ផ្សាយថ្ងៃទី២០-០៣-២០១២: ដកស្រងbayontv.com.kh
ភ្នំពេញ៖ ប្រទេសកម្ពុជាកំពុងតែខិតខំប្រឹងប្រែងដើម្បីរៀបចំនូវកិច្ចព្រម ព្រៀងដើម្បីភ្ជាប់ការហោះហើរត្រង់ជាមួយប្រទេសលុចហ្សំបួរ ប្រទេសយេមែន និងប្រទេសអាយលែនក្នុង ខណ: ដែលចំនួនភ្ញៀវទេសចរអន្តរជាតិ ដែលចូលមកទស្សនាក្នុងប្រទេសកម្ពុជា កាន់តែមានការកើនឡើងពីមួយថ្ងៃទៅមួយថ្ងៃ។
មានប្រសាសន៍ប្រាប់ទូរទស្សន៍បាយ័ននៅព្រឹកថ្ងៃអង្គារទី២០ ខែមីនា នេះ លោកស្រី ទេព ស៊ុនធារី ប្រធាននាយកដ្ឋានដឹកជញ្ជូនផ្លូវអាកាសនៃរដ្ឋលេខាធិការដ្ឋាន អាកាសចរណ៍ស៊ីវិលកម្ពុជា បានពន្យល់ថា ជំហានដំបូង ខាងភាគីនៃប្រទេសលុចហ្សំបួរ យេមែន និងអាយលែននោះ តាក់តែងច្បាប់ទម្លាប់ជាមុនសិន បន្ទាប់មកទៀត នឹងមានការចាប់ផ្តើមជជែក ពិភាក្សាគ្នាអំពីការហោះហើរត្រង់ ប៉ុន្តែពេលនេះ កិច្ចព្រមព្រៀងសម្រាប់ការហោះហើរត្រង់ជាមួយប្រទេសទាំងនោះ គឺកំពុងស្ថិតនៅក្នុងពង្រាងនៅឡើយ។លោកស្រីទេព ស៊ុនធារី បានបង្ហើបឲ្យដឹងថា ក្នុងពង្រាងនៃកិច្ចព្រមព្រៀងនោះ គឺមានច្រើន ជំពូកពាក់ព័ន្ធនឹងការដឹកជញ្ជូនតាមផ្លូវអាកាស ដូចជាជំពូកនិយាយអំពីផលរបរ អំពីករណីពន្ធដារ និង បណ្តឹងវិវាទជាដើម។លើសពីនេះ លោកស្រីទេព ស៊ុនធារី ក៏បានបញ្ជាក់ថា ពង្រាងនៃកិច្ចព្រមព្រៀងជាមួយ ប្រទេសទាំងបីនោះ មានកម្រាស់ពី២៨ ទៅ ៣០ទំព័រ ។លោកហូរ វណ្ឌី សហប្រធានក្រុមការងារទេស
ចរណ៍ផ្នែកវិស័យឯកជន បានសម្តែងនូវ អំណរសាទរចំពោះគម្រោងការហោះហើរត្រង់រវាងប្រទេសកម្ពុជា ជាមួយប្រទេសលុចហ្សំបួរ យេមែន និង អាយលែននោះ។លោកហូរ វណ្ឌីបានមានប្រសាសន៍ថា រហូតមកដល់ពេលបច្ចុប្បន្ននេះ ភ្ញៀវទេសចរ អន្តរជាតិដែលចូលមកទស្សនាក្នុងប្រទេសកម្ពុជា ក៏មានមកពីប្រទេសលុចហ្សំបួរ យេមែន និង អាយលែនដែរ ក៏ប៉ុន្តែលោកអះអាងថា ចំនួនភ្ញៀវទេសចរដែលមកពីប្រទេសទាំងបីនោះ នៅមានចំនួនតិចតួចនៅឡើយ បើប្រៀបធៀបជាមួយភ្ញៀវទេសចរអន្តរជាតិដែលមកពីប្រទេសជាច្រើន ផ្សេងទៀត។ជាមួយគ្នានេះ លោក ហូរ វណ្ឌី បានកត់សម្គាល់ថា ភ្ញៀវទេសចរ
ដែលមកពីប្រទេស លុចហ្សំបួរ យេមែន និងអាយលែន ភាគច្រើនចូលមកទស្សនាក្នុងប្រទេសកម្ពុជារយ:ពេល ០៤ ថ្ងៃ ០៣ យប់ ។ដោយឡែក
ចំពោះចំណាយចាយរបស់ភ្ញៀវទេសចរដែលមកពីប្រទេសទាំងបីនេះ នៅក្នុង ប្រទេសកម្ពុជាវិញលោកហូរ វណ្ឌី បានធ្វើការប្រៀបធៀបថា ការចំណាយរបស់ពួកគេ គឺមាន ចំនួនប្រហាក់ប្រហែលនឹងភ្ញៀវទេសចរមកពីប្រទេសជាច្រើនក្នុងទ្វីប អឺរ៉ុបដែរ។
លោកហូរ វណ្ឌី បានបញ្ជាក់ថា ភាគច្រើន ភ្ញៀវទេសចរដែលមកពីប្រទេសលុចហ្សំបួរ យេមែន និង អាយលែនម្នាក់ បានចំណាយប្រមាណពី ៣៥០ ទៅ ៦០០ ដុល្លាអាមេរិក ក្នុងពេល ដែលពួកគេស្នាក់នៅក្នុងប្រទេសកម្ពុជា ដែលក្នុងនោះ គឺចំណាយទៅលើការស្នាក់នៅ ការទទួលទានអាហារ ការទិញសំបុត្រសម្រាប់ចូលទស្សនាកម្សាន្តនៅតាមរមណីយដ្ឋាន និងការចំណាយ ទៅលើមគ្គុទេសទេសចរណ៌ជាដើម៕
No comments:
Post a Comment