មន្ត្រីក្រសួងឧស្សាហកម្មរ៉ែ និងថាមពលចុះបង្ក្រាបបទល្មើសធនធានរ៉ែនៅកំពត
ផ្សាយថ្ងៃទី២៤-១០-២០១១: ដកស្រង bayontv
កំពត៖ មន្ត្រីក្រសួងឧស្សាហកម្មរ៉ែ និងថាមពលមួយក្រុមដឹកនាំដោយលោក ម៉ក សុភក្ត្រា ប្រធាននាយកដ្ឋានរ៉ែសំណង់ បានចុះទៅត្រួតពិនិត្យការដ្ឋានអាជីវកម្ម ដីក្រហម ការដ្ឋានបូមខ្សាច់បកការដ្ឋានអាជីវកម្មថ្ម និងការដ្ឋាន ដែលបានលុប អាជ្ញាប័ណ្ណមួយចំនួនទៀត នៅក្នុងខេត្តកំពតកាលពីថ្ងៃទី២១ ដល់ថ្ងៃទី២២ ខែតុលា ឆ្នាំ២០១១។គោលបំណងនៃការ
ចុះនេះដើម្បីពិនិត្យស្ថានភាពកំពុងជីកកកាយនៅតាមបណ្តាការដ្ឋាននានាទូទាំងខេត្ត។
ជាក់ស្តែងកាលពីព្រឹកថ្ងៃទី២១ ខែតុលា ឆ្នាំ២០១១ក្រុមការងារ បានចុះទៅការដ្ឋានអាជីវកម្ម ដីក្រហម នៅភ្នំថ្កូវ ភូមិកោះផ្តៅ ឃុំកំពង់ត្រាចខាងលិច ស្រុកកំពង់ត្រាច ខេត្តកំពត ដែលក្រុមហ៊ុនស្វី លឹមសារិន កំពុងធ្វើសកម្មភាពជីកកកាយ យ៉ាងគគ្រឹកគគ្រេងយកអាចមន៍ដីទៅផ្គត់ផ្គង់ផ្លូវលេខ៣៣ ពីកំពង់ត្រាចទៅព្រៃចាក ដែលជាគំរោងប្រាក់កំចី ADB ដោយគ្មានច្បាប់អនុញ្ញាតពីក្រសួងឧស្សាហកម្មរ៉ែ និងថាម
ពល។
ក្រុមការងារបានឃាត់សកម្មភាព និងបានឃាត់គ្រឿងចក្រចំនួន៦គ្រឿង ក្នុងនោះរថយន្តដឹកជញ្ជូនដីធុនធ្ងន់៣គ្រឿង អេស្កាវ័រទ័រ២គ្រឿង និងChager (សាហ្សើ) ១គ្រឿង។បន្ទាប់ពីបានឃាត់សកម្មភាព និងវត្ថុតាងរួចមក អ្នកតំណាង៣រូប បានចេញមុខធ្វើកិច្ចសន្យាបញ្ឍប់ធ្វើសកម្មភាព ជីកកកាយ និងដឹកចាប់ពីថ្ងៃនេះតទៅរហូតដល់មានការអនុញ្ញាត ពីក្រសួងឧស្សាហកម្មរ៉ែ និងថាមពល ហើយក្រុមហ៊ុនត្រូវទទួលខុសត្រូវបង់ប្រាក់ពិន័យក្នុងទំហំៈ 80m×50m×3m។
លោក ម៉ក់ សុភក្ត្រា ប្រធាននាយកដ្ឋានរ៉ែសំនង់និយាយថា បុគ្គលទាំងឡាយណា មុននឹងចូលទៅក្នុងតំបន់ដីជាកម្មសិទ្ធិរបស់រដ្ឋ ដែលកំណត់ថាជាតំបន់ការពារ តំបន់បំរុងទុកឬតំបន់ហាមឃាត់ ដើម្បីស្វែងរុករក និងជីករករ៉ែសម្បទា និងត្រូវមានការអនុញ្ញាតជាលាយល័ក្ខអក្សរពីស្ថាប័នមានសមត្ថកិច្ច ឬស្ថាប័នអន្តរក្រសួងដែលមានតួនាទីគ្រប់គ្រង លើតំបន់នោះ ម៉្យាងទៀតត្រូវហាមដាច់ខាត ក្នុងការដឹកជញ្ជួនធនធានរ៉ែចេញពីក្នុងករណីដែលធនធានរ៉ែមិនទាន់បានបង់សួយសារ ឬគ្មានលិខិតអនុញ្ញាត ជាលាយល័ក្ខអក្សរ។
លោក ម៉ក់ សុភក្ត្រាបញ្ជាក់ថា នៅថ្ងៃទី២២ ខែតុលា ឆ្នាំ២០១១ ក្រុមការងារបានចុះទៅត្រួតពិនិត្យការរដ្ឋានសិប្បកម្មថ្ម ស្របច្បាប់មួយចំនួនទៀតនៅស្រុកអង្គរជៃរបស់ក្រុមហ៊ុនដាន ហេង និងក្រុមហ៊ុន ទេព សុខា នៅស្រុកអង្គរជ័យ ដែលបច្ចុប្បន្នកំពុងប្រតិបត្តិការយ៉ាងសកម្ម។ការចុះត្រួតពិនិត្យនេះក្រុមការងារសង្កេតឃើញថា ក្រុមហ៊ុនកំពុងជីកកកាយខុសលក្ខណៈបច្ចេកទេស ដូចច្នេះនឹងត្រូវណែនាំដល់ម្ចាស់ក្រុមហ៊ុន ដើម្បីធ្វើការកែសម្រួល។តមកក្រុមការបានចុះត្រួតពិនិត្យការដ្ឋានដីគ្រួសក្រហម ៣កន្លែងទៀត ដែលក្រសួងបានលុបអាជ្ងាប័ណកន្លងមក។ទី១ ការដ្ឋានរណ្ដៅដីគ្រួសក្រហម របស់ឈ្មោះទេព សុខា នៅភ្នំបន្ទាយចាស់ ឃុំថ្មី ស្រុកអង្គរជ័យ ខេត្តកំពត់ ដែលក្រសួងបានផ្តល់អាជ្ញាប័ណកាលពីឆ្នាំ២០០៨ និងបានបញ្ចាប់នៅឆ្នាំ២០១០ ដោយសារក្រុមហ៊ុន គ្មានសកម្មភាព និងទីផ្សារ។ ការចុះត្រួតពិនិត្យនេះ សង្កេតឃើញថា ពេលថ្មីៗនេះ មានការលួចជីកកកាយយកអាចន៍ដីជាបន្តទៀត ប៉ុន្តែត្រូវគេចខ្លួនបាត់ ខណៈដែលទទួលព័ត៌មានថា បន្ត្រីក្រុមការងារ នឹងត្រូវចុះត្រួតពិនិត្យនៅមូលដ្ឋានរបស់ខ្លួននោះ។ ទី២ បានចុះពិនិត្យមើលជាលើកទី២ នៅរណ្តៅដីមួយកន្លែងទៀតរបស់ឈ្មោះ ឈុន សុវែន នៅភ្នំត្រយឹង ឃុំល្អាង ស្រុកឈួក ដែលបានលួចជីកកកាយយកអាចន៍ដីខុសច្បាប់កាលពីឆ្នាំ២០០៩កន្លងទៅ។ប៉ុន្តែ ជាក់ស្តែង ទីតាំងនេះមិនមានសកម្មភាពទេ ព្រោះកាលចុះលើកទី១ ក្រុមការងារបានបញ្ឈប់សកម្មភាព និងបានណែនាំ ឱ្យបំពេញសំណុំបែបបទទៅតាមច្បាប់ តែឈ្មោះនេះមិនបានអនុវត្តទៅតាមការណែនាំនោះទេ និងមិនបានបន្ត សកម្មភាពជារៀងរហូតមក។ទី៣ បានចុះទៅការដ្ឋានសែម ម៉ន ដែលក្រសួងបានលុបអជ្ញាប័ណ ចោលនៅខែមិថុនា ឆ្នាំ២០១១ ដោយមូលហេតុបង្ខំឱ្យអ្នកទទួលអាជ្ញាប័ណបន្តបង់សួយសារជូនរដ្ឋ ដែលម្ចាស់ដើម ឈ្មោះសៃ ម៉ន ជំពាក់រដ្ឋកន្លងមក និងឃាត់បានគ្រឿងចក្រធុនធ្ងន់១០គ្រឿង ប៉ុន្តែ រហូតមកដល់បច្ចុប្បន្ននេះ មិនទាន់បានដោះស្រាយនៅឡើយទេ ហើយកំពុងរៀបចំសំណុំរឿងដាក់ជូនទៅតុលាការ ដើម្បីចាត់ការទៅតាមនីតិវិធី។
លោកដាន ហេងប្រធានក្រុមហ៊ុនដាន ហេង ដែលកំពុងប្រតិបត្តិការសិប្បកម្មថ្ម នៅឃុំតានី ស្រុកអង្គរជ័យ ខេត្តកំពត បានលើកឡើងថា លោកចង់ឃើញក្រុមហ៊ុនផ្សេងៗទៀតគោរពទៅតាមច្បាប់អាជីវកម្មរបស់ក្រសួង ពាក់ព័ន្ធ និងចង់ឱ្យក្រសួងពាក់ព័ន្ធជំរុញអាជីវកម្មទាំងនោះអនុវត្តច្បាប់ឱ្យបានត្រឹមត្រូវ ពីព្រោះក្រុមហ៊ុនរបស់លោក តាំងពីបានចាប់ផ្តើមមកពុំទាន់ទទួលប្រាក់ចំណេញនៅឡើយទេ ដោយសារមានអាជីវករមួយចំនួនលក់ផលិតផលរបស់ខ្លួនក្នុងតម្លៃថោក ព្រោះខ្លួនមិនបានបង់ស៊ុយសារជូនរដ្ឋ។
សរុបជារួម នៅក្នុងខេត្តកំពតទាំងមូល មានបទល្មើសជីកកកាយដី បូមខ្សាច់បកអនាធិបតេយ្យជាច្រើន កន្លែង ដោយអាជ្ញាធរមិនបានអើពើរ ជាក់ស្តែងគឺនៅស្រុកទឹកឈូរ និងស្រុកកំពង់ត្រាច។
ចំណែកការដ្ឋានរណ្តៅថ្មវិញ គឺពុំមានអនាធិតេយ្យច្រើនទេ គឺមានអាជ្ញាប័ណស្រប់ច្បាប់ គ្រាន់តែការអនុវត្តខុសបច្ចេកទេសបន្តិចបន្ទួចប៉ុណ្ណោះ។ ដោយឡែក ករណីបូមខ្សាច់បកមានអនាធិបតេយ្យ៣កន្លែង ជាលក្ខណៈទ្រង់ទ្រាយតូចៗ៕
No comments:
Post a Comment