្ឋាគារកាបូឌីយ៉ាណា ។ ដោយមានការអញ្ជើញចូលរួមពីផ្នែកឯកជន និងប្រធានមន្ទីរ ទេសចរណ៍ និងស្ថាប័ន ពាក់ព័ន្ធជាច្រើនទៀត។
មានប្រសាសន៍បើកសិក្ខាសាលាឯកឧត្តម ថោង ខុន បានគូសបញ្ជាក់ថា ចំពោះស្ដង់ដារភោជនីយដ្ឋានស្អាត យើងក៏បានរៀបចំចងក្រងជាបទដ្ឋានកិត្តិយសធ្វើការផ្សព្វផ្សាយតាមគ្រប់រូបភាព ព្រមទាំងបានណែនាំដល់មន្ទីរទេសចរណ៍ រាជធានី-ខេត្តទាំងអស់ត្រូវធ្វើយ៉ាងណាអោយភោជនីយដ្ឋានទាំងអស់នៅទូទាំងប្រទេសមានការប្រែប្រួលថ្មី ដោយមានអានាម័យ សណ្ដាប់ធ្នាប់ល្អ បន្ទប់ទឹក បង្គន់ស្អាត ម្ហូបអាហារមានគុណភាពអានាម័យល្អ មានតម្លៃសមរម្យនិងមានសេវាបំរើគួរជាទីពេញចិត្ត ជាពិសេសមិនមានការបោះសំរាមខុសកន្រ្ដកសំរាម។
ឯកឧត្តមបានថ្លែអំណរគុណចំពោះសហគមន៍ភោជនីយដ្ឋានកម្ពុជា ដែលបានយកចិត្តទុកដាក់សហការជាមួយក្រសួងទេសចរណ៍រៀបចំការប្រកួតធ្វើម្ហូបអាហារភេជ្ជៈ និងបដិសណ្ឋាកិច្ចក្នុងវិស័យទេសចរណ៍ សំដៅធ្វើអោយវិស័យម្ហូបអាហារនៅកម្ពុជាកាន់តែធានាបានទាំងគុណភាព អានាម័យ និងមានលក្ខណៈស្ដង់ដា ព្រមទាំងផ្ដល់ការពេញចិត្តដល់ទេសចរណ៍ និងឆ្លើយតបទៅនឹងផែនការយុទ្ធសាស្ត្រ អាស៊ាន ឆ្នាំ២០១១-២០១៥ ក្នុងការលើកកម្ពស់សមត្ថិភាពជំនាញ ទេសចរណ៍ទាំង៣២មុខ ដែលអាស៊ានបានដាក់ចេញដែលក្នុងនោះក៏មានជំនាញផលិតកម្ម ម្ហូបអាហារ និងផ្នែកសេវាកម្មអាហារនិងភេជ្ជៈ៕
No comments:
Post a Comment