ភ្នំពេញ ៖ ក្រុមអ្នកស្រាវជ្រាវបាន ប្រកាសកាលពីថ្ងៃទី០៥ ខែធ្នូ ថា តេលេស្កុបស្វែងរកភព Kepler របស់អង្គការណាសា បានបញ្ជាក់អំពីការរកឃើញភពផ្កាយដំបូងនៅក្នុងតំបន់អាចរស់នៅបាន និងដែលមានទឹក។ របកគំហើញថ្មីនេះ បានធ្វើឲ្យ Kepler រកឃើញភពដ៏មានសក្តានុពលសរុបចំនួន ២,៣២៦ ភព ក្នុងរយៈពេល ១៦ខែ ដំបូងនៃប្រតិបត្តិការរបស់ខ្លួន។
ភពផ្កាយអាចរស់នៅបាននេះ វិលជុំវិញតារាមួយដែលសឹងតែដូចព្រះអាទិត្យយើង។ អ្នកវិទ្យាសាស្ត្រនិយាយថា របកគំហើញថ្មីនេះ ធ្វើឲ្យអ្នកវិទ្យាសាស្ត្រខិតជិតជំហានមួយទៀត ដើម្បីរកភពមួយដែលដូចនឹងភពផែនដីរបស់យើង។ លោក Pete Worden អគ្គនាយកនៃមជ្ឈមណ្ឌលស្រាវជ្រាវ Ames នៅ Moffett Field រដ្ឋកាលីហ្វួរញ៉ា បាននិយាយក្នុងសន្និសីទព័ត៌មាន កាលពីថ្ងៃទី០៥ ខែធ្នូ ថា «យើងកំពុងខិតកាន់តែជិតក្នុងការរកភពដែលគេហៅថា «ភព Goldilocks»។ ភពថ្មីនៅតំបន់រស់នៅបាននេះ មានឈ្មោះ Kepler-22b។ វាមានចម្ងាយពីផែនដីប្រមាណ ៦០០ ឆ្នាំពន្លឺ ដោយវិលជុំវិញតារាមួយដែលដូចនឹងព្រះអាទិត្យ។ កាំរបស់ភពនេះ ធំជាង ២.៤ ដង នៃកាំផែនដី ហើយភពទាំងពីរនេះ មានសីតុណ្ហភាពស្រដៀងគ្នាយ៉ាងខ្លាំង។
បើផលផ្ទះកញ្ចក់ដំណើរការនៅទីនោះ ស្រដៀងគ្នានឹងរបៀបដែលវាដំណើរការនៅលើផែនដី នោះសីតុណ្ហភាពមធ្យមលើផ្ទៃភព Kepler-22b នឹងមានសីតុណ្ហភាព ៧២ អង្សារហ្វារ៉េនហៃ (២២ អង្សារសេ)៕
No comments:
Post a Comment