ពលរដ្ឋនៅទីក្រុងបាងកកជម្លៀសខ្លួនចេញពីអាសន្នធំ
ផ្សាយថ្ងៃទី២៧-១០-២០១១: ព័ត៌មានអន្ដរជាតិដកស្រង postkhmer
បាងកកៈ ប្រជាជនរស់នៅក្នុងរាជធានីបាងកក បានជម្លៀសខ្លួនចេញពីទីក្រុងដ៏ធំមួយនេះ នៅថ្ងៃព្រហស្បតិ៍នេះ បន្ទាប់ពីអាជ្ញាធរបានប្រកាសព្រមានថា ទីក្រុងមួយនេះនឹងត្រូវទឹកជន់លិចក្នុងពេលឆាប់ៗ និងបានប្រកាសឲ្យប្រជាជនឈប់សម្រាកពីការងារចំនួន ៥ថ្ងៃ ដើម្បីគេចចេញពីអាសន្នធំមួយនេះ។
ចរាចរណ៍នៅកណ្ដាលរាជធានីបាងកក មានសភាពស្ងប់ស្ងាត់ ខណៈពេលថ្ងៃឈប់សម្រាកពិសេសនេះ បានចាប់ផ្ដើមនៅថ្ងៃនេះ ប៉ុន្តែ ផ្លូវធំមួយនៅខាងក្រៅរាជធានីនេះ ដែលតភ្ជាប់ទីក្រុងនេះទៅតំបន់ភាគខាងត្បូងដែលពុំមានទឹកជំនន់នោះ បានកកស្ទះចរចរណ៍យ៉ាងខ្លាំង។ មនុស្សជាច្រើន កំពុងតែតម្រង់ឆ្ពោះទៅទីក្រុងផាតតាយ៉ា ទីក្រុងនៅមាត់សមុទ្រ ជាទីដែលមនុស្សម្នាពិបាកស្វែងរកបន្ទប់សណ្ឋាគារ និងផ្ទះសម្បែងសម្រាប់ជួលណាស់។
រូបភាពនៅតាមទូរទស្សន៍ បានបង្ហាញនូវសភាពកកស្ទះចរាចរណ៍នៅតាមច្រកត្រួតពិនិត្យការចេញចូលនៅព្រលានយន្តអន្តរជាតិសុវណ្ណភូមិ។ ព្រលានយន្តហោះដនមឿង ដែលជាព្រលានយន្តហោះចំណាសនៅទីក្រុងនេះ សព្វថ្ងៃនេះត្រូវបានគេប្រើប្រាស់សម្រាប់ការហោះហើរនៅក្នុងស្រុកនោះ ត្រូវបិទទ្វារហើយដោយសារតែទឹកជំនន់កាលពីថ្ងៃព្រហស្បតិ៍។
បណ្ដាធនាគារ និងទីផ្សារហិរញ្ញវត្ថុ នឹងនៅបន្តបើកទ្វារចាប់ពីថ្ងៃព្រហស្បតិ៍រហូតដល់ថ្ងៃចន្ទខាងមុខ។ ហាងលក់ទំនិញនានានៅរាជធានីបាងកក នៅតែបន្តបើកទ្វារដូចនៅថ្ងៃឈប់សម្រាកធម្មតាដែរ។
ទឹកជំនន់ដ៏អាក្រក់បំផុតនៅក្នុងប្រទេសថៃក្នុងរយៈពេលកន្លះសតវត្សរ៍ចុងក្រោយនេះ ដែលបង្កឡើងដោយទឹកភ្លៀងធ្លាក់ហួសពីធម្មតានោះ បានសម្លាប់មនុស្សយ៉ាងតិច ៣៧៣នាក់ហើយ គិតចាប់តាំងពីពាក់កណ្ដាលខែកក្កដា ហើយបានរំខានដល់ជីវិតរស់នៅរបស់មនុស្សជិត ២,៥លាននាក់ ដោយមនុស្សជាង ១១៣ ០០០នាក់កំពុងរស់នៅក្រោមជម្រកបណ្ដោះអាសន្ន និងមនុស្សចំនួន ៧២០ ០០០នាក់ទៀត កំពុងត្រូវការសេវាសុខភាព៕
No comments:
Post a Comment