កម្ពុជាកំពុងរងផលប៉ះពាល់ពីការប្រែប្រួលអាកាសធាតុ
ផ្សាយថ្ងៃទី០៤-១០-២០១១: ដកស្រង postkhmer
ភ្នំពេញៈ ប្រទេសកម្ពុជាបាននិងកំពុងទទួលរងផលប៉ះពាល់ធ្ងន់ធ្ងរជាងមុនពីការបម្រែបម្រួលអាកាសធាតុពិភពលោក នៅក្នុងប៉ុន្មានឆ្នាំចុងក្រោយនេះ ដូចជា ភាពរាំងស្ងួត ខ្យល់ព្យុះ និងគ្រោះទឹកជំនន់ ដែលបណ្តាលឲ្យស្លាប់ជីវិតមនុស្សយ៉ាង
ច្រើន។
នេះបើយោងតាម លោក ម៉ុក ម៉ារ៉េត រដ្ឋមន្រ្តីក្រសួងបរិស្ថាន បានថ្លែង កាលពីថ្ងៃចន្ទ ក្នុងអំឡុងពិធីបើកវេទិកាជាតិលើកទី២ ស្តីពីបម្រែបម្រួលអាកាសធាតុ។
លោក ម៉ុក ម៉ារ៉េត បានថ្លែងថា៖«នៅក្នុងឆ្នាំចុងក្រោយនេះ មានប្រទេសជាច្រើនក្នុងពិភពលោក រួមទាំងកម្ពុជា ជាញឹកញាប់ជួបប្រទះភាពមិនប្រក្រតីនៃគ្រោះធម្មជាតិ និងមានសភាពអាក្រក់បំផុត ដូចជាផលប៉ះពាល់នៃការបម្រែបម្រួលអាកាសធាតុ ដែលបានបណ្តាលឲ្យមានគ្រោះទឹកជំនន់ ភាពរីងស្ងួត និងខ្យល់ព្យុះ ដែលទាំងអស់នេះ គឺជាផលប៉ះពាល់ធ្ងន់ធ្ងរទៅលើប្រព័ន្ធធារាសាស្រ្តសម្រាប់កសិកម្ម ហេដ្ឋា រចនាសម្ព័ន្ធ សន្តិសុខស្បៀងជីវិតមនុស្ស សុខភាព ជាពិសេសប្រជាជននៅតាមជនបទ»។
លោក ចាន់ យុត្ថា អ្នកនាំពាក្យក្រសួងធនធានទឹកនិងឧតុនិយម បានថ្លែង កាលពីថ្ងៃចន្ទថា ទឹកជំនន់នៅបន្តកើនឡើងចំនួន០,៥ម៉ែត្រនៅក្នុងទន្លេមេគង្គ ក្នុងរយៈពេលបីថ្ងៃ ចាប់ពីថ្ងៃទី៣ ខែតុលា ដោយសារភ្លៀងក្នុងប្រទេសថៃ និងឡាវ ហើយទឹកនឹងស្រកចាប់ពីថ្ងៃទី៦ ខែតុលា តទៅ។
លោក ចាន់ យុត្ថា បានថ្លែងថា៖ «ការបន្តកើនឡើងនៃទឹកជំនន់នេះ នឹងមិនធ្វើឲ្យប៉ះពាល់ច្រើនដល់ប្រជាជនទេពីព្រោះវានឹងស្រកបន្ទាប់ពីថ្ងៃទី៦ ខែតុលាឆ្នាំនេះ។ ពាក់ព័ន្ធនឹងផលប៉ះពាល់នៃបម្រែបម្រួលអាកាសធាតុ គឺវាមានការពិបាកក្នុងការបញ្ជាក់ ប៉ុន្តែ ខ្ញុំអាចអះអាងថា ទឹកជំនន់ គឺជាផលប៉ះពាល់»។
ថ្លែងជំនួសលោកនាយករដ្ឋមន្រ្តី ក្នុងអំឡុងពិធីបើកវេទិកាជាតិ ស្តីពីបម្រែបម្រួលអាកាសធាតុលោកឧបនាយករដ្ឋមន្រ្តី យឹម ឆៃលី បានថ្លែងថា ការប្រែប្រួលអាកាសធាតុមានផលប៉ះពាល់ធ្ងន់ធ្ងរទៅលើកសិកម្ម សេដ្ឋកិច្ច និងប្រជាជន។
លោកឧបនាយករដ្ឋមន្រ្តី យឹម ឆៃលី មានប្រសាសន៍បន្តថា៖«ទឹកជំនន់ឆ្នាំនេះ បានបំផ្លាញដំណាំស្រូវអស់ជាង៨ម៉ឺនហិកតា»។
លោក កែវ វី នាយកខុទ្ទកាល័យ នៃគណៈកម្មាធិការជាតិគ្រប់គ្រងគ្រោះមហន្តរាយ មិនអាចទាក់ទងសុំការអត្ថាធិប្បាយបានទេ កាលពីថ្ងៃចន្ទ ប៉ុន្តែ លោកបានថ្លែងប្រាប់ភ្នំពេញប៉ុស្តិ៍ កាលពីថ្ងៃអាទិត្យថា ចំនួនអ្នកស្លាប់ផ្លូវការបច្ចុប្បន្នមានចំនួន ១៤៨ នាក់ ប៉ុន្តែ ចំនួនច្រើនជាងនេះត្រូវគេជឿថា បានស្លាប់កាលពីចុងសប្តាហ៍មុន ហើយចំនួននេះ មិនទាន់ត្រូវបានគេបញ្ចូលទៅក្នុងបញ្ជីផ្លូវការនៃជនរងគ្រោះដោយទឹកជំនន់សរុបនៅឡើយនោះទេ៕
No comments:
Post a Comment