ទ័ពអាកាសអាមេរិក ផ្តល់ជំនួយផ្នែកពេទ្យ ដល់ប្រជាជនកម្ពុជា ៤.០០០នាក់

ថ្ងៃទី១០-០៨-២០១១
dap-news

ភ្នំពេញ៖ បុគ្គលិកទ័ពអាកាសសហរដ្ឋអាមេរិក ប្រហែល៦០នាក់ រួមជាមួយសមភាគីកម្ពុជាមកពី កងសន្តិសុខ ក្រុមវិស្វកម្ម និងក្រុមគ្រូពេទ្យ នៃកងយោធពល​ខេមរភូមិន្ទ បានធ្វើសកម្មភាពផ្តល់
ជំនួយ ​ផ្នែកពេទ្យ ដល់ប្រជាជន៤.០០០នាក់។

យោងតាមសេចក្តីប្រកាសព័ត៌មានរបស់ស្ថានទូតអាមេរិក ប្រចាំកម្ពុជា ដែលមជ្ឈមណ្ឌលព័ត៌មាន​ដើមអម្ពិលទទួលបាននៅថ្ងៃទី១០ ខែសីហា ឆ្នាំ២០១១នេះ បានឲ្យដឹងថា កាលពីថ្ងៃទី៩ ខែសីហា បុគ្គលិកទ័ពអាកាសសហរដ្ឋអាមេរិកប្រហែល៦០នាក់ មកពីអង្គភាពឆ្មាំការពារជាតិនៅរដ្ឋ North Carolina និងរដ្ឋ Idaho បញ្ជាការដ្ឋានទ័ពអាកាសបម្រុង និងអង្គភាពកម្លាំងទ័ពអាកាសទី១៣ របស់សហរដ្ឋអាមេរិក ប្រចាំតំបន់ប៉ាស៊ីហ្វិក បានចូលរួមជាមួយបុគ្គលិកកង​យោធពល​ខេមរភូមិន្ទ និងអង្គការមិនមែនរដ្ឋាភិបាលក្នុងស្រុក ដើម្បីធ្វើសកម្មភាពផ្តល់​ជំនួយផ្នែកពេទ្យ​ដល់ប្រជាជន​៤.០០០នាក់ ដែលជាកម្មវិធីរបស់កង​វិស្វកម្មដល់ជន​ស៊ីវិល ជួសជុល​មណ្ឌលសុខភាពសាលារៀន ដើម្បីធ្វើការផ្លាស់ប្តូរគ្នាលើខ្លឹមសារប្រធានបទសុខភាព និងប្រតិបត្តិការ​សង្រ្គោះមនុស្សធម៌តាមអាកាស។

បេសកកម្មរយៈពេលមួយសប្តាហ៍នេះ មានឈ្មោះថា “ប្រតិបត្តិការទេវតាតំបន់ប៉ាស៊ីហ្វិក១១-១” គឺជាផ្នែកមួយ​នៃសកម្មភាពរួមគ្នាផ្នែកជំនួយមនុស្សធម៌ ដែលមានជាបន្តបន្ទាប់ និងចូលរួមដោយ​អង្គភាព​យោធាកម្ពុជា អង្គការមិនមែនរដ្ឋាភិបាលក្នុងស្រុក និងក្រុមទ័ពអាកាសសហរដ្ឋអាមេរិក​ប្រចាំតំបន់ប៉ាស៊ីហ្វិក។

ឯកអគ្គរដ្ឋទូតសហរដ្ឋអាមេរិកប្រចាំកម្ពុជា លោកស្រី ខារ៉ូ រ៉ូដលី មានប្រសាសន៍ថា បេសកកម្មនេះ គឺជាផ្នែកមួយនៃប្រតិបត្តិការទេវតានៅតំបន់ប៉ាស៊ីហ្វិក សហរដ្ឋអាមេរិក និងកម្ពុជា មានការប្តេជ្ញាចិត្ត ក្នុងការផ្លាស់ប្តូរទស្សនៈ ការអនុវត្តន៍ជាក់ស្តែង ដែលនឹងធ្វើឲ្យយើងអាចឆ្លើយតបរួមគ្នាបានល្អ ចំពោះវិបត្តិជំនួយមនុស្សធម៌។

លោកស្រីបន្តថា “ទំនាក់ទំនងដែលយើងកសាង និងថែរក្សាតាមរយៈប្រតិបត្តិការយោធានេះ នឹងជួយយើងក្នុងការងារថែរក្សាសន្តិភាពនិងស្ថេរភាពក្នុងតំបន់”។

លោកស្រីថា នេះជាឆ្នាំទី៤ ហើយ ដែលប្រតិបត្តិការទេវតាតំបន់ប៉ាស៊ីហ្វិក​ជួយការងារ​លើកកម្ពស់សមត្ថភាពរបស់បញ្ជាការដ្ឋាន នៃកងទ័ពសហរដ្ឋអាមេរិកប្រចាំ​នៅតំបន់ប៉ាស៊ីហ្វិក ដោយធ្វើជាដៃគូរជាមួយរដ្ឋាភិបាលដទៃទៀត នៅតំបន់ប៉ាស៊ីហ្វិក ក្នុងការផ្តល់ជំនួយផ្នែកវិស្វកម្ម ទន្តពេទ្យ ពេទ្យសត្វ និងជំនួយវិស្វកម្មដល់​ពលរដ្ឋរបស់គេ។

ចាប់តាំងពីឆ្នាំ២០០៧មក សមាជិកយោធាអាមេរិក បានធ្វើការ ក្នុងភាពជាដៃគូ​ជាមួយសមភាគី​នៃកងយោធពលខេមរភូមិន្ទ ដើម្បីធ្វើឲ្យប្រសើរឡើងដល់សុខភាព ប្រជាពលរដ្ឋកម្ពុជា​រាប់ម៉ឺននាក់តាមរយៈគម្រោងជំនួយមនុស្សធម៌ជាច្រើន៕