កំណើនសេដ្ឋកិច្ចកម្ពុជាអាចធ្លាក់មកត្រឹម៦ភាគរយដោយសារគ្រោះទឹកជំនន់ធ្ងន់ធ្ងរ
ផ្សាយថ្ងៃទី១៣-១០-២០១១: ដកស្រង bayontv
ភ្នំពេញ៖ កំណើនសេដ្ឋកិច្ចកម្ពុជាសម្រាប់ឆ្នាំនេះអាចនឹងត្រូវធ្លាក់មកត្រឹម ៦ភាគរយ ដោយសារគ្រោះទឹកជំនន់មានសភាពធ្ងន់ធ្ងរពេក។
គួរបញ្ជាក់ថា កាលពីដើមឆ្នាំក្រុមអ្នកសេដ្ឋកិច្ចកម្ពុជាបានព្យាករណ៍ថា កំណើនសេដ្ឋកិច្ចរបស់ប្រទេសនេះសម្រាប់ឆ្នាំ២០១១ អាចនឹងកើនដល់ជាង៨ភាគរយ។
ឯកឧត្តមឧបនាយករដ្ឋមន្រ្តីគាត ឈុន រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ បានឲ្យ
ដឹងកាលពីថ្ងៃទី១១ ខែតុលា ឆ្នាំ២០១១ថា កំណើនសេដ្ឋកិច្ចប្រទេសកម្ពុជាសម្រាប់ឆ្នាំ២០១១នេះអាចមានត្រឹម ៦ភាគរយប៉ុណ្ណោះ។ នោះក៏ព្រោះតែគ្រោះទឹកជំនន់ដ៏ធ្ងន់ធ្ងរ និងភាពមិនប្រាកដប្រជា នៃសេដ្ឋកិច្ចអាមេរិក និងអឺរ៉ុប។
ឯកឧត្តមបន្តថា លក្ខខណ្ឌមិនអំណោយផលក្នុងស្រុក និងនៅក្នុងសកលលោកបានរួមចំណែកដល់ការព្យាករទាបជាងការរំពឹងទុក សម្រាប់កំណើនសេដ្ឋកិច្ច។ ដោយលោកបន្តថា ព្រឹត្តិការណ៍ប៉ះពាល់ដល់សេដ្ឋកិច្ច ព្រមទាំងការខូចខាតហេដ្ឋារចនាសម្ព័ន្ធ និងកសិកម្មដោយសារទឹកជំនន់ ក៏នឹងប៉ះពាល់ដល់កំណើនសេដ្ឋកិច្ចរបស់កម្ពុជាក្នុងឆ្នាំ២០១២ផង ដែរ។
លោក Peter Brimble សេដ្ឋវិទូជាន់ខ្ពស់របស់ធនាគារអភិវឌ្ឍន៍អាស៊ី (ADB) ប្រចាំកម្ពុជាបានថ្លែងថា ការព្យាករណ៍របស់ ធនាគារនេះគឺនៅតែរក្សាតួលេខកាលពីខែមុន ដែលព្យាករណ៍ថា កំណើនសេដ្ឋកិច្ចរបស់ប្រទេសកម្ពុជាឆ្នាំ២០១១នេះ មានចំនួន៦,៨ភាគរយដដែល ទោះបីមានការខូចខាតដោយសារទឹកជំនន់ក៏ដោយ។ ដោយលោកបន្តថា កំណើនមិនគួរធ្លាក់ចុះដោយសារទឹកជំនន់ឡើយ៕
No comments:
Post a Comment