មន្ត្រីជាន់ខ្ពស់ក្រសួងវប្បធម៌ អំពាវនាវឱ្យមានការជួយឧបត្ថម្ភដល់កម្មវិធីវប្បធម៌
ផ្សាយថ្ងៃទី១៦-១១-២០១១: ដកស្រង dap-news
ភ្នំពេញ៖ មន្ត្រីជាន់ខ្ពស់ក្រសួងវប្បធម៌ និងវិចិត្រសិល្បៈ នៅថ្ងៃពុធ ទី១៦ ខែវិច្ឆិកា
ឆ្នាំ២០១១ បានថ្លែងដោយអំពាវនាវឱ្យមានការឧបត្ថម្ភដល់កម្មវិធីសិល្បៈនានា ដែលត្រូវមានគម្រោងរៀបចំជាបន្តបន្ទាប់នាពេលអនាគត។
ថ្លែងក្នុងសន្និសីទសារព័ត៌មាននៅទីស្តីការក្រសួងវប្បធម៌ និងវិចិត្រសិល្បៈ លោក ឱក សុផុន អគ្គនាយកនៃអគ្គនាយកដ្ឋានបច្ចេកទេសវប្បធម៌ បានថ្លែងថា ដោយមិនត្រូវបានទទួលការចំណាយពីថវិកាជាតិនៅក្នងម្មវិថីវប្បធម៌នោះ លោកសូមអំពាវនាវឱ្យបណ្តាក្រុមហ៊ុន និងសប្បុរសជននានា ចូលរួមផ្តល់ការគាំទ្រទាំងស្មារតី បច្ចេកទេស និងថវិកាដល់ដំណើរការរៀបចំកម្មវិធីវប្បធម៌នានា។
លោកបានបន្តថា នៅខែធ្នូ ខាងមុខនឹងមានព្រឹត្តិការណ៍ធំពីរ «គឺមហោស្រពខ្លែងធ្វើនៅកោះពេជ្រ ថ្ងៃទី១០ និងព្រឹត្តិការណ៍មួយទៀតនៅសៀមរាប ក្រសួងសម្រេចយក ថ្ងៃទី៣០-៣១ និងទី១ប្រារព្ធខួបអនុស្សាវរីយ៍វប្បធម៌ ដែលអង្គការយូនីស្កូទទួលស្គាល់វប្បធម៌ទាំងរូបិយ និងអរូបិយចូលជាសម្បត្តិបេតិកភ័ណ្ឌពិភពលោករបស់មនុស្សជាតិ ធ្វើនៅភូមិវប្បធម៌ ហើយលោកក៏បានអំពាវនាវឱ្យមានការគាំទ្រផ្នែកថវិកាពីមជ្ឈដ្ឋាន ទូទៅផងដែរ ដើម្បីបង្ហាញថា ខ្មែរកំពុងថែរក្សាសម្បត្តិវប្បធម៌របស់ខ្លន»។
លោក ឃឹម សារិទ្ធ រដ្ឋលេខាធិការក្រសួងវប្បធម៌ បានមានប្រសាសន៍ថា ការប្រឡងជ្រើសរើសយកចំណាត់ថ្នាក់លេខ១ ទាំងចម្រៀងបុរាណ សម័យ ថ្នាក់ជាតិ ថ្នាក់រាជធានី ខេត្ត បានចប់មួយរយភាគរយ បេក្ខជន បេក្ខនារី៤រូប ក្នុងរាជធានី ខេត្តនីមួយៗនឹងត្រូវមកចូលរួមប្រឡងជម្រុះនៅមជ្ឈមណ្ឌលកោះពេជ្រ ថ្ងៃទី៣ ខែធ្នូ ឆ្នាំ២០១១។
លោក បន្តថា ការរៀបចំប្រឡងនឹងធ្វើនៅសាលមហោស្រពថ្មីចំណុះ៣០០០កៅអី បំពាក់ដោយឧបករណ៍ទំនើបបំផុតសម្រាប់កម្ពុជា ហើយភ្ញៀវកិត្តិយសអាចចូលរួម ទស្សនាដោយសេរី លើកលែងតែថ្ងៃបើកកម្មវិធី និងបិទកម្មវិធី ហើយ លោកបានសំណូមពរ ដល់ទស្សនិកជន ជាស្ត្រីមិនគួរស្លៀកសារុង ចូលទស្សនាឡើយ។ លោកបញ្ជាក់ទៀតថា បេក្ខជន បេក្ខនារី មកពីក្រៅប្រទេសមាន ទីក្រុងឡូវែល ឡុងប៊ិច រដ្ឋវ៉ាស៊ីនតោន(ស.រ.អា) កាណាដា ប៉ារីស អូស្ត្រាលី នឹងមកដល់កម្ពុជានៅមុនថ្ងៃទី១២ ខែធ្នូ ឆ្នាំ២០១១។
អ្នកទទួលបន្ទុកចាត់ចែងការស្នាក់អាស្រ័យរបស់សិល្បករ សិល្បការិនី លោក ទិត ថាវរិទ្ធ បាននិយាយថា ថ្វីត្បិតតែការរៀបចំតែងតែជួបការប្រឈមក៏ដោយ តែលោកនឹងខិតខំឱ្យអស់ពីលទ្ធភាព ធ្វើយ៉ាងណាឱ្យពួកគេ និងអ្នករួមដំណើរបានស្រួលទាំងអស់គ្នា តាមវប្បធម៌ចែករំលែក។ លោកបន្ថែមថា ឆ្នាំនេះ លោកសង្ឃឹមថា និងបានប្រសើរជាងឆ្នាំមុន ក្នុងការចាត់ចែង ដោយក្រុមការងាររបស់លោក បានធ្វើសេចក្តីព្រាងវិន័យខ្លះដល់សិល្បករ សិល្បការិនី និងឱ្យពួកគេប្រើប្រព័ន្ធទូរស័ព្ទតែមួយពេលមកដល់ភ្នំពេញ ដើម្បីងាយស្រួលក្នុងការផ្តល់ព័ត៌មាន។
ការថែរក្សាវប្បធម៌ជាតួនាទីរបស់យើងទាំងអស់គ្នា ដូច្នេះ យើងជាខ្មែរត្រូវពួតដៃគ្នាការពារ ថែរក្សា វប្បធម៌របស់យើងទាំងអស់គ្នា៕
No comments:
Post a Comment