កម្ពុជាចង់ឲ្យរៀបចំជំនួបពាណិជ្ជកម្មអាស៊ាន-EU
ផ្សាយថ្ងៃទី១៤-១០-២០១១: ដកស្រង postkhmer
ភ្នំពេញៈ លោក ចម ប្រសិទ្ធ រដ្ឋមន្ត្រីក្រសួងពាណិជ្ជកម្ម បានអំពាវនាវឲ្យសហភាពអឺរ៉ុប និងសភាពាណិជ្ជកម្មអឺរ៉ុបនៅកម្ពុជា ធ្វើជាតំណាងរៀបចំជំនួបកំពូលពាណិជ្ជកម្មអឺរ៉ុប-អាស៊ាន នៅឆ្នាំក្រោយ ដែលជាសន្និសីទលើកដំបូងនៅប្រទេសកម្ពុជា។
កាលពីថ្ងៃពុធលោក ចម ប្រសិទ្ធ រដ្ឋមន្ត្រីក្រសួងពាណិជ្ជកម្មកម្ពុជាបានជួបប្រជុំជាលក្ខណៈឯកជនមួយ ជាមួយមន្ត្រីសភាពពាណិជ្ជកម្មអឺរ៉ុបនៅកម្ពុជា។ នេះបើតាមមន្ត្រីដែលបានចូលរួមនៅក្នុងកិច្ចប្រជុំនេះ។
លោក Thomas Sterling អនុប្រធានសភាពាណិជ្ជកម្មអឺរ៉ុប និងជានាយកគ្រប់គ្រងរបស់ក្រុមហ៊ុន Sterling Project Management បានឲ្យដឹងថា ទោះបីជារបៀបវារៈនៃសន្និសីទនេះ មិនទាន់បានលើកយកមកពិភាក្សាក្តី ប៉ុន្តែត្រូវគេរំពឹងថានឹងផ្តោតជាសំខាន់លើការលើកកម្ពស់យុទ្ធ សាស្ត្រពាណិជ្ជកម្ម ដើម្បីពង្រីកចំណងទាក់ទងរវាង
កម្ពុជា និងបណ្តាប្រទេសនៅអឺរ៉ុប។ លោកបានលើកឡើងថា៖ «ចំណុចរួមនៃជំនួបកំពូលនេះ គឺដើម្បីផ្តល់របាយការណ៍ជាយុទ្ធសាស្ត្រមួយ ដែលនឹងលើកឡើងពីគម្រោងសង្ខេបនៃការធ្វើពាណិជ្ជកម្មនៅកម្ពុជា ក្នុងរយៈពេលពី១០ ទៅ១៥ឆ្នាំខាងមុខទៀត។ បើតាមការសង្ឃឹមទុក របាយការណ៍នេះនឹងទាក់ទាញការវិនិយោគបន្ថែមទៀត នៅកម្ពុជា»។
លោកបានឲ្យដឹងទៀតថា ខណៈពេលដែលវិធានផ្សេងៗគ្នា ត្រូវបានគេយកមកអនុវត្តនៅបណ្តាប្រទេសជាសមាជិកអាស៊ាន ដើម្បីនាំចេញ នាំចូលទៅមកក្នុងបណ្តាប្រទេសនៅអឺរ៉ុប ប្រទេសកម្ពុជា មានសំណាងដោយបានទទួលកូតានាំទំនិញ
គ្រប់យ៉ាងទៅកាន់អឺរ៉ុបដោយ មិនគិតពន្ធ នៅក្រោមគម្រោង «អ្វីៗគ្រប់យ៉ាងលើកលែងតែអាវុធ»។
លោក Sterling បានបន្ថែមថា រដ្ឋាភិបាលពេញចិត្តនឹងឲ្យសភាពាណិជ្ជកម្មអឺរ៉ុបដឹកនាំ
សន្និសីទនេះ ដោយសារតែប្រទេសជាសមាជិករបស់សភានេះ ភាគច្រើន មានបទពិសោធជាច្រើនក្នុងការធ្វើពាណិជ្ជកម្មនៅកម្ពុជា។
លោកលើកឡើងថា៖ «ជំហានបន្ទាប់គឺការអង្គុយរួមគ្នា ហើយចាប់ផ្តើមធ្វើផែនការ ដែលរាប់បញ្ចូលទាំងការស្វែងរកជំនួយផងដែរ»។ លោក Sterling បានបន្ថែមថា ចំណាប់អារម្មណ៍របស់វិនិយោគិននៅកម្ពុជាឆ្លុះបញ្ចាំងឲ្យឃើញតាមរយៈ សិក្ខាសាលារបស់ IBC ដែលបានរៀបចំឡើងនៅភ្នំពេញក្នុងសប្តាហ៍នេះ។
សមាជិកផ្សេងៗទៀតរបស់សភាពាណិជ្ជកម្មអឺរ៉ុប បានស្វាគមន៍ចំពោះសន្និសីទដែលគ្រោងនឹងធ្វើនៅខែមេសា ឆ្នាំ២០១២ខាងមុខនេះ។
លោក Daniel Parkes សមាជិកប្រតិភូសភាពាណិជ្ជកម្មអឺរ៉ុប និងជានាយកប្រចាំប្រទេសរបស់ ក្រុមហ៊ុន CBRE បានប្រាប់ភ្នំពេញ ប៉ុស្តិ៍កាលពីម្សិលមិញថា៖ «នេះជា
ករណីដ៏សំខាន់សម្រាប់បង្ហាញពីភាពដឹកនាំប្រទេសរបស់ កម្ពុជា នៅក្នុងអាស៊ាន និងជាឱកាសមួយបង្ហាញឲ្យពិភពលោក មើលឃើញពីប្រយោជន៍ក្នុងការមកវិនិយោគនៅទីនេះ»។
លោកបានបន្ថែមទៀតថា ជំនួបពាណិជ្ជកម្មដ៏ធំនេះ មិនមែនជាជំនួបទូទៅនៅអាស៊ាន
ឡើយ ដូច្នេះប្រទេសកម្ពុជាគួរតែចាប់យកឱកាសនេះ។
ជំនួបពាណិជ្ជកម្មអឺរ៉ុប អាស៊ាន កាលពីលើកមុន ធ្វើឡើងនៅទីក្រុងហ្សាការតា ប្រទេសឥណ្ឌូនេស៊ី បច្ចុប្បន្នជាប្រធានអាស៊ាន។
មិនអាចទាក់ទងមន្ត្រីក្រសួងពាណិជ្ជកម្មបានទេ កាលពីថ្ងៃម្សិលមិញ៕
No comments:
Post a Comment