វេទិកាស្រូវអង្ករ ជំរុញការនាំចេញអង្ករ
ផ្សាយថ្ងៃទី១៧-១០-២០១១: ដកស្រង sabay
វេទិកាស្រូវអង្ករឆ្នាំ២០១១ ត្រូវបានរៀបចំឡើងកាលពីព្រឹកមិញនេះ នៅមជ្ឈមណ្ឌលសន្និសីទ និងពិព័រណ៍កោះពេជ្រ ក្នុងគោលបំណង ដើម្បីចូលរួមចំណែកជាមួយរាជរដ្ឋាភិបាល លើកស្ទួយវិស័យផលិតកម្មស្រូវ និងការនាំចេញអង្ករទៅកាន់ទីផ្សារអន្តរជាតិ។
លោកឧកញ៉ា តែ តាំងប៉ ប្រធានគណៈកម្មាធិការរៀបចំវេទិកាស្រូវអង្ករកម្ពុជាឆ្នាំ២០១១ ថ្លែងថា គោលបំណងសំខាន់ចំពោះមុខ គឺធ្វើយ៉ាងណាបង្វែរការនាំស្រូវក្រៅ
ផ្លូវការ ឲ្យទៅជាការនាំចេញអង្ករពិតប្រាកដទៅកាន់ទីផ្សារអន្តជាតិ។
លោក ឧកញ៉ា បានបន្តថា រដ្ឋាភិបាលពិតជាមានបំណងចង់ប្រែក្លាយកម្ពុជាទៅជាប្រទេសជង្រុកស្រូវ និងចង់ឲ្យកម្ពុជាក្លាយទៅជាប្រទេសមួយសំខាន់ក្នុងការនាំចេញ
អង្ករដែលជាមាសសទៅផ្គត់ផ្គង់លើទីផ្សារអន្តជាតិ។ អាស្រ័យហេតុនេះហើយ ទើបរដ្ឋាភិបាលកំណត់យកឆ្នាំ២០១៥ ជាឆ្នាំគោលដើម្បីជំរុញការផលិតស្រូវ ឲ្យបានលើសពីតម្រូវការប្រើប្រាស់ក្នុងស្រុក ដល់ទៅ៤លានតោន និងជំរុញការនាំចេញអង្ករឲ្យបានយ៉ាងតិច១លានតោន។
ឯកឧត្ដម ឧបនាយករដ្ឋមន្ត្រី យឹម ឆៃលី មានប្រសាសន៍ថា ការសម្រេចបាននូវសមិទ្ធផល នៃគោលនយោបាយ ស្ដីពីការជំរុញផលិតកម្មស្រូវ និងកានាំចេញអង្ករ គឺជាជោគជ័យថ្មីមួយទៀតរបស់កម្ពុជា។ ឯកឧត្ដម បានបន្តទៀតថា ការសម្រេចបាន
នូវកំណើននាំចេញ ១ លានតោន គឺមានន័យថា កម្ពុជាអាចរកបានចំណូលបន្ថែមទៀត យ៉ាងហោចណាស់ ៥០០លានដុល្លារ ចូលក្នុងសេដ្ឋកិច្ចជាតិ។
លោកសួ ឃាង ប្រធានសមាគមរោងម៉ាស៊ីនកិនស្រូវ ខេត្តកំពង់ចាម បានបញ្ជាក់ថា ការបិទមិនឲ្យមានការនាំស្រូវចេញក្រៅផ្លូវការ ដែលមិនមានតួលេខពិតប្រាកដ ធ្វើឲ្យ
កម្ពុជាមិនបានដឹងថា មានប៉ុន្មាន ខ្វះប៉ុន្មានទេ។ លោកបាន អះអាងថា បើមានការបិទការនាំចេញក្រៅផ្លូវការ ងាយស្រួលដល់ការប្រមូលទិញ និងការនាំចេញ ទៅទីផ្សារអន្តរជាតិនិងធ្វើឲ្យមានការប្រកួតប្រជែងស្មើភាពគ្នា។
លោកឡង់ ឌី ប្រធានផ្នែកលក់របស់ក្រុមហ៊ុន សូមា ហ្វាម មានចំណាប់អារម្មណ៍ថា វេទិកាអង្ករនេះ នឹងនាំមកទាំងអ្នកលក់ និងអ្នកទិញ ឲ្យមកជួបគ្នា ដើម្បីពិនិត្យគុណភាពទាំងអស់គ្នា។ លោកបានអះអាងទៀងថា “ក្រុមហ៊ុនរបស់ខ្ញុំ នៅឆ្នាំមុន បាននាំចេញទៅចិន និងប៊ែលហ្សិច ចំនួន២០០០តោន ហើយគម្រោងនាំចេញឆ្នាំនេះ ឲ្យបានដល់ ៥០០០តោន”។
ក្នុងសន្ទរកថា ឯកឧត្ដម យឹម ឆៃលី បានគូសបញ្ជាក់ថា នៅឆ្នាំ២០០៩ កន្លងទៅ ផលិតកម្មស្រូវសម្រេចបានប្រមាណជាង៥លានតោន។ តាមរយៈកំណើននេះ ប្រទេសកម្ពុជា បានជួយដល់ប្រជាជនខ្លួនឲ្យមានស្បៀងអាហារគ្រប់គ្រាន់ និងសល់
ស្រូវប្រមាណជាង២លានតោនផងដែរ៕
No comments:
Post a Comment