ការខូចខាតពីទឹកជំនន់អស់$១០០លាន
ផ្សាយថ្ងៃទី១១-១០-២០១១: ដកស្រង postkhmer
ភ្នំពេញៈ គ្រោះទឹកជំនន់ដែលបាននិងកំពុងកើតមាននៅប្រទេសកម្ពុជា អាចបង្កការ
ខូចខាតជាច្រើន បើគិតជាទឹកប្រាក់ជាង១០០លានដុល្លារអាមេរិក។ នេះបើតាមគណៈកម្មាធិការជាតិគ្រប់គ្រងគ្រោះមហន្តរាយ(NCDM) កាលពីថ្ងៃម្សិលមិញ។
ទឹកជំនន់ ដែលបានចាប់ផ្តើមតាំងពីដើមខែកញ្ញា បានសម្លាប់មនុស្ស ២០៧នាក់ហើយមកដល់ពេលនេះ និងបានបង្ខំឲ្យប្រជាពលរដ្ឋ ៣២ ០០០គ្រួសារ ចាកចេញពី
ផ្ទះសម្បែង ផ្ទៃដីធ្វើស្រែទំហំ ៤៤៥ ៥៣១ ហិកតា ត្រូវជន់លិច ស្ពានជាង១៦០កន្លែង
ត្រូវលិចលង់ ហើយផ្លូវជាតិ និងផ្លូវតាមបណ្តាខេត្តមួយចំនួន ប្រវែង ១៨០គីឡូម៉ែត្រ ត្រូវទទួលរងការខូចខាត។
តាមរបាយការណ៍ឲ្យដឹងថា តួលេខនៃការខូចខាតផ្លូវថ្នល់ ផលដំណាំ និងអគាររាប់ពី
ខេត្តបាត់ដំបង ដល់បន្ទាយមានជ័យ គិតជាទឹកប្រាក់ បានកើនឡើងដល់ចំនួនតួលេខ ដែលបានប៉ាន់ប្រមាណខាងលើ(១០០លានដុល្លារ)។
ក្នុងចំណោមវាលស្រែដែលទទួលរងផលប៉ះពាល់ដោយទឹកជំនន់ គឺផ្ទៃដី១២៦ ៦៣២
ហិកតា បានទទួលរង ការខូចខាតទាំងស្រុង។ សំណាបជាង ៦៣០ហិកតា ក៏បានទទួលរងផលប៉ះពាល់ផងដែរ។ បញ្ហានេះធ្វើឲ្យការច្រូតកាត់នៅចន្លោះខែវិច្ឆិកា និងកុម្ភៈ ស្ថិតក្នុងហានិភ័យ។
លោក ញឹម វណ្ណដា អនុប្រធានគណៈកម្មាធិការជាតិគ្រប់គ្រងគ្រោះមហន្តរាយមានប្រសាសន៍កាលពីម្សិលមិញថា៖ «យើងសង្កេតឃើញថា ទឹកជំនន់ ប៉ះពាល់ខ្លាំងក្លាជាងគេលើដំណាំស្រូវ»។ លោកបានបន្ថែមថា កសិករ ពឹងផ្អែកលើដំណាំនេះ សម្រាប់រកប្រាក់ចំណូល និងទុកទទួលទាន៖ «ដូច្នេះ នេះជាចំណុចដែលរដ្ឋាភិបាល
និងអាជ្ញាធរមូលដ្ឋានត្រូវព្រួយបារម្ភអំពីជីវភាពរបស់ប្រជាជន»។
លោក Tim Purcell នាយកអង្គការអភិវឌ្ឍន៍កសិកម្មអន្តរជាតិ បានឲ្យដឹងកាលពីម្សិល
មិញថា ការកើនឡើងតម្លៃស្រូវទ្វេដងនៅប្រទេសថៃ បានការពារឧស្សាហកម្មស្រូវនៅកម្ពុជាមិនឲ្យខាតបង់ខ្លាំងពេកទេ។
លោកថ្លែងថា តម្លៃស្រូវបានឡើងថ្លៃពីប្រហែល ២៥០ដុល្លារ ទៅ ៥០០ដុល្លារ ក្នុងមួយតោននឹងធ្វើឲ្យរោងម៉ាស៊ីនកិនស្រូវជាច្រើននៅថៃ ស្វែងរកទិញស្រូវពីកម្ពុជា រយៈពេលប៉ុន្មានខែខាងមុខនេះ។ លោក Purcell បានឲ្យដឹងថា ការថយចុះនូវផលិតកម្មស្រូវ ដោយសារតែទឹកជំនន់នឹងមានចំនួនតិចតួចប៉ុណ្ណោះ។ ការធ្វើស្រែវស្សាបានកើនឡើងជាង៤,៣ភាគរយ ឬ ១១៣ ១៨០ហិកតា នៅចន្លោះឆ្នាំ២០១០ និង ២០១១។ លោកបញ្ជាក់ថា ទិន្នផលកើនឡើង នឹងអាចទូទាត់ការខូចខាតដោយទឹកជំនន់បាន។
ទឹកជំនន់បានបំផ្លាញផ្ទះប្រជាជនអស់ចំនួន ៦៤០ខ្នង និងសាលារៀន ១ ១៣២កន្លែង
កាលពី៣សប្តាហ៍មុន។
ទោះបីជា NCDM មិនបានផ្តល់តួលេខទាក់ទងនឹងការខូចខាតរចនាសម្ព័ន្ធទាំងនោះក្តី ប៉ុន្តែអ្នកភូមិ ទឹកអណ្តូង ក្នុងខេត្តកំពង់ធំ ដែលបានប្រាប់ភ្នំពេញ ប៉ុស្តិ៍ កាលពីចុងខែមុនបានឲ្យដឹងថា ផ្ទះថ្មីៗនៅក្នុងភូមិដែលសង់ខ្ពស់ពីដីប្រមាណ៣ម៉ែត្រមួយខ្នង មានតម្លៃប្រហែល៦ពាន់ដុល្លារ។
កសិករ ដួង សាវ៉ន នៅភូមិទឹកអណ្តូង ខេត្តកំពង់ធំ បានវិលត្រឡប់ទៅផ្ទះរបស់គាត់
វិញកាលពីពាក់កណ្តាលខែកញ្ញា ដើម្បីស្វែងរកបំណែកអគាររបស់គាត់ ដែលបានដួលរលំទៅក្នុងទឹក។
កសិករដែលមានវ័យ ៥២ឆ្នាំរូបនេះ បានឲ្យដឹងថា អ្នកស្រី នឹងយកបានមកវិញ នូវឈើធ្វើផ្ទះ ហើយអាចសង់ផ្ទះឡើងវិញ ដោយចំណាយអស់ប្រហែល ១ ៦០០
ដុល្លារ។
លោក ហូ វណ្ឌី សហប្រធានក្រុមការងារទេសចរណ៍វិស័យឯកជន បានឲ្យដឹងកាលពីម្សិលមិញថា នៅក្នុងទីក្រុង និងតំបន់ជាច្រើន ដែលទាក់ទាញភ្ញៀវទេសចរ អ្នកពាក់ព័ន្ធទាំងអស់នៅក្នុងឧស្សាហកម្មទេសចរណ៍ ដែលក្នុងនោះមានរាប់ទាំងពីអ្នករត់រឺម៉កកង់បី ដល់ម្ចាស់រមណីយដ្ឋាន បានទទួលរងផលប៉ះពាល់ពីទឹកជំនន់។
លោកបានឲ្យដឹងទៀតថា អ្នកជំនាញនៅក្នុងវិស័យនេះ មិនទាន់បានកំណត់ទំហំទឹក
ប្រាក់នៃការខូចខាតអគារ និងអាជីវកម្មរបស់ខ្លួនឡើយ ប៉ុន្តែលោកអះអាងថា ក្រុមការងារនេះនឹងបញ្ជូនសំណើទាមទារសំណងពីរដ្ឋាភិបាល នៅខែក្រោយ។
យោងតាមគណៈកម្មាធិការជាតិគ្រប់គ្រងគ្រោះមហន្តរាយ បានឲ្យដឹងថា គ្រាន់តែការចំណាយលើការជួសជុលផ្លូវ និងស្ពានត្រូវគេប៉ាន់ប្រមាណនឹងចំណាយអស់ ២០
លានដុល្លារ ក្នុងចំនួនទឹកប្រាក់១០០លានដុល្លារនេះ៕
No comments:
Post a Comment