មាសឡើងខ្ពស់ជាថ្មីលើស១.៩២០ដុល្លារក្នុង១អោន
ផ្សាយថ្ងៃទី០៧-០៩-២០១១: អន្ដរជាតិ ដកស្រង kohsantepheapdaily
តំលៃមាសបានលោតឡើងលើសកំណត់ត្រា ចាស់លើស១.៩២០ដុល្លារក្នុងមួយអោន (មួយអោនស្មើ២៨ក្រាម) ដោយសារវិបត្តិប្រាក់បំណុលតំបន់អឺរ៉ុបកាន់តែធ្ងន់ធ្ងរប៉ះពាល់ការរីកលូតលាស់សេដ្ឋកិច្ច ហើយធ្វើឲ្យអ្នកវិនិយោគព្យាយាមការពារទ្រព្យរបស់គេ។ ប្រទេសចិន និងឥណ្ឌា ជាប្រទេសដែលមានអតិថិជនប្រើប្រាស់មាសខ្ពស់ក្នុងពិភពលោកបានកើនឡើងខ្ពស់បំផុតដែលមិនធ្លាប់មាន។
តំលៃមាសកើនឡើងយ៉ាងលឿនដល់១,១ភាគរយ និង១.៩២១,១៥ដុល្លារក្នុងមួយអោន លើសកំណត់ត្រាចាស់ដែលកើនឡើងខ្ពស់ត្រឹមតែ១.៩១៣,៥ដុល្លារកាលពីថ្ងៃទី២៣ សីហា។ មាសមានតំលៃ១.៩១៩,៨៥ដុល្លារក្នុងមួយអោន នៅម៉ោង២ និង១២នាទីម៉ោង នៅទីក្រុងសិង្ហបុរី។ ចំណែកទីផ្សារមាសក្នុងទីក្រុងញូវយ៉កបាន លោតឡើងដល់១.៩២៣,១ដុល្លារក្នុងមួយអោន គឺកើនឡើង២,៥ភាគរយបន្ទាប់ពីបានបិទទ្វារកាលពីថ្ងៃទី២ កញ្ញា ដោយសារជាថ្ងៃឈប់សំរាកអាមេរិក។
លោក Darren Heathcote ប្រធានធុរកិច្ចនៃធនាគារ Investic ក្នុងប្រទេសអូស្ត្រាលីបាននិយាយថា «ទ្វីបអឺរ៉ុបមានកម្លាំងធ្វើឲ្យមាសឡើងថ្លៃកប់ពពក ដោយសារថា ខ្លួនទំនងជាមានបញ្ហាក្នុងការដោះស្រាយវិបត្តិរបស់ខ្លួននាពេលនេះ។ ខ្ញុំមិនគិតថា អ្នកវិនិយោគពិតជាជឿថា រដ្ឋាភិបាលក្នុងទ្វីបអឺរ៉ុប មានអ្វីដែលពួកគេមាននិងមាននយោបាលដែលអាចឲ្យពួកគេរួចផុតពីវិបត្តិរបស់ខ្លួន ហើយក៏នឹងធ្វើឱ្យវាចុះក្នុងពេលឆាប់ជាជាងការដោះស្រាយពេលក្រោយ»។
ថ្ងៃទី៦ កញ្ញា រដ្ឋមន្ត្រីហិរញ្ញវត្ថុមកពីប្រទេស ហ្វាំងឡង់ អាល្លឺម៉ង់ ហូឡង់បានជួបប្រជុំគ្នាដើម្បីពិភាក្សាលើការទាមទាររបស់ប្រទេសហ្វាំងឡង់ដើម្បីបន្ថែមកញ្ចប់ជំនួយដល់ប្រទេសក្រិច ដើម្បីចាត់វិធានការសង្គ្រោះក្នុងតំបន់។ ផ្សារហ៊ុនអាមេរិកធ្លាក់ចុះ នៅផ្សារហ៊ុន Standard & Poor 500 អាចធ្លាក់ចុះក្នុងថ្ងៃទី៣ កញ្ញាមុនពេលដែលសភាអ៊ីតាលី ពិភាក្សាលើកញ្ចប់នៃច្បាប់សេដ្ឋកិច្ច។
តំលៃមាសក្នុងប្រទេសចិន និងឥណ្ឌាបានកើនឡើង០,៩ភាគរយស្មើនឹង៦២៣ដុល្លារក្នុង១០ក្រាម។ ក្នុងទីផ្សារជូញដូររបស់ក្រុមហ៊ុន India Ltd ។ ការវិនិយោគក្នុងប្រទេសឥណ្ឌាក្នុងវិស័យមាសបានកើនឡើង៧៨ភាគរយស្មើ នឹង១០៨,៥តោន មាសនៅត្រីមាសទី២ ស្របពេលដែលគ្រឿងអលង្ការនាំចូលក៏កើនឡើង ១៧ភាគរយ ស្មើនឹង១៣៩,៨តោនមាស នេះបើតាមក្រុមប្រឹក្សាមាសពិភពលោកនិយាយ កាលពីថ្ងៃទី១៨ សីហា។ តំលៃមាសកើនឡើង៣៥ភាគរយក្នុងឆ្នាំនេះ ដោយសារថា ការជួញដូរផលិតផលមាសឡើងដល់ជាប់កំណត់ត្រា២.២១៦,៧៥៦តោនក្នុងថ្ងៃ ទី៨ សីហា រហូតដល់ធនាគារកណ្តាលបន្ថែមមាសបំរុងរបស់ខ្លួនជាលើកទីមួយ៕
No comments:
Post a Comment