ក្រុមហ៊ុនថៃនឹងខាតបង់រាប់ពាន់លានដុល្លារ
ផ្សាយថ្ងៃទី១៤-១០-២០១១: ព័ត៌មានអន្ដរជាតិ ដកស្រង postkhmer
បាងកកៈ លោក Pichai Naripthaphan រដ្ឋមន្ត្រីក្រសួងថាមពលរបស់ប្រទេសថៃ បានឲ្យដឹងថា ឧស្សាហកម្មឥន្ធនៈគីមីរបស់ថៃ អាចនឹងខាតបង់ប្រាក់រាប់ពាន់លានដុល្លារ
ប្រសិនបើរដ្ឋាភិបាលរបស់ខ្លួនពុំបានចុះកិច្ចព្រមព្រៀងមួយជាមួយ កម្ពុជា ដែលជាប្រទេសជិតខាងរបស់ខ្លួនលើតំបន់សមុទ្រត្រួតស៊ីគ្នាដែល សម្បូរដោយប្រេង និងឧស្ម័ននោះទេ។
លោកបានឲ្យដឹងក្នុងបទសម្ភាសមួយនៅទីក្រុងបាងកកកាលពីថ្ងៃពុធ ថា៖ «ធនធានឧស្ម័នរបស់ថៃនឹងអស់ក្នុងរយៈពេល១៥ឆ្នាំខាងមុខ ហើយក្រុមហ៊ុនឥន្ធនៈគីមីជាច្រើនពឹងផ្អែកលើឧស្ម័នដែលមានក្នុង ឈូងសមុទ្រនៃតំបន់ត្រួតស៊ីគ្នានេះ។ យើងនឹងខាតបង់ប្រាក់រាប់ពាន់លានដុល្លារជារៀងរាល់ឆ្នាំ បើយើងពុំមានការផ្គត់ផ្គង់ឧស្ម័នបន្ថែមទៀតនោះទេ»។
លោក Pichai មានប្រសាសន៍ទៀតថា រដ្ឋាភិបាលថ្មីរបស់លោកស្រី យីងឡាក់ ស៊ីណាវ៉ាត្រា ដែលទើបតែកាន់អំណាចបានពីរខែ បានព្យាយាមស្តារទំនាក់ទំនងជាមួយនឹងប្រទេសកម្ពុជាឡើងវិញ បន្ទាប់ពីមានជម្លោះប្រដាប់អាវុធជាច្រើនលើកច្រើនសានៅតាម តំបន់ព្រំដែន និងបានសម្លាប់មនុស្សអស់ជាង២០នាក់ ចាប់តាំងពីឆ្នាំ២០០៨មក។
ដែនសមុទ្រដែលប្រទេសទាំងពីរនេះ បានអះអាងថាជារបស់ខ្លួន មានប្រេង និងស្ម័ន
គ្រប់គ្រាន់ដែលអាចធានាការផ្គត់ផ្គង់របស់ប្រទេសថៃបាន រយៈពេល៥០ឆ្នាំ។
ការអភិវឌ្ឍក្នុងដែនសមុទ្រទំហំ២៦០០០គីឡូម៉ែត្រការ៉េ ត្រូវបានពន្យារពេលជាង៣
ទសវត្សរ៍មកហើយ។
លោក Pichai បានឲ្យដឹងថា រ៉ែឧស្ម័នដ៏ច្រើនសន្ធឹកសន្ធាប់នៅក្នុងតំបន់ជម្លោះនេះ យ៉ាងហោចណាស់មានបរិមាណស្មើនឹងរ៉ែឧស្ម័នរបស់ថៃនាពេលបច្ចុប្បន្ន ដែលក្រុម
ហ៊ុន BP Plc ព្យាករថាមានចំនួន ១១ពាន់ពាន់លានម៉ែត្រគូប ពោលគឺស្មើនឹង១០ដងនៃរ៉ែឧស្ម័នបម្រុងរបស់ចិន។
លោក មានប្រសាសន៍ថា យ៉ាងហោចណាស់ត្រូវចំណាយពេល១០ឆ្នាំ ដើម្បីបូមយក
ឧស្ម័នចេញពីក្នុងដី បន្ទាប់ពីមានកិច្ចព្រមព្រៀងផ្នែកនយោបាយ ដែលជាដំណើរការមួយកំពុងចាប់ផ្តើម។
លោកថ្លែងថា៖ «ពេលនេះ វាបង្ហាញផលវិជ្ជមានខ្លាំងណាស់ ដែលយើងចង់ឲ្យកិច្ចព្រមព្រៀងនេះសម្រេចឲ្យបាន ហើយកម្ពុជាក៏មានបំណងសម្រេចកិច្ចព្រមព្រៀងនេះ
ដែរ។ យើងគ្រាន់តែត្រូវបញ្ជាក់ឲ្យប្រាកដថា នយោបាយផ្ទៃក្នុងពុំមែនជាឧបសគ្គមួយ
ចំពោះកិច្ចព្រមព្រៀងនេះ ទេ»៕
No comments:
Post a Comment