ពិធីចុះហត្ថលេខាលើជំនួយជាង៣៥លានដុល្លារសហរដ្ឋអាមេរិកសំរាប់វិស័យសុខាភិបាល និងអប់រំនៅកម្ពុជា
ផ្សាយថ្ងៃទី២៦-១០-២០១១: ដកស្រង bayontv
ភ្នំពេញ៖ កាលពីរសៀលទី២៥ ខែតុលា ឆ្នាំ២០១១ នេះ នៅក្រសួងការបរទេសបាន
រៀបចំពិធីចុះហត្ថលេខាលើជំនួយទឹកប្រាក់ ចំនួនជាង ៣៥ លានដុល្លារសំរាប់វិស័យ
ជាអាទិភាពចំនួនពីរ គឺវិស័យអប់រំ និងសុខាភិបាល នៅកម្ពុជា ។
ពិធីចុះហត្ថលេខានោះធ្វើឡើងរវាង ឯកឧត្ដមឧបនាយករដ្ឋមន្រ្តី ហោ ណាំហុង រដ្ឋ
មន្ដ្រីក្រសួងការបរទេស និងសហប្រតិបត្ដិការអន្ដរជាតិ និងលោក Flynn Fuller នាយកបេសកម្ម នៃទីភ្នាក់ងារសហរដ្ឋអាមេរិកដើម្បីអភិវឌ្ឍន៍អន្ដរជាតិ (USAID) ក្នុង
នាមរដ្ឋាភិបាលរបស់ខ្លួន ហើយលោក Jeff Daigle ភារធារីស្ថានទូតសហរដ្ឋអាមេរិកប្រចាំនៅកម្ពុជា បានអញ្ជើញចូលរួមក្នុងនាមជាសាក្សី ។
បន្ទាប់ពីបិថីចុះហត្ថលេខានោះ ឯកឧត្ដមឧបនាយករដ្ឋមន្រ្តី ហោ ណាំហុង បានមានប្រសាសន៍ថាជំនួយនេះមានសារៈសំខាន់ណាស់សំរាប់វិស័យសុខាភិបាល និងអប់រំ
ដើម្បីជួយកាត់បន្ថយភាពក្រីក្រ ។ ឯកឧត្តមបានបន្តថា អាមេរិកបាន ជួយកម្ពុជាតាំងពីឆ្នាំ២០០៣មក ដែលសរុបមានប្រមាណជាង៣៣០លានដុល្លារហើយ ។នៅក្នុងសេចក្តីថ្លែងការណ៍របស់ស្ថានទូតអាមេរិកប្រចាំកម្ពុជាក៏បបានឲ្យដឹងដែរថា បន្ថែមលើជំនួយដែលត្រូវបានផ្តល់ក្រោមកិច្ចព្រមព្រៀងទ្វេ ភាគីទាំងពីរនេះ ទីភ្នាក់ងារ USAID នឹងផ្តល់ជំនួយបន្ថែមចំនួន ២,៩៤ លានដុល្លាសហរដ្ឋអាមេរិក តាមរយៈគម្រោងផ្សេងៗទៀត ដែលជាការធ្វើអោយជំនួយរបស់ទីភ្នាក់ងារ USAID ដល់ប្រទេសកម្ពុជា សំរាប់សកម្មភាពផ្នែកអប់រំ និងសុខាភិបាល មានជំនួយសរុបជាង ៣៥,៤២ លានដុល្លាសហរដ្ឋអាមេរិកសំរាប់ឆ្នាំ ២០១១។ស្ថានទូតបានឲ្យដឹងទៀតថា
វិសោធនកម្មលើកិច្ចព្រមព្រៀងក្នុងវិស័យសុខាភិបាលផ្ដល់ថវិកាជំនួយ ចំនួន ៣០,៩៣ លានដុល្លារសហរដ្ឋអាមេរិក ជាជំនួយដែលជួយដល់ការសំរេចគោលដៅសុខភាពថ្នាក់ជាតិរបស់កម្ពុជា។
ជំនួយនេះ ត្រូវប្រើសំរាប់ជួយសកម្មភាពផ្សេងៗដែលកំពុងដំណើរការដើម្បីកាត់ បន្ថយអត្រាឆ្លង និងផលប៉ះពាល់នៃជំងឺអេដស៍ ការពារនិងកំចាត់ជំងឺឆ្លងធំៗ ដូចជាជំងឺរបេង ធ្វើឱ្យប្រសើរឡើងនូវការគាំពារសុខភាពរបស់ មាតាកុមារ និងសុខភាពបន្ដពូជ និងពង្រឹងប្រព័ន្ធសុខភាពសាធារណៈ និងអាទិភាពនានាថ្នាក់ជាតិក្នុងផ្នែកសុខភាពរបស់រដ្ឋាភិបាល។ វិសោធនកម្មលើកិច្ចព្រមព្រៀងក្នុងវិស័យអប់រំ ផ្ដល់ថវិកា
ចំនួនជាង ១,៥៥ លានដុល្លារសហរដ្ឋអាមេរិក ដើម្បីគាំទ្រគោលដៅអប់រំរបស់រដ្ឋាភិបាលកម្ពុជា។
ជំនួយថវិកានេះប្រើសំរាប់គាំទ្រដល់កម្មវិធីផ្នែកអប់រំ ដែលកំពុងដំណើរការ ក្នុងគោលបំណងធ្វើឱ្យប្រសើរឡើងនូវគុណភាព និងប្រយោជន៍ទាក់ទងនៃការអប់រំជាមូលដ្ឋាន និងពង្រីកលទ្ធភាពចូលសាលារៀនឱ្យកាន់តែច្រើនឡើងសំរាប់កុមារ ទាំងអស់ រួមទាំងជនជាតិភាគតិចអ្នកបាត់បង់លទ្ធភាពពលកម្ម និងកុមារក្រីក្រខ្លាំងជាដើម ។ សកម្មភាពទាំងនេះថែមទាំងផ្ដោត ទៅលើការកាត់បន្ថយអត្រាបោះបង់ចោលសាលារៀន និងអត្រារៀនត្រួតថ្នាក់ តាមរយៈការបង្កើនគុណភាព នៃការបង្រៀន ការបណ្ដុះបណ្ដាលលើការគ្រប់គ្រងសាលារៀន និងការវាយតំលៃលទ្ធផលនៃការសិក្សារបស់សិស្ស។
បន្ថែមទៅលើសកម្មភាពក្នុងវិស័យសុខាភិបាល និងអប់រំ ទីភ្នាក់ងារ USAID ថែមទាំងជួយដល់កម្មវិធីជាច្រើនទៀត សំរាប់ជាប្រយោជន៍ដល់ប្រជាជនកម្ពុជាទាំងអស់ ដូចជាកម្មវិធីសិទ្ធិមនុស្ស និតិរដ្ឋ អភិបាលកិច្ចល្អនិងវិមជ្ឍការ ការគ្រប់គ្រងធនធានធម្មជាតិ កំណើនសេដ្ឋកិច្ច និងការប្រឆាំងការជួញដូរមនុស្សជាដើម។ ទីភ្នាក់ងារ USAID រំពឹងផ្ដល់ថវិកាសរុបចំនួន ៦៤,៨៧ លានដុល្លារសហរដ្ឋអាមេរិកជាជំនួយឧបត្ថម្ភដល់ប្រទេសកម្ពុជាក្នុង ឆ្នាំ ២០១១ ៕
No comments:
Post a Comment