ពាណិជ្ជកម្មទ្វេភាគី កម្ពុជា-ចិនកើនយ៉ាងគំហុកក្នុងរយៈពេល៨ខែនៅឆ្នាំ២០១១
ផ្សាយថ្ងៃទី១១-១០-២០១១: ដកស្រង postkhmer
ភ្នំពេញៈ ទំហំពាណិជ្ជកម្មទ្វេភាគីរវាងកម្ពុជា និងចិន ក្នុងរយៈពេល៨ខែ ឆ្នាំ២០១១ បានកើនឡើងដល់១,៤៣ពាន់លានដុល្លារ ដែលចំនួននេះជិតស្មើនឹងទំហំពាណិជ្ជកម្មសម្រាប់ឆ្នាំ២០១០។ នេះបើតាមលោក Jin Yuan អ្នកផ្តល់ប្រឹក្សាសេដ្ឋកិច្ច និងពាណិជ្ជកម្មនៅស្ថាន
ទូតចិនប្រចាំនៅប្រទេសកម្ពុជា។
លោក Jin Yuan បានថ្លែងក្នុងពិធីប្រារព្ធខួប១០ឆ្នាំរបស់ក្រុមហ៊ុនផ្គត់ផ្គង់ គ្រឿងអគ្គិសនី របស់ចិនឈ្មោះ Zhengta Co នៅកោះពេជ្រ
កាលពីថ្ងៃអាទិត្យថា ពាណិជ្ជកម្មរវាងប្រទេសទាំងពីរ រយៈពេល៨ខែដំបូង ឆ្នាំ២០១១
ស្ទើរតែស្មើនឹងឆ្នាំ២០១០ទាំងមូល ដែលមានចំនួន ១,៤៤ពាន់លានដុល្លារ។ លោកថ្លែងថា៖ «ផ្អែកលើតួលេខនេះ យើងជឿជាក់ថា ពាណិជ្ជកម្មទ្វេភាគីរវាងកម្ពុជា និងចិន នឹងឈានដល់២ពាន់លានដុល្លារនៅឆ្នាំនេះ»។
លោក Jin Yuan បានឲ្យដឹងថា កំណើនដ៏ខ្លាំងក្លានេះ គឺដោយសារក្រុមហ៊ុនគ្រប់គ្រង
ដោយរដ្ឋ និងក្រុមហ៊ុនឯកជនរបស់ចិន តាំងចិត្តខ្លាំងក្លាក្នុងការវិនិយោគនៅកម្ពុជា ដើម្បីពង្រឹង និងពង្រីកទំនាក់ទំនងរវាងប្រទេសទាំងពីរ។ លោក Jin Yuan បានបន្ថែមថា៖ «យើងកំពុងលើកទឹកចិត្តក្រុមហ៊ុនពីចិនបន្ថែមទៀត ឲ្យមកកម្ពុជា ដើម្បីបង្កើនពាណិជ្ជកម្មរួមគ្នារវាងប្រទេសទាំងពីរ»។
លោក គង់ ពុទ្ធារ៉ា ប្រធាននាយកដ្ឋានស្ថិតិនៅក្រសួងពាណិជ្ជកម្ម បានឲ្យដឹងថា កំណើនពាណិជ្ជកម្មរវាងកម្ពុជា និងចិន ក្នុងរយៈពេល ៨ខែដំបូង ឆ្នាំ២០១១ ដោយសារការកើនឡើងនៃការនាំចេញ នាំចូលរវាងប្រទេសទាំងពីរ។
លោកបានឲ្យដឹងថា ការនាំចូលសំខាន់ៗពីចិន មកកម្ពុជា មានដូចជា សាច់ក្រណាត់
គ្រឿងចក្រ ម្ហូបអាហារ គ្រឿងអេឡិចត្រូនិក ឱសថ និងគ្រឿងសម្អាង ហើយការនាំចេញសំខាន់ៗពីកម្ពុជា ទៅចិនមានដូចជា ផលិតផលកសិកម្ម ជ័រកៅស៊ូ ត្រី ឈើ សម្លៀកបំពាក់ វាយនភណ្ឌមួយចំនួន និងស្បែកជើង។ លោក គង់ ពុទ្ធារ៉ា ថ្លែងថា៖
«យើងសង្ឃឹមថា ពាណិជ្ជកម្មទ្វេភាគីកម្ពុជា ចិន នឹងបន្តកើនឡើងនៅឆ្នាំនេះ និងឆ្នាំ
ក្រោយ»។
តួលេខពីក្រសួងពាណិជ្ជកម្មបង្ហាញថា ពាណិជ្ជកម្មទ្វេភាគីរវាងកម្ពុជា និងចិន នៅឆមាសទីមួយបានកើនឡើង៨២ភាគរយ បើធៀបនឹងរយៈពេលដូចគ្នា កាលពីឆ្នាំ២០១០។ តួលេខបង្ហាញថាពាណិជ្ជកម្មរវាងប្រទេសទាំងពីរ គិតជាទឹកប្រាក់មានចំនួនសរុប ៩១២,៧៦លានដុល្លារ ចាប់ពីខែមករា រហូតដល់ខែមិថុនា ពោលឡើងពី
៥០១លានដុល្លារ កាលពីរយៈពេលដូចគ្នា ឆ្នាំមុន។
ស្ថិតិទទួលបានពីក្រុមប្រឹក្សាអភិវឌ្ឍន៍កម្ពុជា (CDC) បានឲ្យដឹងថា ចិនជាវិនិយោគិនធំជាងគេនៅកម្ពុជា ដោយប្រទេសនេះ បានបណ្តាក់ទុន ៨,៨ពាន់លានដុល្លារ ចាប់ពី
ឆ្នាំ១៩៩៤ ដល់ខែកក្កដា ឆ្នាំ២០១១៕
No comments:
Post a Comment