កម្ពុជា-ថៃព្រមព្រៀងដកទ័ពបណ្តើរៗ
ផ្សាយថ្ងៃទី២៦-០៨-២០១១
posthkhmer
កងទ័ពកម្ពុជា និងថៃ នៅពេលឈរជើងក្បែរប្រាសាទព្រះវិហារ
កាលពីពេលកន្លងមក
ឧត្តមានជ័យៈ មេបញ្ជាការយោធាកម្ពុជា និងថៃ បានព្រមព្រៀងគ្នា ដកកងទ័ព និងពង្រឹងសន្តិសុខ ជាបណ្តើរៗ ពីព្រំដែនទាំងសងខាង ក្នុងកិច្ចចរចាទ្វេភាគីរយៈពេល ២ ថ្ងៃ ដែលបានបញ្ចប់ កាលពីម្សិលមិញ។
លោក ជា ម៉ន មេបញ្ជាការភូមិភាគ ៤ ដែលបានដឹកនាំប្រតិភូកម្ពុជា ទៅចូលរួមកិច្ចប្រជុំគណៈកម្មការព្រំដែនយោធភូមិភាគ ជាមួយនឹងលោក Thawatchai Samutsakorn ឧត្តមសេនីយ៍ទោ មេបញ្ជាការភូមិភាគ ២ ថៃ បានប្រាប់ភ្នំពេញ ប៉ុស្តិ៍ កាលពីម្សិលមិញថា កិច្ចប្រជុំបានសម្រេចលទ្ធផលល្អ។
បន្ទាប់ពីវិលត្រឡប់ពីចូលរួមកិច្ចប្រជុំ ក្នុងខេត្តណាខុនរាជសីមា ប្រទេសថៃ រួចមក លោក ជា ម៉ន បានបញ្ជាក់ថា៖ «ពីមុន យើងពិភាក្សាអំពីថា តើត្រូវចៀសវាងការប៉ះទង្គិចប្រដាប់អាវុធដោយរបៀបណា ប៉ុន្តែឥឡូវនេះ ... យើងពិភាក្សាអំពីថា តើត្រូវធ្វើឲ្យសន្តិសុខ មានស្ថេរភាពតាមបណ្តោយព្រំដែន ដោយរបៀបណា?»។ លោកបានបន្ថែមទៀតថា ប្រទេសទាំងពីរ បានដកកងទ័ពបណ្តើរៗ ចេញពីតំបន់ព្រំដែន ប៉ុន្មានសប្តាហ៍ថ្មីៗនេះ ហើយនឹងគោរពតាមការសម្រេច របស់តុលាការយុតិ្តធម៌អន្តរជាតិ កាលពីខែមុន ដែលបង្គាប់ឲ្យបង្កើតតំបន់គ្មានយោធា នៅតំបន់ជុំវិញប្រាសាទព្រះវិហារ។
កិច្ចប្រជុំគណៈកម្មការព្រំដែនយោធភូមិភាគនេះ ជាកិច្ចពិភាក្សាផ្លូវការលើកទី ១ រវាងប្រទេសទាំងពីរ ចាប់តាំងពីរដ្ឋាភិបាលថៃថ្មី បានបង្កើតឡើងក្នុងខែនេះ បន្ទាប់ពីលោកស្រី យីងឡាក់ ស៊ីណាវ៉ាត្រា បានឈ្នះការបោះឆ្នោតឡើងធ្វើជានាយករដ្ឋមន្ត្រីថៃថ្មី ជំនួសលោក អាភីស៊ីត កាលពីដើមខែកក្កដា។
កិច្ចប្រជុំនេះ នឹងជួយត្រួសត្រាយផ្លូវ ដល់កិច្ចប្រជុំគណៈកម្មការព្រំដែនទូទៅ ដែលគេទន្ទឹមរង់ចាំជាយូរមកហើយ ដើម្បីដោះស្រាយបញ្ហានៅព្រំដែនកម្ពុជា និងថៃ ដែលជាទីកន្លែងប៉ះទង្គិចប្រដាប់អាវុធ សម្លាប់អស់មនុស្សជាច្រើននាក់ កាលពីដើមឆ្នាំនេះ។
លោក Thani Thongpakdi អ្នកនាំពាក្យក្រសួងការបរទេសថៃ មិនអាចទាក់ទងសុំការអត្ថាធិប្បាយបានទេ កាលពីម្សិលមិញ។
ក្នុងពេលដំណាលគ្នានេះដែរ មន្រ្តីខេត្តឧត្តរមានជ័យ បានថ្លែងកាលពីម្សិលមិញថា កម្ពុជា និងថៃ នឹងបើកច្រកត្រួតពិនិត្យព្រំដែន ២ បន្ថែមទៀត ក្នុងខេត្តនេះ នៅខែក្រោយ ក្នុងគោលបំណងសម្របសម្រួលពាណិជ្ជកម្ម។
លោក ពេជ្រ សុឃិន អភិបាលខេត្តឧត្តរមានជ័យ បានថ្លែងថា៖ «យើងចង់ឲ្យប្រជាជនទាំងពីរ ដែលរស់នៅក្នុងភូមិ និងឃុំជិតខាងគ្នា អាចផ្លាស់ប្តូរទំនិញនិងផលិតផលទៅវិញទៅមក»។
លោកបានបន្តថា ច្រកត្រួតពិនិត្យព្រំដែន ២ ថ្មីនេះ ស្ថិតក្នុងស្រុកបន្ទាយអំពិល នឹងតភ្ជាប់ជាមួយនឹងខេត្តបូរីរាំ និងខេត្តសូរិន្ទរបស់ថៃ។
ទោះជាយ៉ាងណា លោក ពេជ្រ សុឃិន បានចង្អុលបង្ហាញថា ប្រសិនគេចង់ចូលទៅកាន់ប្រទេសណាមួយនោះ ពួកគេអាចឆ្លងកាត់បានតែតាមច្រកទ្វារអន្តរជាតិតែប៉ុណ្ណោះ៕
No comments:
Post a Comment