អគ្គលេខាធិការដ្ឋានអាជ្ញាធរកម្ពុជាគ្រប់គ្រងសកម្មភាពកំចាត់មីន និងសង្រ្គោះជនពិការដោយសារមីនបើកសិក្ខាសាលាស្តីពីផែនការយុទ្ធសាស្ត្របញ្ជ្រាបយេនឌ័រក្នុងសកម្មភាពមីន
ផ្សាយថ្ងៃទី១២-១០-២០១១: ដកស្រង bayontv
ភ្នំពេញ៖ សិក្ខាសាលានេះ រៀបចំឡើងដោយអគ្គលេខាធិការដ្ឋានអាជ្ញាធរកម្ពុជាគ្រប់គ្រងសកម្មភាពកំចាត់មីននិងសង្រ្គោះជនពិការដោយសារមីនសហការជាមួយក្រសួងកិច្ចការនារី និងដៃគូរអភិវឌ្ឍ ក្រោមវត្តមានឯកឧត្តមជុំ ប៊ុនរ៉ុងទីប្រឹក្សាសម្តេចតេជោហ៊ុន សែន និងជាអគ្គលេខាធិការនៃអគ្គលេខាធិការដ្ឋានអាជ្ញាធរកម្ពុជាគ្រប់គ្រងសកម្មភាពកំចាត់មីននិងសង្រ្គោះជនពិការដោយសារមីន នារសៀលថ្ងៃទី១២ តុលា នៅសណ្ឋាគារកាំបូឌីយ៉ាណា។
ឯកឧត្តមជុំ ប៊ុនរ៉ុងបានប្រាសាសន៍ថា សិក្ខាសាលានាពេលនេះ មានសារសំខាន់ណាស់ក្នុងការជួបជុំគ្នា ដើម្បីរួមគំនិតយោបល់បទពិសោធន៍ល្អថ្មីៗ និងមានតម្លៃដែលនឹងធ្វើឱ្យសេចក្តីព្រាងផែនការយុទ្ធសាស្ត្របញ្ជ្រាបយេនឌ័រក្នុងសកម្មភាពមីនដែលជាសកម្មភាពមួយនៃការអនុវត្តផែនការកាតាហ្សេណា ហើយក៏ជាផែនការយុទ្ធសាស្ត្រផ្លូវការសំរាប់ដាក់ឱ្យប្រើប្រាស់និងអនុវត្តជាប្រយោជន៍ដល់សង្គមជាតិផងដែរ ។
ឯកឧត្តមបញ្ជាក់ថា គោលនយោបាយរបស់រាជរដ្ឋាភិបាលដើម្បីកំណើនការងារសមធម៌និងប្រសិទ្ធភាពទទួលស្គាល់ថា ស្រ្តីគឺជាឆ្អឹងខ្នងនៃសេដ្ឋកិច្ច និងសង្គមជាតិ។
សិក្ខាសាលានេះដែរ ជាឱកាសប្រមូលព័ត៌មាន និងសមិទ្ធផលដែលទទួលបានរួមទាំងការឲ្យឃើញពីឧបសគ្គ និងបញ្ហាប្រឈមនានាក្នុងការ បញ្ជ្រាបយេនឌ័រក្នុងសកម្មភាពមីនដែលតម្រូវឲ្យមានវិធានការណ៍ដោះស្រាយជាចាំបាច់។
ឯកឧត្តមបញ្ជាក់ទៀតថា ពាក់ព័ន្ធនិងការលើកកំពស់សមធម៌យេនឌ័រយើងត្រូវប្តេជ្ញា
ចិត្តថាអ្វីដែលសំខាន់គឺអ្វីដែលយើងទទួលបានពិតៗពីអ្វីដែលយើងត្រូវធ្វើនិងអ្វីដែល
យើងមានបទពិសោធន៍ជាចំណេះដឹង ដើម្បីចេះដោះស្រាយរាល់បញ្ហាដែលកើតមាន។
ឯកឧត្តម បានសំណូមពរដល់សិក្ខាកាមទាំងអស់សូមយកចិត្តទុកដាក់ធ្វើការពិភាក្សាផ្លាស់ប្តូរយោបល់គ្នាឱ្យបានផុលផុស ដើម្បីរិះរកនូវបទពិសោធន៍ល្អៗជំរុញសេចក្តីព្រាងផែនការយុទ្ធសាស្ត្របញ្ជ្រាបយេនឌ័រក្នុងសកម្មភាពមីនឱ្យក្លាយជាឯកសារផ្លូវការពេញលេញមួយដែលឆ្លុះបញ្ចាំងពីជោគជ័យទទួលបាននិងការអនុវត្ត
បន្តសកម្មភាពការងារប្រកបដោយភាពជាក់លាក់៕
No comments:
Post a Comment