អង្ករចេញលក់ ក្រោយមានបទបញ្ជា
ផ្សាយថ្ងៃទី១៧-១០-២០១១: postkhmer
ភ្នំពេញៈ លោកនាយករដ្ឋមន្រ្តី ហ៊ុន សែន កាលពីថ្ងៃសុក្រសប្តាហ៍មុន បានបញ្ជាឲ្យធនាគារអភិវឌ្ឍន៍ជនបទធ្វើការរួមគ្នាជាមួយសមាគម រោងម៉ាស៊ីនកិនស្រូវនៅកម្ពុជា ដែលខ្ចីឥណទានពីធនាគារនេះ ដើម្បីបញ្ចេញអង្ករលក់តាមទីផ្សារក្នុងតម្លៃថោកដើម្បីទប់ ការឡើងថ្លៃដ៏តក់ក្រហល់។
លោក ស៊ុន គន្ធរ អគ្គនាយកធនាគារអភិវឌ្ឍន៍ជនបទ បាននិយាយថា លោកនាយក
រដ្ឋមន្រ្តី ហ៊ុន សែន បានបញ្ជារូបលោកឲ្យសហការជាមួយសមាគមរោងម៉ាស៊ីនកិនស្រូវ ដើម្បីបញ្ចេញអង្ករលក់ក្នុងតម្លៃមួយទាបដើម្បីទប់តម្លៃអង្ករដែលឡើងថ្លៃដ៏រំជើប
រំជួលក្នុងរយៈពេលពីរសប្តាហ៍ចុងក្រោយនេះ។
លោក ស៊ុន គន្ធរ និយាយថា៖ «នេះជាយុទ្ធនាការរបស់សម្តេចតេជោ លោក បញ្ជាផ្ទាល់មកខ្ញុំ កាលពីម្សិលម្ង៉ៃ [សុក្រ]»។
លោក ស៊ុន គន្ធរ បានបន្តថា ការដាក់លក់អង្ករនេះ នឹងធ្វើឡើងរហូតដល់តម្លៃអង្ករនៅលើទីផ្សារមានស្ថិរភាពឡើងវិញ ដើម្បីបង្ការការឆ្លៀតឱកាសកេងយកប្រយោជន៍
ពីសំណាក់ឈ្មួញកណ្តាល ពីគ្រោះទឹកជំនន់នេះ។
យោងតាមតម្លៃអង្ករជាក់ស្តែង ដែលដាក់លក់នៅតាមស្តង់ទាំង ៦កន្លែងនៅរាជធានីភ្នំពេញ គឺក្នុងមួយគីឡូក្រាម អង្ករនាងម៉ិញថ្លៃ២ ៣៣០៛ ស្មើនឹង ៥៧០ដុល្លារមួយតោន ផ្លាម្លិះប្រភេទបាក់ ២៥% ថ្លៃ ៣៣៥០៛ ស្មើនឹង ៨១៩ដុល្លារមួយតោន រីឯអង្ករផ្កាម្លិះប្រភេទបាក់ ៥% ថ្លៃ ១ ០០០ដុល្លារមួយតោន។
កាលសប្តាហ៍មុននេះ អាជីវករលក់អង្ករ បានអះអាងថា អង្ករនាងម៉ិញថ្លៃប្រមាណ ៦៧០ដុល្លារក្នុងមួយតោន ដោយសាររោងម៉ាស៊ីនមិនមានស្រូវគ្រប់គ្រាន់សម្រាប់ផ្គត់
ផ្គង់។
លោកបណ្ឌិត យ៉ង សាំងកុមារ ប្រធានមជ្ឈមណ្ឌលសិក្សា និងអភិវឌ្ឍន៍កសិកម្មកម្ពុជា ហៅកាត់ថា CEDAC បាននិយាយថា លោកគាំទ្រចំពោះយុទ្ធសាស្រ្តរបស់រដ្ឋាភិបាលក្នុងការជួយ ទប់ស្កាត់តម្លៃអង្ករនៅលើទីផ្សារ តែត្រូវមានការប្រយ័ត្ន។
លោក បានមានប្រសាសន៍ថា៖ «អន្តរាគមន៍ត្រូវតែប្រយ័ត្នដែរ ជួនកាលធ្វើខ្លាំងពេក វាអាចប៉ះពាល់ដល់យន្តការទីផ្សារសេរី តែសំខាន់បញ្ហាស្បៀង»។ លោកបានបន្ថែម
ថា៖ «ខ្ញុំគិតថា ធ្វើនេះជារឿងត្រឹមត្រូវ ដើម្បីជួយកុំឲ្យឡើងថ្លៃខ្លាំងពេក»។
លោក បានលើកឡើងផងដែរថា រដ្ឋាភិបាលគួរតែយកចិត្តទុកដាក់ចំពោះការហូរចេញស្រូវទៅកាន់ ប្រទេសជិតខាងក្រោយប្រមូលផលហើយ ដើម្បីចៀសវាងការខ្វះខាតតម្រូវការក្នុងស្រុក ស្របពេលដែលការផលិតស្រូវក្នុងប្រទេសមិនដឹងថាទទួលផលតិច ឬច្រើនផងនោះ។
លោក ភួ ពុយ ដែលជាប្រធានសមាគមរោងម៉ាស៊ីនកិនស្រូវកម្ពុជា បានបដិសេធមិន
ធ្វើអធិប្បាយ ដោយរង់ចាំរហូតដល់ពេលធ្វើសន្និសីទសារព័ត៌មាននៅរសៀលថ្ងៃនេះ៕
No comments:
Post a Comment