ស្ករសឡើងថ្លៃ ខណៈថៃរងការបំផ្លិចបំផ្លាញពីទឹកជំនន់
ផ្សាយថ្ងៃទី២០-១០-២០១១: ព័ត៌មានអន្ដរជាតិ ដកស្រង postkhmer
ថៃៈ តម្លៃស្ករបានកើនឡើងពីរថ្ងៃជាប់គ្នា កាលពីថ្ងៃពុធ នៅទីក្រុងញូវយ៉ក ដោយសារការគិតថា ទឹកជំនន់អាក្រក់បំផុតនៅក្នុងរយៈពេល៥០ឆ្នាំនៅថៃ ដែលជាប្រទេសនាំចេញធំទី២ លើពិភពលោក អាចពន្យារពេលដល់ការប្រមូលផល និងបំផ្លិចបំផ្លាញដំណាំក្នុងប្រទេសថៃ។
ទឹកជំនន់បានបំផ្លាញដំណាំ បំផ្លាញហេដ្ឋារចនា
សម្ព័ន្ធ និងបង្ខំឲ្យក្រុមហ៊ុនជាច្រើនរួមមានក្រុមហ៊ុនផលិតរថយន្តនីសាន់ នៅថៃបិទ
ទ្វារ។
យោងតាមសមាគមអ្នកនាំចេញអង្កររបស់ថៃ បានឲ្យដឹងកាលពីថ្ងៃទី១៧ តុលាថា ទឹកជំនន់នឹងកាត់បន្ថយទិន្នផលស្រូវ ៣,៥ លានតោន។ នោះជាតួលេខ១០ភាគរយនៃផល កាលពីឆ្នាំ២០១០។
លោក Naim Beydoun ឈ្មួញកណ្តាលនៅក្រុមហ៊ុន Swiss Sugar Brokers បានថ្លែងក្នុង
របាយការណ៍កាលពីថ្ងៃពុធថា៖ «ទឹកជំនន់នៅថៃធ្វើឲ្យទីផ្សារមានមតិរួមថា ការបំផ្លិចបំផ្លាញហេដ្ឋារចនាសម្ព័ន្ធនឹងបង្កការលំបាកដល់ការ ដឹកជញ្ជូនសម្រាប់ការផលិតស្ករ បូកនឹងការខូចខាតដោយផ្ទាល់លើដំណាំរួមជាមួយនឹងការអាចពន្យារពេល ក្នុងការប្រមូលផលផងដែរ»។
ស្ករសមិនទាន់កែច្នៃ សម្រាប់នាំចេញនៅខែមីនាឆ្នាំក្រោយបានកើន០,៣ សេន ឬ ១,១ភាគរយ ពោលគឺឡើងដល់ ២៨,១៥សេន ក្នុងមួយផោន (០,៤៥គីឡូ) នៅលើទីផ្សារ ICE Futures U.S. នៅទីក្រុងញូវយ៉ក។ ស្ករសកែច្នែរួចសម្រាប់ចែកចាយខែធ្នូបានកើន៦,៨០ដុល្លារ ឬ១ ភាគរយ ពោលគឺឡើងដល់ ៧២០ ដុល្លារក្នុងមួយតោន លើទីផ្សារ NYSE Liffe ក្នុងទីក្រុងឡុងដ៍៕
No comments:
Post a Comment