ថ្ងៃទី២១-០៧-២០១១
kohsantepheapdaily.comខេត្តកំពត ៖ ប្រជាពលរដ្ឋភូមិព្រិច ឃុំបឹងនីមល ស្រុកឈូក កាលពីព្រឹកថ្ងៃទី២០ កក្កដា បាននាំគ្នាធ្វើពិធីបួងសួងសុំទឹកភ្លៀង ដែលក្នុងពិធីបួងសួងនោះ ក៏មានការនិមន្តព្រះសង្ឃសូត្រមន្តផងដែរ។ ស្ត្រីចំណាស់ឈ្មោះផាង អ៊ អាយុ៥៥ឆ្នាំ រស់នៅភូមិព្រិច បាននិយាយថាដោយសារតែមានកម្តៅខុសពីធម្មតាហើយមិនទាន់មានភ្លៀង ធ្លាក់សម្រាប់បង្កបង្កើនផលទើបអ្នកភូមិផ្តើមគំនិត ធ្វើពិធីបុណ្យបួងសួងសុំទឹកភ្លៀង។
ស្ត្រីម្នាក់ទៀតបាននិយាយថា រដូវវស្សាបានចូលមកដល់ហើយអ្នកភូមិស្ទើរតែទាំងអស់មិនទាន់បាន សាបព្រោះដកស្ទូងនៅឡើយទេ ព្រោះមិនមានទឹក។ ចំណែកឯលោកអាចារ្យប៉ែន ហុន អាយុ៦៤ឆ្នាំ បានឱ្យដឹងថា ការធ្វើពិធីបួងសួង និងនិមន្តព្រះសង្ឃសូត្រមន្តនេះ គឺជាជំនឿតៗគ្នាជាយូរមកហើយ ឱ្យតែចូលរដូវវស្សាមិនមានភ្លៀងធ្លាក់សម្រាប់ភ្ជួររាស់ដកស្ទូង អ្នកភូមិតែងតែនាំគ្នាធ្វើបុណ្យនៅមុខខ្ទមតាព្រហ្មនេះដើម្បី សុំឱ្យមានទឹកភ្លៀង។ លោកអាចារ្យបានបន្តថានៅឆ្នាំមុនៗអ្នកភូមិមិនដែលរវល់នាំគ្នា ធ្វើពិធីបុណ្យសុំទឹកភ្លៀងទេ ទើបតែនៅឆ្នាំ២០១១នេះ មិនមានភ្លៀងធ្លាក់ទើបនាំគ្នាមកធ្វើពិធីបែបនេះ។ ពិធីបុណ្យបួងសួងសុំទឹកភ្លៀងនេះត្រូវបាននិមន្តព្រះសង្ឃ សូត្រមន្តមួយយប់ លុះព្រឹកឡើងអ្នកភូមិជីករណ្តៅឱ្យសមល្មមហើយនាំគ្នារែកទឹកចាក់ ឱ្យពេញរណ្តៅហើយត្រូវចាប់ក្តាម ខ្យង កង្កែប ត្រីយកមកលែងក្នុងរណ្តៅដីរួចនិមន្តព្រះសង្ឃ សូត្រមន្តដែលចាស់បុរាណហៅពិធីបែបនេះថា ជាធម៌បង្វិលអាកាស ឬដាស់សក្កទេវរាជឱ្យបើកអាកាសទម្លាក់ទឹកភ្លៀង។
លោកទោល យ៉ាង មេឃុំបឹងនីមលបានប្រាប់កោះសន្តិភាពថា នេះជាជម្រើសចុងក្រោយហើយរបស់ប្រជាពលរដ្ឋនៅឃុំបឹងនីមល។ ពួកគាត់ធ្វើពិធីសូត្រមន្ត និងបួងសួងសុំឱ្យសក្កទេវរាជបង្អុរភ្លៀងមក។ ប្រជាពលរដ្ឋនៅឃុំបឹងនីមលមានចំនួន១.២៣១គ្រួសារ ទើបតែសាបសំណាបបានត្រឹមតែ១០ភាគរយទេ ហើយការសាបនោះទៀត គឺពួកគាត់បានទឹកបូមមកពីត្រពាំង ស្រះដែលមានទឹកដក់បន្តិចបន្តួចមកចិញ្ចឹមសំណាប។ លោកមេឃុំបន្តថា ផ្ទៃដីស្រែរាប់រយហិកតា ក៏មិនទាន់បានភ្ជួរនៅឡើយដែរ ប៉ុន្តែបើតាមការសង្កេតមើលកសិកធ្វើស្រែក្នុងរដូវវស្សាឆ្នាំនេះ នៅតាមបណ្តាស្រុកនានា មួយចំនួនបានសាបសំណាបអស់ទៅហើយតែស្រុកខ្លះក៏ជួប នឹងគ្រោះរាំងស្ងួតនៅឡើយ៕
No comments:
Post a Comment