ថៃចាប់ផ្ដើមទូទាត់ការខូចខាត ខណៈបាងកកមិនទាន់ឆ្លងផុតវិបត្តិ
ផ្សាយថ្ងៃទី១៨-១០-២០១១: ព័ត៌មានអន្ដរជាតិ ដកស្រង postkhmer
បាងកកៈ គណៈរដ្ឋមន្ត្រីថៃ បានជួបប្រជុំគ្នានៅថ្ងៃអង្គារនេះ ដើម្បីពិភាក្សាអំពីការខូចខាតផ្នែកសេដ្ឋកិច្ចកាន់ធំឡើងៗដោយសារទឹកជំនន់ ដែលបានសម្លាប់មនុស្សដល់ទៅ ៣១៥នាក់រួចហើយ ហើយប្រជាជននៅរាជធានីបាងកក ត្រូវបានគេប្រាប់កុំឲ្យបោះបង់
ចោលការប្រុងប្រយ័ត្នរបស់ពួកកេ បើទោះបីគ្រោះថ្នាក់ភ្លាមៗដោយទឹកជំនន់មកលើទីក្រុងមួយនេះ បានកន្លងហួសទៅហើយក្ដី។
លោករដ្ឋមន្ត្រីហិរញ្ញវត្ថុ ធីរ៉ាឆៃ ភូវ៉ាណាតណារ៉ានូបាឡា បានថ្លែងថា ការខូចខាតដោយសារទឹកជំនន់ចាប់តាំងពីខែកក្កដា អាចមានកម្រិតខ្ពស់ដល់ទៅ ១,៧ភាគរយ នៃផលិតផលក្នុងស្រុកសរុប (GDP) ហើយបណ្ដារដ្ឋមន្ត្រី នឹងពិភាក្សាអំពីវិធានការជួយសង្គ្រោះ និងការខ្ចីប្រាក់រដ្ឋាភិបាលបន្ថែមទៀត សម្រាប់ប៉ះប៉ូវការខូចខាតនេះ។
លោកស្រីនាយករដ្ឋមន្ត្រី យីងឡាក់ ស៊ីណាវ៉ាត្រា បានថ្លែងកាលពីថ្ងៃចន្ទម្សិលមិញថា ការចំណាយលើការកសាងប្រទេសឡើងវិញ អាចមានចំនួនឡើងទៅដល់ជាង ១០០ពាន់លានបាត (៣,៣ពាន់លានដុល្លារ) ក្រោយពីទឹកជំនន់ដ៏អាក្រក់ក្នុងរយៈពេល ៥០ឆ្នាំមកនេះ បានបង្កការខូចខាតយ៉ាងធំធេងលើដីស្រែចំការ និងបានបង្ខំឲ្យតំបន់ឧស្សាហកម្មធំៗបិទទ្វារ។
គណៈរដ្ឋមន្ត្រីថៃ គ្រោងនឹងពិភាក្សាគ្នានូវសំណើបង្កើនឱនភាពកញ្ចប់ថវកាទៅដល់ ១៤ភាគរយ ឬស្មើនឹង ៤០០ពាន់លានបាត (១៣ពាន់លានដុល្លារ)នៅឆ្នាំសារពើនេះចាប់ពីថ្ងៃទី០១ ខែតុលា។
ការខូចខាតអាចឡើងកាន់តែខ្ពស់ប្រសិនបើរាជធានីបាងកក ដែលជាប្រភព ៤១ភាគរយនៃ GDP សរុបនោះ ត្រូវបានរងគ្រោះដោយទឹកជំនន់៕
No comments:
Post a Comment