ពាណិជ្ជកម្មទ្វេភាគីកម្ពុជា-ថៃ កើន ៨%
ផ្សាយថ្ងៃទី១៧-១០-២០១១: postkhmer
ភ្នំពេញៈ យោងតាមស្ថិតិរបស់ការិយាល័យ
ជំរុញពាណិជ្ជកម្មបរទេសរបស់ស្ថានទូត ថៃ
ដែលកាសែតភ្នំពេញ ប៉ុស្តិ៍ទទួលបានកាលពីថ្ងៃអាទិត្យម្សិលមិញ បានឲ្យដឹងថា ពាណិជ្ជកម្មទ្វេភាគីរវាងកម្ពុជា និងថៃ បានកើនឡើង៨ភាគរយក្នុងរយៈពេល៨ខែដំបូង
ក្នុងឆ្នាំ២០១១នេះ ធៀបនឹងរយៈពេលដូចគ្នា
កាលពីឆ្នាំ២០១០។
លោកស្រី Jiranan Wongmongkol អ្នកប្រឹក្សាពាណិជ្ជកម្មប្រចាំស្ថានទូតថៃនៅរាជធានីភ្នំពេញ បានឲ្យដឹងកាលពីម្សិលមិញថា កំណើនពាណិជ្ជកម្មរវាងប្រទេសទាំងពីរនេះ កើតមានឡើងដោយសារទំនាក់ទំនងកាន់តែប្រសើររវាងប្រទេសជិតខាងទាំង ពីរ ចាប់តាំងពីជម្លោះព្រំដែន បានបញ្ចប់នៅដើមឆ្នាំនេះ។
លោកស្រីមានប្រសាសន៍ថា៖ «បើទោះជាមានជម្លោះប្រដាប់អាវុធតាមព្រំដែន បាន
ធ្វើឲ្យពាណិជ្ជកម្មទ្វេភាគីមានភាពជាប់គាំងនៅដើមឆ្នាំនេះក៏ ដោយ ក៏ការនាំចូល និងនាំចេញ ទំនិញផ្សេងៗ បានវិលត្រឡប់មកជាប្រក្រតីវិញហើយ ហើយទំនាក់ទំនងរបស់កម្ពុជាជាមួយនឹងរដ្ឋាភិបាលថ្មីក៏ល្អដែរ»។
ការនាំចេញទំនិញរបស់ប្រទេសថៃមកកាន់ប្រទេសកម្ពុជា មានទំហំទឹកប្រាក់ចំនួន ១,៨០៨ពាន់លានដុល្លារចាប់ពីខែមករាដល់ខែកញ្ញា ពោលគឺកើនឡើងតិចតួចបើធៀបនឹងការនាំចេញក្នុងរយៈពេលដូចគ្នាកាល ពីឆ្នាំមុន ដែលមានចំនួន ១,៦៣៨ពាន់លានដុល្លារ ហើយការនាំចូលពីប្រទេសកម្ពុជាវិញ បានធ្លាក់ចុះ ១៧ភាគរយ
ពីចំនួន១៥១,៥២លានដុល្លារ មកនៅត្រឹមចំនួន១២៥,៦៤លានដុល្លារ។ លោកស្រី Jiranan Wongmongkol មានប្រសាសន៍ថា ការនាំចេញរបស់កម្ពុជាភាគច្រើនមានផលិតផលកសិកម្ម សម្លៀកបំពាក់ ដែកអេតចាយ និងត្រី ចំណែកឯការនាំចូលពីប្រទេសថៃវិញមានដូចជា ប្រេង ផលិតផលសម្រេច និងសម្ភារសំណង់។
លោកស្រី បានបន្តឲ្យដឹងទៀតថា៖«យើងរំពឹងថាពាណិជ្ជកម្មទ្វេភាគីរវាង ប្រទេសទាំងពីរ នឹងកើនឡើង២០ភាគរយនៅឆ្នាំ២០១១នេះ [ធៀបនឹងរយៈពេលដូចគ្នា
កាលពីឆ្នាំមុន]»។
មន្ត្រីក្រសួងត្រូវបានលើកឡើងថាការនាំចេញផលិតផលកសិកម្មរបស់ កម្ពុជា
គឺជាកត្តាចម្បងដែលជំរុញឲ្យពាណិជ្ជកម្មរវាងប្រទេសទាំងពីរ នេះកើនឡើង។
លោក គង់ ពុទ្ធារ៉ា ប្រធាននាយកដ្ឋានព័ត៌មាន និងស្ថិតិនៃក្រសួងពាណិជ្ជកម្ម បានប្រាប់កាសែតភ្នំពេញ ប៉ុស្តិ៍ថា៖ «ភាគច្រើន ផលិតផលដែលយើងនាំចេញ មានដូចជា ស្រូវ ពោត និងសណ្តែក តែពាណិជ្ជកម្មរវាងប្រទេសទាំងពីរ នឹងធ្លាក់ចុះ បើ
តម្រូវការផលិតផលកសិកម្មទាំងនេះ ថយចុះ»។
លោក ងួន ម៉េងតិច អគ្គនាយកសភាពាណិជ្ជកម្មកម្ពុជា បានឲ្យដឹងថា ការនាំចេញរបស់កម្ពុជាទៅថៃ បានធ្លាក់ចុះ ដោយសារការនាំចេញស្រូវថយចុះ។
លោកមានប្រសាសន៍បន្តថា៖ «ឈ្មួញថៃជាច្រើន បានទិញស្រូវពីកម្ពុជាកាលពីឆ្នាំមុន តែឥឡូវយើងមានលទ្ធភាពនាំចេញអង្ករដោយផ្ទាល់ទៅប្រទេសផ្សេងទៀត ដោយសារហេដ្ឋារចនាសម្ព័ន្ធរបស់ឧស្សាហកម្មកែច្នៃអង្ករ បានអភិវឌ្ឍកាន់តែប្រសើរឡើង»៕
No comments:
Post a Comment